Loma 11
11
U Tienu ki luni Isidayeli yaaba
1Lanwani, n buali: Naani U Tienu luni o nibuolu Isidayeli yaaba? Kalam! Mini n ba, n tie Isidayeli buolu, Abalahama puoliŋuanu leni Benjamen buolu#11.1 Benjamen buolu: Diidi Bi Badiba Tikpiali 12.21. yua. #Flp 3.5. 2U Tienu naa luni o niba cain, wan den tuodi ki bani yaaba hali yogu. Yii bani i Diani n yedi yaala naankani ke Eli den yenbidi U Tienu kani Isidayeli buolu po ki yedi: 3«N Diedo, bi kpa a saawalipuaba, ki go tudi ki luni a padibinbina. Mini bebe n sieni, ke bi moandi ki baa ñani nmoko yaa miali.» #1Bad 19.10,14. 4U Tienu den guani o be? U Tienu den guani ki yedi o: «N kubi n yuli po niba tudalele (7 000), yaaba n daa gbaani ki pugi Baali.» #1Bad 19.18. 5Li go tie yeni moala ne, Isidayeli buolu siiga nitianga sieni, U Tienu n gandi yaaba, kelima o ŋanbili po. 6Lanwani, li yaa tie ke o gandima yeni ŋua o ŋanbili, laa ŋua a tuona. Lani yaa ka, U Tienu ŋanbili yeni, ki go tie ŋanbili.
7Lankuli doagidi be? Lankuli doagidi, ke Isidayeli buolu naa baa ban den lingi yaala leni li yankuali. Ama bi siiga nni, U Tienu n gandi yaaba bebe n baa la, yaaba n sieni kuli yaa pala den juagi. 8Nani lan diani maama:
«U Tienu kuani bi niinni
Mi guama yantiali ke bi gonbidi.
Bi pia i nuni ki naa nua liba,
Bi pia a tuba moko ki naa gbadi liba,
Ki taa ki pundi hali dinla.» #Tia 29.4; Esa 29.10.
9Davidi moko yedi:
«Bi saajekaanu n tua bi po diagu,
Taalu leni tingbali bonla.
Ban baa yeni bi biadima panpaani. #Ps 69.23-24.
10Bi nuni n tadigi ki da go nua,
Bi ciamu n poali ki buani yaa yogunu kuli po.»
11Lanwani, n buali: Naani Isidayeli buolu tuudi ki baa yaa yogunu kuli po ki kan go fii yo? Yeni ka. Bi tingbali teni ke bi nilanba fidi ki baa mi tindima, ke lan yaa ñundi bani Isidayeli buolu li mutuoli. 12Lanwani, Isidayeli buolu tingbali yaa cuani liseli ŋanduna kuli po, ke bi gbalima mo teni ke bi nilanba baa li seli, laa pia kuli tama ke bi yaa guani U Tienu kani, li baa cuani ŋanduna kuli po yaa seli n yabi ki cie yeni.
Yaaba n kaa tie Isidayeli buolu tindima
13Moala, n maadi leni yinba bi nilanba, kelima n tie U Tienu tondo bi nilanba po. N jigini min pia yaa tuonli bi nilanba siiga, 14ke li yaa baa tuo min yaa ñundi n buolu li mutuoli, ke min fidi ki faabi bi siiga bi tianba. 15U Tienu n da den yie Isidayeli buolu yeni, yaa den teni ke ŋanduna yaaba mangi leni o, o yaa guani ki mangi leni ba, li baa tua lede? Li baa yaa tie nani bi tinkpiba n guani ki baa li miali yene.
16A yaa buuni ti yonbudi ki yidi waamu ki puni U Tienu nani li bonluonkakpiala yeni, yaadi n sieni moko gagidi U Tienu po. Bu tibu jiinu yaa gagidi U Tienu po, bu beni moko gagidi o po. 17Ama li yaa tie ke i bentiami jia ki ñani, ke fini yua n tie olivie tilianbu yaa benu tugini bi yaa kaanu ki baadi olivie tiŋuukaabu yaa jiini n puuni yaa sinma, 18da kpiagi a yuli, ki fali ban den jia ki ñani yaa beni. A yaa kpiagidi a yuli, ŋan kpaagi line, a tie benu bebe, fini ka tugi u jiinu, u jiinu n tugi a.
