Loma 10
10
1N kpiiba, n pali buama leni n miabu U Tienu kani Isidayeli buolu po tie ke ban tindi. 2N tieni bi po siedi ke bi pia li yankuali U Tienu sanŋoadima po, ama baa pia mi bandima. 3Ban ki bani U Tienu n puuni yaa moamoansaali yeni, li teni ke bi lingi bi yula po li moamoansaali ki naa lingi li U Tienu kani. 4Kelima Kilisiti n teni ke li bali maama kua, ke yaaba n daani kuli n baa li moamoansaali.
Yua n daani Jesu kuli baa tindi
5 Musa diani yaa teginma n baadi kelima li bali maama kubima po ki yedi: «Yaa nilo n tiendi man bili yaala kuli baa yaa ye kelima mi yaa po.» #Lev 18.5. 6Ama yaa moamoansaali n baadi kelima li dandanli yaa po, bi yedi mine: «Ŋan da yedi a pali nni: ‹Ŋme n baa do tanpoli?› » Lani n tie ki ban teni Kilisiti n ña lipo ki jiidi. #Tia 30.12-14. 7Ŋan da go yedi mo: «Ŋme n baa jiidi ki gedi u kulu nni?» Lani n tie ki ban teni Kilisiti n ña likani ki fii bi tinkpiba siiga. 8Lanwani, bi yedi lede? Bi yedi yaala n tie ne: «U Tienu maama ye ki kuu leni yi bonŋanla, ki ye yi ñoana nni leni yi pala nni. Mani n tie li dandanli yaa maama, tin wangi yi yaama.» 9A yaa tuo leni a ñoabu bi niba nintuali ke Jesu tie o Diedo, ki daani a pali nni ke U Tienu den fiini o bi tinkpiba siiga, a baa tindi. 10Kelima li tie li dandanli a pali nni n baa teni ŋan baa li moamoansaali. A ñoabu tuoma bi niba nintuali mo n baa teni ŋan baa mi tindima. 11Nani i Diani n yedi maama:
«Yua n daani o kan le fe.» #Esa 28.16.
12Lanwani, mi gagidima ki ye Jufi leni yua n kaa tie Jufi siiga, bikuli taa Diediyendo, wani yua n seligidi yaaba n jaandi ki miadi o kuli boncianla. 13Li diani: «Ama yua n jaandi ki mia o Diedo yaa yeli nni kuli, baa faabi.» #Jl 3.5. 14Bi baa mia ban kaa daani yua lede? Bi baa tuo ki daani ban daa gbadi yua yaa maama lede? Bi baa gbadi o maama mo lede, oba buli yàá wangi ba? 15Oba kuli yaa soani U Tienu mawangikaaba mo, bi baa gaa lede ki yaa wangi o maama? Nani lan diani maama:
«Diidi mani bi cenli n ŋani maama,#10.15 Diidi Esayi 52.7. Hebilu maama nni li yedi bi taana n ŋani maama.
Bani yaaba n cua ki wangi o Laabaaliŋamo.»
16Ama bikuli naa den tuo ki ŋoadi o Laabaaliŋamo. Esayi den doagidi la ki yedi:
«O Diedo, ŋme daani ti maama?» #Esa 53.1.
17O nilo baa baa li dandanli kelima wan gbadi yaala po, wan gbadi yaala mo tie Kilisiti maama.
18To, n buali line, naani baa gbadi u tondu bi? Bi gbadi saa. Li diani:
«Bi niali yadi yadi ki tinga nni kuli,
Bi maama mo yadi yadi hali ŋanduna banlu kuli.» #Ps 19.5.
19N go buali, naani Isidayeli buolu naa den bani yo? Musa n den kpa maadi li maguankaama ki yedi:
«N baa teni ke yaaba
N kaa tie nibuomoanu
N yaa ñundi yi buolu li mutuoli.
Yeni de! N baa teni yaa nibuolu
N kaa pia mi yanfuoma
N fiini yi pala.» #Tia 32.21.
20Esayi den pia li papaali ki cie ki yedi:
«Yaaba n kaa lingi nni, bani n laa nni,
N den doagidi n yuli
Bani yaaba n kaa lingi nni po.» #Esa 65.1.
21Ama Isidayeli buolu po o yedi:
«Daali kuli n tiani n nii
Ki bua ki mangi
Leni yaaba n tie niyiekaaba
Leni tupaalu danba.» #Esa 65.2.
Currently Selected:
Loma 10: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
