Mi Coadima 15

Mi pienma, mi kpama leni li bonñokaala pada

1O Diedo den maadi leni Musa, ki yedi, ke wan 2maadi leni Isidayeli yaaba, ki yedi ba: «Yi yaa ban kua ki kali min puni yi yaa diema yeni niinni yaa yogunu, 3yi baa yaa padi o Diedo po, ban yen juugi yaa pada u mu nni: lan tie padijuukaali, ñoanianu padili, yanbuama paabu padili, bi jaanma dana pada. Yi baa padi i ne leni ti yanbidi, lan tua yaa nuulu n mani o Diedo po. 4Yua n baa cuani o paabu o Diedo po, baa taani ki cuani leni o padiyanga yeni, mi yoma kilo bonbitaa, yaama n kali leni mi kpama litidiyendo leni boagidima. 5Yua n baa padi, padijuukaali bi paditoali, baa cuani duven litidiyendo leni boagidima, pebiga kuli po. 6Li petonli mo yaa po, o baa cuani mi yoma kilo bonbiluoba, yaama n kali leni mi kpama litidi bonbilie 7leni yaala n baa cabi po, duven litidi bonbilie. A baa padi la, lan tua yaa nuulu n mani o Diedo po. 8Li yaa tie naatonli, ke a padi o Diedo po, ke lin tua padijuukaali, bi ñoanianu kuanma padili bi taanyenma padili. 9Bi baa cuani li naatonli yeni leni mi yoma kilo bonbiyia, yaama n kali leni mi kpama litidi bonbitaa 10leni yaala n baa cabi po duven litidi bonbitaa. Li tie u mu n buoni yaa padili, ke li nuulu mani o Diedo po.

11Yi yen baa tieni yene, yi yaa cuani naatonli, petonli, pebiga bi ŋuabiga. 12Yin padi yaa yandi coali n yabi ki da maama kuli, yi baa tieni yene. 13Yi yaa baa padi yaa padili n juu u mu nni yaa yogunu kuli, ke li nuulu mani o Diedo po, yi yen baa tieni yene. 14Yaa nilamo n cua cangu, bi yua n kaa yi siiga, yaa bua ki padi yaa padili n juu u mu nni, ke li nuulu mani o Diedo po, omoko baa tieni nani yinba yene. 15Laa mabilikaama tie yenme, li nitaanli leni bi nilanba yaaba n ye yi siiga kuli po. Li baa yaa tie yaa mabilikaama n ye yaa yogu n tuu yaa yogu, yi nifiima kuli po. Lan baa yaa tie bi nilanba po maama, li baa yaa tie yimoko yaa po yene, o Diedo nintuali. 16Bali mayenma leni ñoamabonbilikayenli n baa yaa ye, yinba leni yaa nilanba n kaa yi siiga kuli po.» #Lev 24.22.

Li bonluonkakpiala mabilikaama

17O Diedo den maadi leni Musa, ki yedi, ke wan 18maadi leni Isidayeli yaaba, ki yedi ba: «Yi yaa ban kua min caani yi yaa diema yeni niinni, ki dini mi diema yeni jiema, 19yin ñani bu paabu o Diedo po. 20Yi baa ñani lalaayengu, yin cili ki buuni yaa yonkpiama nni. Yi baa ñani, nani yin yen ñani yi kpaandi, yi jali nni maama yeni. 21Yi baa ñani ki pa o Diedo, yin cili ki buuni yi yonkpiama yaama yeni kani. Lan yaa tie yeni, yaa nifiima n baa ŋoadi yi kuli po.

