Mi Doagidima 5
5
Ki Pebiga leni li tigbabikaali
1N go den laa ke yua n kaa li bali kalikaanu muubi li tigbabikaali o jienu, ke li diani li tugu nni leni li puoli kuli, ke bi tabini mi maalima bontabinkaala bonlilele.#Esk 2.9-10; Esa 29.11. 2N go den laa yaa maleki n pia u paalu ke o kpaani ki tua:
«Ŋme pundi ki tabidi mi maalima bontabinkaala, ki gbabidi li tili na?»
3Tanpoli po leni ki tinga nni leni ki tinga tiipo, oba kuli ki den fidi ki gbabidi li tili ki nuali lienni. 4N den buudi boncianla, kelima baa den laa oba kuli yua n pundi ki gbabidi li tili ki nuali lienni. 5Lani, a nikpela siiga yendo den yedi nni: «Ŋan da buudi. Diidi, yua n tie Juda buolu Yangbanlo, Davidi benkpeli yeni, koani mi jama ki paadi, ki baa fidi ki tabidi mi maalima bontabinka-leleedila, ki go gbabidi li tili yeni.» #Cil 49.9; Esa 11.1,10.
6Lani, n go den laa ki Pebiga, ke li naaninni ke bi kodi ga, ke ki se li bali kalikaanu kani, a bonfuodinaada leni a nikpela yeni siiga. O den pia yinalele leni nunilele yii n tie U Tienu fuoleleedima, wan soani yaama ki tinga nni kuli. #Esa 53.7; Sak 4.10. 7Ki Pebiga yeni den nagini ki gaa li tili yua n kaa li bali kalikaanu jienu nni.
8Wan den gaa li tili, a bonfuodinaada leni bi piilie n nikpenaadiba den gbaani wani ki Pebiga nintuali. Bi siiga yuakuli den muubi ku gogidigu leni wula tadibuomu ke mu gbie leni a dugibila, yaala n tie bi nigagidiŋanba jaandi. #Ps 141.2. 9Bi den yiini bu yanpanbu ki tua:
«A pundi ki gaa li tili ki tabidi mi maalima,
Kelima bi den kodi a,
Ke a daa bi niba U Tienu po leni a soama.
Lani, a faabi ba i buoli leni i mabuoli kuli nni,
Ki go faabi ba i nibuoli leni mi diema kuli siiga. #Ps 33.3; 98.1; Esa 42.10.
10A teni ke bi tua diema leni kopadicianba U Tienu po.
Bi baa yaa die ki tinga nni kuli.» #Ñam 19.6; Doa 1.6.
11N go den nuali ki gbadi malekinba boncianla niali, bani yaaba n lindi li bali kalikaanu leni a bonfuodinaada leni a nikpela. Bi coali den tie tuda piiga, taalima tuda piiga, hali a tuda tuda bam. #Dan 7.10. 12Bi den kpaani ki tua:
«Ban den kodi yaa Pebiga pundi ki baa
U paalu leni o ŋalimano,
Mi yanfuoma leni u fidu,
Ti jigidi, ti kpiagidi leni ti pagidi.»
13N go den gbadi ke mi tagima kuli, tanpoli po leni ki tinga nni, ki tinga tiipo leni mi ñincianma nni kuli yiini ki tua:
«Wani yua n kaa li bali kalikaanu
Leni ki Pebiga,
N yaa baadi ti pagidi leni ti jigidi,
Ti kpiagidi leni u paalu
Yaa yogu n tuu yaa yogu.»
14A bonfuodinaada den tua: «Amina!» A nikpela mo den gbaani ki kpiagi ba.
Currently Selected:
Mi Doagidima 5: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