19Daalinba a baa guani ki yedi: «Bi den jia ki ñani i benmoani ki baa tugini mine.» 20Li tie moamoani. Bi den jia ki ñani bani, kelima bi dandanluoma po, fini mo ye lienni, kelima li dandanli yaa po. Lanwani, ŋan da kpiagi a yuli, ama ŋan yaa jie. 21U Tienu yàá den cedi i benmoani yii n den ye i kaanceli, o kan cedi fini moko. 22Lani yaa po, ŋan kpaagi U Tienu ŋanbili leni o mabinli po. O den mabini yaaba n den baa, ki ŋanbi a yaa po, ama se ŋan yaa ye o ŋanbili nni, yeni yaa ka, o baa jia ki ñani amoko. 23Bani Isidayeli buolu mo yaa ñani bi dandanluoma nni, U Tienu baa guani ki tugini ba bu tiŋanbu nni, kelima wani U Tienu pia u paalu, ki baa fidi ki guani ki tugini ba. 24Li yaa tie ke fini yua n bi tie olivie tilianbu benga, den jia ki tugini yaa olivie tibu n tie tiŋuukaabu, ki naa tie a yaa buolu kani, lanwani laa pia kuli tama, ke bani moko baa fidi ki guani ki tugini, bani bi ba yaa tibu kani, nani bi buolu n tie maama.
U Tienu baa juodi ki faabi Isidayeli buolu
25N kpiiba, mii bua yaa bondoaginkaala n tie ne n yaa boani yi. Yin da nua yi yula ke yi tie yanfuodanba. Laa bondoaginkaala tie ke Isidayeli buolu siiga, bi tianba pala juagi hali bi nilanba n baa kua U Tienu tindima nni ki pundi ki dagidi cain. 26Li tie yeni ke Isidayeli buolu kuli baa faabi nani lan diani maama:
«O candaano baa ña Siyon po,
Ki ñani U Tienu yiema kuli
Jakob puoliŋuani pala nni. #Esa 59.20.
27Lani, n baa yaa tie n ŋantaado leni ba,
Min ñani bi po bi tuonbiadi yaa yogunu.» #Jer 31.33-34.
28A yaa kpaagi Isidayeli buolu n yie o Laabaaliŋamo maama, bi tie U Tienu yibalinba yinba bi nilanba ŋamu po. Ama a yaa kpaagi U Tienu gandima po, bi tie U Tienu buakaaba, kelima bi yaajanba po. 29U Tienu yiinu leni o paabu naa pia lebidima. 30Puoli po, yinba bi nilanba den yie ki naa tiendi U Tienu n bili yaala. Ama moala yi baa ke o gbadi yi po mi ninñima, kelima bani Isidayeli buolu yiema po. 31Li go tie yeni, Isidayeli buolu yie ki naa tiendi U Tienu n bili yaala, ke bani moko n baa U Tienu n gbadi bi po mi ninñima, nani wan gbadi yimo yaa po maama. 32U Tienu luoni bi nisaaliba kuli bi yiema nni, nani li kpaadidieli yeni, ki baa yuandi ki gbadi bikuli po mi ninñima.
Poli pagi U Tienu
33U Tienu ŋalimano yabi, o banma leni o yanfuoma yabi ki ñua ki pendi bi nisaaliba bancianma kuli. O jaga pendi bi nisaaliba n fidi ki kpaagi yaala. Baa fidi ki bandi yaala yaa po, ke o tieni wan tiendi yaala. #Esa 55.8. 34Li diani:
«Ŋme n bani o Diedo kpaagili?
Ŋme n fidi ki tua o juoginka? #Esa 40.13.
35Ŋme n den kpa puni U Tienu bu paabu,
Ke wani U Tienu mo baa guani o tiladi?» #Jb 41.3.
36Li bonla kuli ñani o kani, wani n kubi likuli, likuli mo ye o yaa po yo. Wani n yaa baadi ti kpiagidi, hali yaa yogunu kuli. Amina! #1Kor 8.6.
Currently Selected:
Loma 11: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
