Mi Doagidima 21
21
O tanpopaano leni ki tinpanga
1N den laa o tanpopaano leni ki tinpanga, kelima o tanpokpialo leni ki tinkpiaga kuli den bodi, mi ñincianma moko ki go den ye. #Esa 65.17; 66.22; 2Pie 3.13. 2N den laa u dogagidiŋamu, Jerusalemi-paano, ke u ñani U Tienu kani tanpoli po, ki ji. U den bogidi uba, ki bobi nani o puocaano n baa tieni o calo po maama. #Esa 52.1; 61.10; Doa 3.12. 3N den gbadi u nialiciamu ke u maadi li bali kalikaanu kani, ki yedi: «Diidi ki le, moala U Tienu yekaanu ye bi nisaaliba siiga. O baa yaa ye leni ba, bi baa yaa tie o buolu, wani U Tienu oba mo baa yaa ye leni ba, ki tie bi Tienu. #Esk 37.27; Lev 26.11-12. 4O baa duuni ki ñani ti nunsiidi kuli bi nuni nni. Mi kuuma kan go yaa ye, li paboanli, a bubula leni mi funfunma moko kan go yaa ye, kelima li bonkpiala pendi.» #Esa 25.8; 35.10; 65.19.
5Yua n den kaa li bali kalikaanu den yedi: «Diidi ki le, n teni ke li bonla kuli kpandi bonpanla.» O go den yedi: «Ŋan diani laa maama, kelima mi tie moamoani ki go tie madugikaama.» 6O go den yedi nni: «Li gbeni! N tie Alifa leni Omega, mi cilima leni mi juodima. U ñuñuunu n pia yua kuli, n baa pa o wan ño li miali ñinbunli kani, ki kan pa liba kuli. #Esa 55.1. 7Yua n koani mi jama ki paadi baa baa laa seli kuli. N baa yaa tie o Tienu, omo baa yaa tie n biga. #2Sam 7.14; Ps 89.27-28. 8Ama bi jawaandanba, yaaba n ki daani, ti cagindi danba, bi nikpaba, mi conconma buoli kuli danba, u ñoagubiadu danba, i buli danba leni yaaba n pua mi faama kuli, bikuli yekaanu baa yaa tie u mu leni li cidibili n co yaa kpenu nni. Lani n tie mi kuliema.»
O Jerusalemi-paano
9Lani, yaa malekileleediba n den kubi yaa tadibuo-leleedimu n gbie leni i falabiadi-leleedi-juodike siiga nni yendo den cua n kani ki maadi leni nni, ki yedi: «Cua na! N baa waani a o puocaano, yua n tie ki Pebiga pua.» 10U Tienu Fuoma den cuo nni, ke maleki den gedini nni yaa joacianli n kpedi yuli po.
O den waani nni u dogagidiŋamu Jerusalemi, ke u ñani U Tienu kani tanpoli po, ki ji. #Esk 40.2. 11U den pia U Tienu kpiagidi, ki ñuliti nani jasipe tanli yaali yaa dunga n pa, ki tie nani mi tanpenpelinma yeni. 12U bilinciamu den pia, ki go kpedi, ki lindi ki cebini u. U den pia piiga n buliñoajalalie, ke piiga n malekinbilie se a buliñoajala yeni kani. Isidayeli piiga n buoliedi yela den taabi a buliñoajala yeni po. #Esk 48.30-35. 13Puoli po pia buliñoajalataa, jienu po buliñoajalataa, ganu po buliñoajalataa, nintuali po mo buliñoajalataa. 14U dogu bilinciamu yeni den pia piiga n tanpuunalie, ke ki Pebiga piiga n tondiliediba yela taabi a po.
15Yaa maleki n den maadi leni nni yeni den kubi wula bonbiigikaala, yaala n tie nani li kankagili yeni, ki baa biigi u dogu, u buliñoajala leni u bilinciamu. #Esk 40.3. 16U dogu yeni kaannaadi den da. U foaginu leni u pianu kuli den da. Maleki den biigi u leni li bonbiigikaala, ki sua ke u foaginu tie piiga n tudalie, ke u pianu leni u kpedima kuli da yeni. 17O den biigi u bilinciamu ki sua ke u pianu#21.17 Li baa yaa tie u pianu, yaa ka u kpedima. tie kobiga n piinaa n nukpandunanaa. Maleki den biigi nani bi nisaaliba n biigidi maama yeni.
18U bilinciamu yeni den maa leni jasipe tana, ke u dogu uba mo maa leni yaa wula n ŋani cain, ki tie nani ki madiidiga yeni. #Esa 54.11-12. 19Bi den tieni u dogu bilinciamu tanpuuna, yaa tana n pia mayuli boncianla. Bi den tieni li tanpuukpiali jasipe, li tanpuulieli safiri, li tanpuutaali kaliseduani, li tanpuunaali emerodi, 20li tanpuumuuli sariduani, li tanpuuluobili korinalini, li tanpuuleleeli kilisoliti, li tanpuuniili berili, li tanpuuyiali topasi, ki tanpuupiiga kilisopasi, li piiga n tanpuuyenli iyasinta, li piiga n tanpuulieli ametisi. 21A piiga n buliñoajalieda den tie piiga n perilinbilie, buliñoajabu kuli den maa leni periliyendo bebe. U dogu yeni fanma den tie yaa wula n ŋani, ki tie nani ki madiidiga yeni.
22Mii den laa U Tienu diegu#21.22 U Tienu diegu: Yaa ka, o kaangagidiŋamu. lienni, kelima wani o Diedo U Tienu u Paaciamu Kuli Daano leni ki Pebiga n tie u kaangagidiŋamu. 23U dogu yeni kaa bua yienu ki bagi ŋmaalo, kelima U Tienu kpiagidi baa yendi u, ki Pebiga moko tie u fidisanga. #Esa 60.19-20. 24I nibuoli kuli baa yaa cuoni u yenma nni, ki tinga badicianba baa yaa kpendinni upo bi kpiagidi. #Esa 60.3-5. 25U dogu yeni buliñoajala baa yaa yaa yogunu kuli, ki kan yaa luondi, kelima ku ñiagu kan yaa ye. #Esa 60.11. 26Bi baa yaa kpendinni u niinni i nibuoli kpiagidi leni i jigidi. 27Joagindiba kuli kan baa ki kua u niinni. Yua n tiendi ti cagindi leni yua n pua mi faama kan kua u niinni, kali yaaba yaa yela n diani li miali tili nni, lini yaali n tie ki Pebiga tili. Bani bebe n baa baa ki kua u niinni. #Esa 52.1; Esk 44.9.
Currently Selected:
Mi Doagidima 21: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
