Mi Doagidima 6
6
Maalima bontabinkaala luoba
1Lani n den laa ki Pebiga n tabidi mi maalima bontabinkaala lele yeni siiga yenma yaa yogunu. N den gbadi ke a bonfuodinaada siiga yendo maadi ke o nialu tie nani i tatantani yeni ki yedi: «Cua na!» 2N den diidi ki laa o tanpieno. Yua n jagi o den kubi li dabanli. Bi den puni o ki badifogiliga, ke o ñani likani ki tie jakoando ki baa paadi. #Sak 1.8; 6.3,6.
3Ki Pebiga n go den tabidi mi maalima bontabinka-liedila yaa yogunu, n den gbadi ke o bonfuodilielo yedi: «Cua na!» 4Lanwani, tantoa den ñani ki moani. Bi den puni yua n jagi o u paalu ke wan teni mi yanduanma n gbeni bi niba siiga ki tinga nni, bi niba n yaa kpaani biyaba. Bi go den teni o ki jugisiecianga. #Sak 1.8; 6.2.
5Ki Pebiga n den tabidi mi maalima bontabinka-taadila yaa yogunu, n den gbadi ke o bonfuoditaalo yedi: «Cua na!» N go den diidi ki laa o tanboano. Yua n jagi o den kubi u kpiagu bonbiigikaala. #Sak 6.2,6. 6N den gbadi u nialu a bonfuodinaada siiga ke u yedi: «Ŋalikama kiloyendo baa yaa tie dayenli tuonli yaa panpaani. Orje mo kilo bonbitaa baa yaa tie dayenli tuonli yaa panpaani. Ŋan da biidi mi kpama leni duven.»
7Ki Pebiga n den tabidi mi maalima bontabinka-naadila yaa yogunu, n den gbadi o bonfuodinaalo nialu ke o yedi: «Cua na!» 8N den diidi ki laa yaa taamo n bua ki yaa tie suudi yeni. Bi den yi yua n jagi o yeni mi “Kuuma”, ke bi tinkpiba diema ye o puoli. Bi den puni ba u paalu ki tinga kaannaadi kuli siiga kaanyendu, ban teni ki jugisiega, mi koncianma, u yianbiadipuodiko leni ki tinga fuayanbiaditi, n kpa likani yaaba.#Esk 14.21.
9Ki Pebiga n den tabidi mi maalima bontabinka-muudila yaa yogunu, n den laa ban den kodi yaa niba yaa naani, li padibinbinli tiipo. Bi den kpa ba kelima U Tienu maama leni ban den tieni yaa siedi kaa cedi yaa po. 10Bi den kpaani ki tua: «Canbaa yua n gagidi ki ŋani ki tie moamoandaano, hali u laa yogunu ke a go baa waagi, ki daa jia ti buudi leni ki tinga niba, ki guani ba bi panpaani ti soama po?» 11Bi den puni bi siiga yuakuli li liadipiencianli, ki waani ba ban da juuni waamu ki pugini, hali bi naacenlieba, bi kpiiba, ban baa kpa yaaba nani bani yeni, n pundi lan bili yaa coali bianu.
12N den laa ki Pebiga n tabidi mi maalima bontabinka-luobidila yaa yogunu. Diidi, mi tindigibicianma den tieni. U yienu den boandi nani li cabiboanli yeni, o ŋmaalo den moandi nani mi soama yeni. #Doa 11.13; 16.18; Esa 13.10; Jl 2.10; 3.4; 4.15; Mat 24.29; Mrk 13.24-25; Luk 21.25. 13A ŋmabila den baa ki tinga po nani ku faaciangu n figi bu kankanbu, ke a kankankaana suodi maama yeni. #Esa 34.4. 14Tanpoli den fuadi nani ban yen gbabi li tigbabikaali maama yeni. A juana kuli leni a kpendega kuli den ñani bi kaani ki fuadi. #Doa 16.20. 15Ki tinga nni badiba, a nikpiaga, bi toatieba yudanba, a piada, bi paatieba, i yonbi leni yaaba n die bi yula kuli den sani ki wuoni ti tanlondi nni leni a juana tanciama nni. #Esa 2.19,21. 16Bi den miadi a juana leni a tanciama ki tua: «Yua n kaa li bali kalikaanu leni ki Pebiga pabienli po, baa mani ti po, ki wuoni ti, #Ose 10.8; Luk 23.30. 17kelima bi pabienli dacianli pundi. Ŋme n baa fidi ki yaa ye?» #Jl 2.11; Mal 3.2.
Currently Selected:
Mi Doagidima 6: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
