Mi Doagidima 14
14
Bonlekatoala
14—15
Ki Pebiga n daa ki faabi yaaba yanbu
1N den diidi ki laa ke ki Pebiga se yaa juali n yi Siyon po, ke kobiga n piinaa n niba tudanaa (144 000) se leni o. Bi den tie yaaba n den pia ki Pebiga yeli leni o Baa yeli bi yutuna po. #Esk 9.4; Doa 7.3. 2N go den gbadi ku fuugu ke ku ñani tanpoli po ki tie nani a ñingola fuugu leni u tatantanpaalu fuugu, ki go tie nani bi gogidipuaba n pua ki tiendi yaa fuugu yeni. 3Bi den yiini bu yanpanbu li bali kalikaanu nintuali, a bonfuodinaada leni a nikpela nintuali. Oba kuli ki den fidi ki bandi bu yanpanbu yeni, kali bani, i kobiga n piinaadi n tudinaadi, ban den daa ki faabi yaaba ki tinga nni. 4Bani n tie yaaba n kaa den joagini bi yula leni bi puoba, ki tie nani a puowandiana yeni. Bi baa yaa ŋua ki Pebiga wan caa naani kuli. Bi tie wan daa yaaba bi niba kuli siiga, ke bi tie nani li bonluonkakpiala yeni U Tienu po leni ki Pebiga po. 5Faamiba kuli ki den ye bi ñoana nni, baa pia ban baa fidi ki kuli ba leni yaala.#Sof 3.13.
Bi malekitaadiba
6N go den laa malekitoa ke o yugi tanpoli mi fawaama nni. O den kubi yaa laabaaliŋamo n ye hali yaa yogunu kuli, ki baa yaa wangi ki tinga yaaba kuli, mi diema, i mabuoli leni i nibuoli yaaba kuli. 7O den kpaani leni u nialu, ki tua: «Yin fangi mani U Tienu ki kpiagi o, kelima o bujiali yogunu pundi. Yin gbaani ki kpiagi wani yua n den tagi tanpoli, ki tinga, mi ñincianma leni a ñinbuna kuli.»
8Malekitoa, o bonlielo den ŋoadi o ki yedi: «U baa, u dociamu Babilonni baa, wuni, yaa dogu n den teni ke i nibuoli kuli ñuni yaa duven n tie u conconbiadima ki gaadi!» #Esa 21.9; Jer 51.8; Doa 18.2.
9Malekitoa, o bontaalo den ŋoadi ba ki kpaani: «Yaa nilo n gbaani ki kpiagi ki fuayanga leni o nannanli, ki gaa o maalima o yutunli yaa ka o jienu po, 10omoko baa ño yaa duven n tie U Tienu pabienli cuonu. Laa duven ki laa leni liba, ama bi kuodi o U Tienu pabienli cuonu tadiñokaaga nni. O baa yaa laadi fala u mu leni li cidibili nni, bi maleki gagidiŋanba nintuali leni ki Pebiga nintuali. #Esa 51.17; Cil 19.24; Esk 38.22. 11Bi funfunma muñii baa yaa do hali yaa yogunu kuli. Bi kan baa fuodima u yensiinu leni ku ñiagu kuli, bani yaaba n gbaani ki kpiagi ki fuayanga leni o nannanli, ki go gaa o yeli maalima yeni.» #Esa 34.10.
12Lani yaa po yo, ke li pundi bi nigagidiŋanba n yaa pia li juunli, bani yaaba n tuo ki ŋua U Tienu mabilikaama, ki kubi li dandanli Jesu po.
13N den gbadi ke u nialu maadi tanpoli ki yedi: «Diani yaa maama n tie ne: ‹Li pamanli ye leni yaaba n kpe leni li dandanli o Diedo nni.› » U Tienu Fuoma Yua den guani ki yedi: «Yeni de! Bi baa fuodi leni bi tuonfala, kelima bi tuonŋama ŋua ba.»
U Tienu jetaagu yogunu pundi
14N den diidi ki laa ku tawapiengu ke yua n naani leni o nisaalo kaa ku po. O den ciibi wula badifogiliga, ki muubi ku moaciemangu o nuu nni. #Dan 7.13. 15Malekitoa den ñani U Tienu diegu nni, ki kpaani ki yedi yua n kaa ku tawaligu po yeni: «Taa a moaciegu ki ce, kelima li yogunu pundi, ki tinga kpaandi mo beni.»#14.15 Yaa bonlekaala n tie ne niinni bi nua ki tinga yaaba kuli tie nani i muuli kpaandi leni duventiidi kpaandi yeni. Diidi Joeli 4.13. 16Yua n den kaa ku tawaligu po, den taa o moaciegu ki ceni ki taani ki tinga kpaandi.
17Malekitoa den ñani U Tienu dieli yaali n ye tanpoli po niinni ki moko muubi ku moaciemangu. 18Malekitoa, yua n die li padibinbinli mu moko den ñani likani ki kpaani ki yedi yua n muubi ku moaciemangu: «Taa a moaciemangu ki ce ki tinga duven tiidi bonjoana kelima yi beni.» 19Maleki den ceni ki tinga duven tiidi bonjoana, ki kuodi duven ŋanbikaanu nni, lani n tie yaa ŋanbikaanu n pia U Tienu pabienli. 20Bi den ŋmaadi ti bonfiidi duven ŋanbikaanu nni u dogu kunu. Mi soama den ña u kani, ki kpedi ki pundi hali i taami biamu kani. Mi den puubi ki pundi nani dajena kobitaa.#14.20 Likani li maadi ki yedi bonbiigikaala tudili n kobiluoba (1 600) u foaginu po. Tii bani laa bonbiigikaala buolu. #Esa 63.3; Jbu 1.15; Doa 19.15.
Currently Selected:
Mi Doagidima 14: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