O nilo yaa tieni ti tuonbiadi kaa bani yaa pada

22Yi yaa tieni ti tuonbiadi kaa bani, kaa ŋoadi o Diedo n den teni Musa yaa bali maama, 23ki cili hali wan den teni yi ma yaa daali, ki pundi hali yi puoliŋuani. 24Ti tuonbiadi yeni, yàá tieni leni yanbuama, ke li nitaanli kuli bandi, li nitaanli kuli baa padi naatonbili, yaa padijuukaali yaa nuulu n mani o Diedo po. Bi baa padi li leni li paabu leni li ñincabili. Nani lan bili maama, li nitaanli yeni baa padi ŋuabuali ti tuonbiadi sugili miabu po. 25O kopadiciamo baa mia Isidayeli yaaba nitaanli kuli po, bi tuonbiadi sugili. Lani, bi baa baa sugili, kelima li tie yaa tuonbiadi ke bi tieni kaa bani. Bi go baa baa sugili, kelima bi cuani li padili, yaala n juu u mu nni, o Diedo po. Bi go baa baa sugili, kelima bi cuani ki padiyanga ti tuonbiadi sugili miabu po, ban tieni yaa tuonbiadi kaa bani yeni po. 26Isidayeli yaaba nitaanli leni yaa nilanba n kaa bi siiga kuli baa baa sugili, kelima li tie ban tieni yaa tuonbiadi kaa bani.

27Niyendo n yaa tieni ti tuonbiadi kaa bani, o baa cuani ŋuasalo yua n pia binli, ki padi ti tuonbiadi sugili miabu padili. #Lev 4.27-31. 28O kopadiciamo baa padi ki mia yua n tieni ti tuonbiadi kaa bani yeni po sugili o Diedo nintuali. O yaa padi ki mia o po sugili, o baa baa sugili. 29Li yaa tie ke nilo tieni ti tuonbiadi kaa bani, bali mayenma n baa yaa ye yua n tie Isidayeli yua leni yaa nilamo n kaa yi siiga po.

30Ama li yaa tie ke yinba Isidayeli yaaba siiga yendo, bi yaa nilanba n ye yi siiga nni, yendo yaa jagi o yama nni ki tieni tuonbiadi, o sugi o Diedo. Yin ñani laa nilo yi siiga. 31O baa tugi o tuonbiadi panpaani, ban ñani o o buolu siiga, kelima o fali ki go miidi o Diedo bali maama.»

O joa miidi mi fuodima daali bali maama

32Isidayeli yaaba n den ye mi fanpienma nni yaa yogunu, bi den pigini o joa, ke o kpaagi ti daadi U Tienu fuodima daali. 33Yaaba n den pigini o ke o kpaagi ti daadi, den gedini o Musa, Alono leni li nitaanli kuli kani. 34Bi den guu o bonŋanla, kelima li daa den doagidi ban baa tieni o yaala. 35O Diedo den yedi Musa:

«Yi baa kpa laa nilo. Li nitaanli kuli baa ñani o li nagili nni, ki lugidi o a tana.» 36Li nitaanli kuli den ñani o li nagili nni, ki lugidi o a tana ke o kpe nani o Diedo n den puogi Musa maama.

Ti liadicuadi

37O Diedo den yedi Musa: 38«Maadi leni Isidayeli yaaba, ki yedi ke nifiima kuli n tieni ti muucuadi bi tiayiekaadi ñoakuni. Ban tieni ti muucuadi yeni kani, yaa gaalu n moani ki suudi. #Tia 22.12. 39Yi baa yaa yie yaa tiayiekaadi n pia ti muucuadi. Yi baa yaa diidi ti muucuadi yeni, ki tiadi mini o Diedo ñoamabona kuli po, ki yaa kubi a. Yeni n tie yin da ti ŋoadi yi pala leni yi nuni bonbuakaala, yaala n baa ti yaani yi, ki teni yin ŋoadi bontoala. 40Yeni, yi baa yaa tiani n ñoamabona kuli po, ki yaa kubi a. Yi baa yaa tie yaaba n gagidi, ki ŋani yi Tienu po. 41N tie Li Miali Diedo yi Tienu, yua n ñani yi Ejipiti, ki baa yaa tie yi Tienu. N tie Li Miali Diedo yi Tienu.»

Currently Selected:

Mi Coadima 15: BGP

Highlight

Copy

Compare