Jesu Tondiba Tuona 28
28
Poli ye Maliti kpendegili po
1Tin den pundi li jaali leni laafia, ti den bandi ke bi yi li kpendegili yeni Maliti. 2Likani yaaba, den ŋanbi ti po ke li kandi. Ki taaga den mi, ti wadi mo den ye boncianla, ke bi cuoni ti po u mu, ki yini tikuli ke ti nagini ki yie. 3Poli den wodi ti dabidi ki baa tieni u mu nni. Ku muwuligu den tuogi li waalabili ke li ñani ti daadi nni, ki joani Poli nuu. 4Laa dogu yaaba n den laa ke li juani Poli nuu yeni, bi den yedi biyaba: «Moamoani o naa joa li baa tie nikpale. Ba ke o ciadi mi ñincianma nni, U Tienu teginma naa cedi wan yaa ye.» 5Ama Poli den kpia o nuu, ke o wa baa u mu nni, ke liba kuli ki tieni Poli. 6Yaaba n ye likani den guu ki tama ke o nuu baa moali, bi ke o baa baa ki kpe lanyogunu. Ama ban den guudi ki sua ke liba kuli ki tieni o, bi den lebidi bi yantiali ki yedi ke o baa tie tienu yo.
7Li kpendegili yudaano den yi Pubiliyusi. O diegu den kuu leni tin ye naankani. O den cua ki biali ti ki gedini ti o denpo, ki gaa ti cangu hali danataa leni ki nunmanga. 8Li den sua ke o baa dua ke o gbanandi beni, ke o go pia ki puŋaankaaga. Poli den gedi o kani ki maani o po o nii, ki jaandi ke o paagi. 9Lani yaa po, li kpendegili yaaba, yaaba n yia kuli den cua o kani, ke o paagi ba. 10Bi den jigini ti bonŋanla. Tin baa fii yaa yogunu, bi den puni ti tin luo yaala kuli.
Poli pundi Loma
11Li sua ke ñinbiatoagu den ñani Alekisandri dogu po, ki pundi tin ye yaa kpendegili hali u faalu n daa fii yaa yogunu, ki sedi ki guu hali ke u faalu yogunu n pendi. Bi den yi ku Diyosikuli.#28.11 Diyosikuli: Diyosikuli den tie buli ke bi nua ba pola. Li tie mi ñincianma nni yaa bonfuoda, ban den nua ke yaaba n kpaani yaaba n tagi mi ñincianma nni kuli. Tin den tieni ŋmaalitaa likani, ti den kua ku niinni ki fii. 12Tin den duodi ki pundi Silakusi dogu, ti den tieni likani danataa. 13Ti den suagi liiga ki balini mi ñincianma jaali, ki pundi Lejiyo. Lan den fii ki faa, ganu po faagu den fii ki tudi ti ki teni ke ti pundi Pusoli li dalieli daali. 14Ti den lingi ki laa ti kpiiba likani, ke bi mia ti ke ti kali leni ba danalele. Ti sancenli den ŋoadi yene, ke ti gedi Loma. 15Hali ke ti daa den pundi Loma, li den sua ke ti kpiiba yaaba n tie Loma yaaba den gaa ti laabaalo, ki tuogi ti Apiyusi daaga kani. Nitoaba mo den cua hali yaa candiegu n yi a Candietaada, ki tuogi ti lankani. Poli n den laa ba, o den tuondi U Tienu ki paagi o pali.
16Tin den pundi Loma, bi toatieba yudaano den teni a kpaada o yudanciamo. Ama bi den puni Poli li dieli, wan baa yaa ye naankani o bebe, ke minteeliyenli guu o.
Poli wangi U Tienu maama Loma
17Danataa n den pendi, Poli den yini Jufinba nikpiaga kuli. Ban den taani, o den yedi ba: «N kpiiba, mii tieni liba ti buolu po, mii yie ti yaajanba bogida mo. Ba yeni, bi den kuani nni li kpaadidieli nni Jerusalemi, ki go teni nni Loma yaaba. 18Loma yaaba n den buali nni, ki bua ki bandi min pia yaa tagili, bi den bua ki ŋaa nni kelima baa laa ke n tieni liba yaala n pundi ban kpa nni. 19Ama Jufinba n den yie, n den sua ke li tie n po tiladi min soagini n buudi Sesari kani. Mii den tieni yeni kelima n bua ki tabi n buolu tuotabiguba kuli ka. #JTT 25.11. 20Lani yaa po yo ke n mia ki bua ki le yi, ki go maadi leni yi. Li tie Isidayeli yaaba dugi yaala po yo, ke bi loli nni i naa kuseseli.»
21Bi den guani ki yedi o: «Tii baa tiliba kuli ke li ñani Jude diema po ki maadi a maama. Ti kpiiba siiga, oba mo naa ñani lipo ki cua ki maadi a po yaala n bia. 22Die ti bua ki gbadi a kani ŋan sua yaala, kelima ti bani ke bi yie u naa jaanbuolu i kaani kuli.»
23Bi den bili ban baa guani ki taani yaa daali. Li daali n pundi, bi niba den taani wan cani naani ki yabi. Bi den cua ku tiŋaagu ke Poli den maadi leni ba, ki yaa caa hali ku yenjuagu, ki bundi bi po, ki tiendi siedi ke U Tienu diema pundi. O den togidi ba yaala n diani Musa bali maama nni leni bi saawalipuaba tila nni, ki maadi Jesu maama, ki moandi ki baa dadi bi yama ban tuo ke Jesu maama tie moamoani. 24Bi nitianba den tuo ke wan maadi yaa maama tie moamoani, bi nitianba mo den yie kaa tuo. 25Ban den ña o kani ki nia leni biyaba, Poli den maadi mayenma ki pugini ki yedi: «U Tienu Fuoma Yua den pia moamoani, wan den teni ke o saawalipualo Esayi maadi leni yi yaajanba yaa maama ki yedi:
26Gedi u nibuolu na#28.26 u nibuolu na: Yeni tie Jufinba. po ki yedi ba:
Yi baa gbadi bonŋanla, ama yi nan kan bandi liba,
Yi baa noanli bonŋanla, ama yi nan kan le liba,#Esa 6.9-10.
27Kelima u nibuolu na niba pala juagi.
Bi biini bi tuba ki go ŋubini bi nuni,
Ke ban da ti le leni bi nuni,
Ki da gbadi leni bi tuba,
Ki da gaa bi pala nni,
Ke ban da ti lebidi bi pala min paagi ba.»
28Poli go den pugini ki yedi: «Lanwani, yin bandi ke U Tienu ji soani o tindima maama yeni bi nilanba po yo. Bani wani baa cengi.» [ 29Poli n den yedi yeni, Jufinba den ñani ki nia leni biyaba boncianla.]
30Lani n pendi, Poli den ye wan den pa i ligi ki ye yaa dieli nni obebe yeni binmunalie. O den bialiti yaaba n kpendi o kani ki baa le o kuli. 31O den wangi ba U Tienu diema maama, ki go bangi ba o Diedo Jesu Kilisiti maama fuuli leni li papaali boncianla. Oba kuli ki den yie o po wan da maadi.
Currently Selected:
Jesu Tondiba Tuona 28: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
