Loma 9
9
Isidayeli yaaba sienu U Tienu yanjagili nni
9.1—11.36
U Tienu leni wan den gandi yaa niba
1N maadi moamoani Kilisiti nni mii pua faama. U Tienu Fuoma Yua nni, n pali moko saa n po i moamoani. 2N ye leni ti yanyagiciandi leni li paboanli yogunu kuli, 3kelima n bi baa sugini ki tua ti solindi yua ki paadi leni Kilisiti n kpiiba yaa po, yaaba n kpi leni nni ti gbanandi nni yaa ŋamu po. 4Bani Isidayeli buolu yeni, U Tienu n den gandi yaa nibuolu ki teni ke bi tua o bimoanmu, ki doagidi bi po o kpiagidi, ki kuani i ŋantaadi leni ba, ki teni ba o bali maama, ki doagidi bi po ban baa jaandi o maama, ki niani ba o ñoaniani. #Ñam 9.4. 5Bi tie ti yaajanba puoliŋuani, Kilisiti moko den mali bi yaa buolu nne ti gbanandi po, wani yua n die li bonla kuli. U Tienu n baa ti pagidi hali yaa yogunu kuli. Amina!
6Mii bua ki yedi ke U Tienu ñoaniani ki go pia mayuli ka. Yaaba n mali ki tie Isidayeli puoliŋuani, bikuli ka tie Isidayeli buolu moamoani. 7Ban tie Abalahama puoliŋuani yeni moko naa teni ke bi tie o bimoanmu. U Tienu den yedi Abalahama: «Isaaka puoliŋuani n baa yaa tie a buolu.» #Cil 21.12. 8Lani, n bua ki yedi ke laa tie yaaba n mali nani bi nisaaliba kuli n maa maama n baa yaa tie U Tienu bila. Ama yaaba n mali nani wani U Tienu ñoanianu n bili maama n tie o buolu moamoani. 9U Tienu ñoanianu n tie ne: «Binli, u naa yogunu yaa pundi, n baa guani ki cua, Sala baa maa bonjaga.» #Cil 18.10.
10Lani bebe ka, Rebeka moko yaa po li den tie yeni leni o bilieda yaaba n den pia baayendo, lani n tie ti yaaja Isaaka. 11Hali ke laa bila daa den mali, ki daa tieni yaala n ŋani bi yaala n bia, ke U Tienu n den tuodi ki jagi yaala n yaa ye, ki ŋua o gandima ki naa ŋoadi a tuona, ama ki ŋua U Tienu yiinu, 12U Tienu den yedi Rebeka: «Ŋan baa yuandi ki maa yua n baa yaa die ŋan baa kpa maa yua,» 13nani lan diani maama: «N den bua Jakob ki nani Esayu.»#9.13 Diidi Mi Cilima 25.23 Mal 1.2-3, ki nani Esayu bua ki yedi yie Esayu.
14Lanwani, ti baa yedi lede? U Tienu ki tiegi bi? Yeni ka. 15U Tienu den yedi Musa: «N baa gbadi mi ninñima min bua ki yaa gba mi ninñima yua yaa po. N baa yaa dingidi n pali min bua ki yaa dingidi n pali yua yaa po.» #Ñam 33.19. 16Lanwani, laa ŋua o nilo n bua yaala, laa ŋua o moandili mo. Li ŋua U Tienu ninñingbadima. 17Li go diani Faraon mo yaa po ki yedi: «Min yini a ki teni ke a tua o badiciamo yaala yaa po tie ke n bua ki doagidi n paalu kelima a yaa po, ki go teni n yeli n ña ŋanduna nni kuli kelima a yaa po.» #Ñam 9.16. 18Lanwani, U Tienu gba mi ninñima wan bua ki yaa gba yua yaa po mi ninñima, ki go juagi wan bua ki juagi yua yaa pali.
U Tienu pabienli leni o ninñingbadima
19Daalinba yi siiga yendo baa guani ki yedi nni: «Lan tie maama yeni, be yaa po ke U Tienu go fu leni ti? Ŋme n baa fidi ki yie o yanbuama?» 20Fini o nisaalo, a tie ŋme ki baa nia leni U Tienu? Naani ban maa yaa tiagu baa yedi yua n maa ku: «Be yaa po ke a maa nni nanda?» #Esa 29.16; 45.9. 21O maado ki pia li bali ki taa ku yoagu ki tieni wan bua yaala yo? O kan ñani yoagikonyenli nni ki maa yaa tiagu n baa ye li tuonkpiagili po, ki go ñani laa yoagikonli nni ki maa yaa tiagu n baa ye li tuonfanli po yo?
22U Tienu mo den bua ki doagidi o pabienli ki teni bi niba n bandi o paalu. Lani yaa po, o den juuni ke li waagi leni yaa niba n tie nani yaa tiadi n tie li tuonfanli po, bani yaaba n den pundi U Tienu n cuo ba ki bolini ba. 23U Tienu den tieni yeni ki baa doagidi o kpiagidi n yabi maama yaa niba n tie nani wan den gbadi yaa tiadi po mi ninñima yaa po wan den tuodi ki ŋanbi yaaba ke ban taani leni o o kpiagidi nni? 24Lani n tie tinba, wan yini yaaba. Waa yini ti yaaba n tie Jufinba siiga bebe ka. Ama o go yini ti yaaba n kaa tie Jufinba moko siiga. 25Nani wan yedi o saawalipualo Ose yaa tili nni maama:
«Yaa nibuolu n kaa den tie n buolu,
N baa yini ba n buolu.
Min kaa den bua yaa nibuolu yeni,
N baa yi ba n buakaaba. #Ose 2.25.
26Ban den tua yaa nibuolu siiga:
‹Yii tie n buolu,›
Lankani lige bi baa yi ba:
‹U Tienu yua n fo bijaba.› » #Ose 2.1.
27O saawalipualo Esayi moko kpaani ki maadi Isidayeli buolu maama ki yedi:
«Baa Isidayeli buolu yaa yabi
Nani mi ñincianma tanbiima yeni,
Nitianga bebe n baa faabi. #Esa 10.22-23.
28Kelima o Diedo baa tieni
Wan den yedi yaala ki tinga nni
Ki juodi ke li kan waagi.»
29Li baa yaa tie nani Esayi n den kpa maadi maama ki yedi:
«Li Miali Diedo U Tienu, U Paaciamu Kuli Daano, yaa den cedi
Ke ti siiga nitianga sieni,
Ti buolu den baa bodi,
Ti den baa tua nani Sodomi yaaba yeni,
Ki go tua nani Gomori yaaba yeni.» #Esa 1.9.
O Laabaaliŋamo tie Isidayeli po moko
30Lanwani, ti baa yedi lede? Yaa nibuoli n kaa tie Isidayeli yaaba kaa lingi mi teginma, bani n baa li moamoansaali kelima li dandanli yaa po. 31Ama Isidayeli buolu, yaaba n den lingi ki bua ki baa li moamoansaali kelima li bali maama kubima yaa po, naa baa. 32Be yaa po ke baa baa? Baa den lingi ki baa baa kelima li dandanli yaa po. Ama bi den lingi ki bua ki baa li kelima bi tuona po. Lani, bi den tuudi li tantuudikaali, 33nani lan diani maama:
«Diidi ki le, n bili Siyon juali kani
Yaa tanli n baa teni bi niba n tuudi,
Yaa tancianli n baa teni bi niba n baa yeni,
Ama yua n dugi o po kuli,
O kan le i fe abada.» #Esa 28.16.
Currently Selected:
Loma 9: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
