Mi Doagidima 22
22
Ŋalijani
1Lani, maleki yeni den waani nni li miali kpenciamu yuu n tie yengiyengi nani mi tanpenpelinma yeni, ke u ña U Tienu leni ki Pebiga bali kalikaanu kani. #Esk 47.1; Sak 14.8. 2U dogu fanma siiga leni u kpenciamu boanjaalieda po, yaa miali n kan gbeni tibu ye ki luoni piiga n taalimilie binli kuli, ŋmaali kuli yenma. Bu faadi baa yaa tie i nibuoli paagima po.#22.2 Gireki maama go fidi ki yedi ke laa tiidi baa luoni piiga n bonluonkabuolilie. Li maama ye Esekieli 47.12. 3U Tienu solindi kaa go ye. U Tienu leni ki Pebiga bali kalikaanu baa ye u dogu yeni niinni. O naacenba baa yaa kpiagidi o, #Sak 14.11. 4ki yaa nua o nunga, o yeli mo baa yaa taabi bi yutuna. 5Ku ñiagu kan go yaa ye. O naacenba kan go bua u yienu yenma, ki bagi ki fidisanga yaama, kelima o Diedo U Tienu baa yaa yendi ba. Bi baa yaa die hali yaa yogunu kuli. #Esa 60.19; Dan 7.18.
Jesu cuama
6Maleki yeni go den yedi nni: «Laa maama tie madugikaama, ki go tie moamoani. Li Miali Diedo U Tienu yua n puuni bi saawalipuaba o Fuoma, soani o maleki wan waani o naacenba yaa bonla n baa tieni tiladi ke li kan waagi.»
7O yedi: «Diidi, n cuama kan waagi. Li pamanli ye leni yua n tuo ki kubi li naa tili saawalipua-maama.»
8Mini Jan n den gbadi ki go laa laa bonla kuli. Min den gbadi ki laa la yaa yogunu, n den gbaani yaa maleki n waani nni la nintuali, ki baa kpiagi o. 9Ama o den yedi nni: «Fangi a yuli ki da tieni yeni! N tie a tuonsoanlielo leni a kpiiba bi saawalipuaba leni yaaba n tuo ki kubi yaa maama n ye li naa tili nni kuli yaa tuonsoanlielo. Kpiagi U Tienu!»
10Lani, maleki yeni den yedi nni: «Ŋan da wuoni li naa tili saawalipua-maama, kelima li yogunu kuli. 11Yua n naa tiegi, n suagi ki yaa tiendi yaala n ki tiegi. Yua n joagini, n suagi ki yaa joagindi o yuli. Yua n tiegi, n suagi ki yaa tiendi yaala n tiegi. Yua n gagidi ki ŋani, n suagi ki yaa gagidi ki ŋanbidi.» #Dan 12.10.
12Jesu yedi: «Diidi, n cuama kan go waagi. N baa cua leni n panpaani, ki pa yuakuli nani o tuona n tie maama. #Esa 40.10; 62.11; Ps 28.4; Jer 17.10. 13N tie Alifa leni Omega, o kpialo leni o juodika, mi cilima leni mi juodima. #Doa 1.8,17; 2.8; Esa 44.6; 48.12. 14Li pamanli ye leni yaaba n ŋuudi bi liada, ke ban baa ki yaa di li miali tibu bonluonkaala, ki go yaa tagi ki kua u dogu buliñoana kani. #Cil 2.9; 3.22. 15Ama i sangbanli, u ñoagubiadu danba, mi conconma buoli kuli danba, bi nikpaba, i buli danba, yaaba n bua mi faama ki go pua ma kuli, baa yaa ye niinpo.
16Mini Jesu den soani n maleki, ke wan doagidi yi po laa bonla kuli n Nitaana nni. N tie Davidi benkpeli leni o puoliŋuanu, ki go tie ki tiŋaaŋmabiga yaaga n yendi ki ñuliti.» #Esa 11.1,10.
17Mi Fuoma leni o Puocaano kuli yedi: «Cua na!» Yua n gba kuli moko n yedi: «Cua na!» U ñuñuunu n pia yua kuli, n cua. Yua n bua kuli n cua, ki yaa ñu li miali ñima, ke panpaani ki ye. #Esa 55.1.
Mi majuodikaama
18N tuodi ki waani yua n gbadi li naa tili saawalipua-maama kuli line: «O nilo yaa pugini lipo bonliba, U Tienu baa pugini o panpaani po yaa falabiadi n diani li naa tili nni. #Tia 4.2. 19O nilo yaa ñani bonliba li naa tili saawalipua-maama nni, U Tienu baa ñani o biinu li miali tibu leni u dogagidiŋamu nni, ban maadi yaala yaa maama li naa tili nni.»
20Yua n saa i moamoani yaa bonla n tie ne po yedi: «Yeni de! N cuama kan waagi.»
Amina, ŋan cua, o Diedo Jesu!
21O Diedo Jesu yaa ŋanbili n yaa ye leni yikuli.
Currently Selected:
Mi Doagidima 22: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
