Mi Coadima 16
16
Kore yiema
1Levi buolu yua yendo den ye ki yi Kore, ki tie Kehati buolu, Yitisehari bijua. O den ye leni Rubeni buolu nibitaa, lani n tie Eliabi bijaba Datan, Abirami leni Peleti bijua Oni. #Jud 11. 2Bi den fiini mi yiema Musa po. Isidayeli yaaba yudanba siiga, niba kobilie n piimuu, yaaba n den tie nikpiaga ki caa a taana, mo den ŋoadi bi puoli. 3Bi den taani ki gaani ki cebini Musa leni Alono, ki yedi ba: «Moamoani, yi ji pendi u bianu! Isidayeli yaaba nitaanli kuli tie yaaba n gagidi ki ŋani, ke o Diedo mo ye bi siiga. Be yaa po ke yi fiini yi baa, ki baa diedi o Diedo nitaanli kuli?»
4Musa n den gbadi lani, o den labini leni li paboanli. 5O den maadi leni Kore leni o cagili yaaba kuli, ki yedi: «Saala tiŋaagu, o Diedo baa doagidi, ki waani yua n tie o yua leni yua n gagidi ki ŋani. Lani, o baa teni wan nagini o. Wan baa gandi yua kuli, o den baa cedi wani yo n nagini o kani. 6Tieni mani nanda. Kore, fini leni a cagili kuli n taa mi fantama tiadi. 7Saala, yin tieni lienni u mu, ki go tieni lienni tulale, ki sedi o Diedo nintuali. O Diedo n gandi yaa nilo yeni, wani n baa yaa tie yua n gagidi ki ŋani. Yinba Levi buolu, yinba n ji pendi u bianu!»
8Musa den yedi Kore: «Cengi mani, yinba Levi buolu! 9U Tienu gandi yi Isidayeli yaaba siiga, ki nagini yi o baa kani, ke yi tuuni li gbandieli nni, ki go cedi ke yi ye Isidayeli yaaba nitaanli kani ki todi ba. Naani lani kuli daa dagidi yi? 10U Tienu tuo ke fini Kore leni a kpiiba Levi buolu nagini o kani, ke yi go bua ki gaa li kopadiciantuonli. 11Lani n teni ke yi fiini mi yiema o Diedo po, kelima Alono mo nan tie ŋme yo, hali ke yi baa yaa yenbidi o po?»
12Musa den soani ke bi yini Eliabi bijaba, Datan leni Abirami. Ama bi den yedi: «Tii kpendi! 13A ñani ti mi naaŋanma leni ti siadi n dua naani, ki cuani ti mi fanpienma ne niinni, ki baa kpa ti. Li daa dagidi a? A bua ki diedi te! 14Laa tie ke a bua ki kuani ti mi naaŋanma leni ti siadi n dua yaa diema nni ka. A kan boagidi ti i kuani leni duven tiidi kuani ka, lan tua ti faali. A tama ke bi naa niba tie juama yo? Tii kpendi!» 15Musa pali den beni boncianla, ke o den yedi o Diedo: «Da gaa ban padi yaa padili yeni paabu. Mii gaa bi kani ba ŋunbo, mii didi go tieni bi siiga oba kuli biadima.»
Kore leni o cagili panpaani
16Musa den yedi Kore: «Saala, fini leni a cagili yaaba n den taani o Diedo nintuali leni Alono. 17Yi siiga yuakuli n den taa o fantantiagu ki tieni lienni tulale, ki cua o Diedo nintuali, yuakuli leni o fantantiagu. Li baa yaa tie kobilie n fantantiadi piimuu. Fini leni Alono moko, den baa yaa kubi yuakuli o fantantiagu.»
18Bi den taa yuakuli o fantantiagu, ki tieni lienni u mu leni tulale, ki cua ki sedi u Kadikaanu Gbandieli buliñoabu kani, ki taani Musa leni Alono. 19Kore den taani o cagili yaaba kuli, ki fii Musa leni Alono po, u Kadikaanu Gbandieli buliñoabu kani. Lani, o Diedo kpiagidi den doagidi li nitaanli kuli po.
20O Diedo den maadi Musa leni Alono, ki yedi: 21«Paadi mani ki ña yaa nitaanli n tie ne siiga, ke n baa bolini ba yenma.» 22Musa leni Alono den labini bi nunmu po, ki yedi: «Fini U Tienu, U Tienu yua n puuni yaala n fo kuli li miali. Naani a baa fiini a pali li nitaanli kuli po, niyendo yaa tuonbiadi po?»
23O Diedo den maadi leni Musa, ki yedi: 24«Maadi leni li nitaanli ki yedi: Sani ki foagidi mani leni Kore, Datan leni Abirami n ye yaa kaanu.»
25Musa den fii ki teli Kore, Datan leni Abirami po, ke Isidayeli nitaanli mo ŋoadi o puoli. 26O den maadi leni li nitaanli, ki yedi: «Foagidi mani leni laa nibiadiba gbandiena. Ban die yaala mo kuli, yin da sii la, ke yimoko n da ti kpe kelima bi tuonbiadi po.»
27Bi niba den sani ki foagidi leni Kore, Datan leni Abirami n ye naani.
Datan leni Abirami den ñani, ki sedi bi gbandiena buliñoana kani, bani leni bi puoba, bi bila leni bi yaabila kuli.
28Musa den yedi: «Line n baa teni yin bandi ke o Diedo n soani nni, ke min tiendi yaa bonla kuli, mii tiendi la leni n yaa paalu ka. 29Yaa niba n tie ne, yaa kpe nani bi niba kuli n ku yaa kuuma, bi yaa baa, nani bi niba kuli n baadi yaa panpaani, laa tie o Diedo wani ka soani nni. 30Ama o Diedo yaa tieni bonlidinkaala, o yaa teni ke ki tinga yaadi ki ñoabu ki nali ba leni bi bonpiakaala kuli, ke bi jiidi bi tinkpiba yekaanu nni, ki fo, yi baa bandi ke bi naa niba fali o Diedo.»
31Musa n den li maadi ki gbeni laa maama yaa yogunu yo, ke Datan leni Abirami n den se yaa kaanu, den pudi ki yagidi. 32Ki tinga den yaadi ki ñoabu ki bolini ba, bani, bi diedi leni Kore niba leni bi bonpiakaala kuli. 33Bi den jiidi bi tinkpiba yekaanu ki fo, bani leni bi bonpiakaala kuli. Ki tinga den guani ki mundi ba, ke bi bodi ki ñani li nitaanli siiga. 34Isidayeli yaaba, yaaba n den se ki lindi ba, n den gbadi bi bubuumu, bi den sani, kelima bi den jie ki tinga n da bolini bani moko! 35U mu den ñani o Diedo kani, ki buoni, kobilie n niba piimuu yaaba n den se ki kubi tulale yeni.
Currently Selected:
Mi Coadima 16: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
