Mi Doagidima 7
7
U Tienu niba
1Lani n pendi, n den laa malekinbinaa ke bi se ki tinga ñoakunnaadi kani. Bi den kubi ki tinga faciannaadi, ke yin da go figi ba waamu ki tinga po, mi ñincianma po leni tibuba kuli po. #Jer 49.36; Dan 7.2; Sak 6.5. 2N go den laa malekitoa ke o yugi ki ñani u yienu n pudi naanpo. O den kubi U Tienu yua n fo yaa maalima, ki kpaani ki maadi leni bi malekinaadiba, yaaba n den baa li bali ki baa waani ki tinga leni mi ñincianma fala, ki yedi: 3«Yin da sii ki tinga, mi ñincianma leni i tiidi, hali tin tabini U Tienu naacenba yutuna o maalima no.»#Esk 9.4-6. 4N den gbadi yaaba n baa mi maalima yeni coali n pundi yaa bianu. Isidayeli buoli kuli nni, bi den tabini kobiga n piinaa n niba tudanaa (144 000) po. 5Juda buolu nni, bi den tabini piiga n niba tudalie po, Rubeni buolu nni piiga n tudalie, Gadi buolu nni piiga n tudalie, 6Aseri buolu nni piiga n tudalie, Nefitali buolu nni piiga n tudalie, Manase buolu nni piiga n tudalie, 7Simeon buolu nni piiga n tudalie, Levi buolu nni piiga n tudalie, Isakari buolu nni piiga n tudalie, 8Sabuloni buolu nni piiga n tudalie, Josefi buolu nni piiga n tudalie, Benjamen buolu nni piiga n tudalie.
Yaa niligu n yabi boncianla
9Lani n pendi, n den laa yaa niligu n yabi hali ke oba kuli kan fidi ki coadi ba, bani, yaaba n ñani ŋanduna diema, i nibuoli leni i mabuoli kuli nni. Bi den se li bali kalikaanu leni ki Pebiga nintuali, ki la a liadipienciama ki muubi ti kpakpafaadi. 10Bi den kpaani ki tua:
«Ti Tienu yua n kaa
Li bali kalikaanu leni ki Pebiga,
N die mi tindima.»
11Malekinba kuli den se ki lindi li bali kalikaanu leni a nikpela leni a bonfuodinaada. Bi den baa ki labini li bali kalikaanu kani ki kpiagi U Tienu ki tua:
12«Amina!
Ti Tienu n die ti pagidi leni ti kpiagidi,
Mi yanfuoma leni i tuondi,
Ti jigidi, u paalu leni u fidu
Hali yaa yogunu kuli.
Amina!»
13A nikpela yeni siiga nni yendo den buali nni: «Yaaba n la a liadipienciama na tie ŋmenba? Bi ñani le?» 14N den guani ki yedi o: «Canbaa, fini n bani!» O den yedi nni: «Bi tie yaaba n ñani o falaciamo nni, bi ŋuudi bi liadiciama ki Pebiga soama nni, ki pendi a. #Dan 12.1; Mat 24.21; Mrk 13.19. 15Li tie lani yaa po ke bi ye U Tienu bali kalikaanu kani, ki kpiagidi o o diegu#7.15 Li baa fidi ki yaa maadi o kaangagidiŋamu maama. nni u yensiinu leni ku ñiagu kuli. Wani yua n kaa li bali kalikaanu baa kuani ba o gbandieli nni. 16Mi koma leni u ñuñuunu kan go cuo ba abada, u yienu kan go pua#7.16 Gbadi, yaa ka ñidi. Diidi Esayi 49.10. ba, ku tontongu mo kan go gbadi ba, 17kelima ki Pebiga, yua n ye li bali kalikaanu siiga baa yaa tie bi yankpaalo, ki gobidi ki caani ba li miali ñinbuna kani. U Tienu mo baa duuni ki ñani bi nunsiidi kuli bi nuni nni.» #Ps 23.1; Esk 34.23; Ps 23.2; Esa 49.10; 25.8.
Currently Selected:
Mi Doagidima 7: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
