Marki 2
2
Jesu paagi yaa joa yaa gbanandi n kpe
(Mat 9.1-8; Luk 5.17-26)
1Lan den tieni danaba, Jesu den guani Kafarnawum. Bi niba n den gbadi ke o guani deni,#2.1 Li naani ke li den tie Simon yaa deni. Diidi 1.29. 2bi den taani o kani boncianla, hali ke u kaanu ki go den ye ba bu buliñoabu kani. O den wangi ba U Tienu maama. 3Bi niba den cuani o kani yua yaa gbanandi n kpe, ke nibinaa tugi o. 4Nani ban kan den fidi ki pundi Jesu kani kelima bi niba yabinu po yeni, bi den doni wan ye yaa doangu nni yuli po, ki cibi yaa bonli n yabi, ki jiini o yiamo leni wan dua yaa kaagu kuli. 5Jesu n den laa bi dandanli, o den yedi yua yaa gbanandi n kpe yeni: «N bijua, a baa a tuonbiadi sugili.» 6Li bali maama banda bi tianba den kaa likani ki bungi bi pala nni ki tua: 7«Be n teni ke one maadi nanda? O sugidi U Tienu. U Tienu bebe yaa ka, ŋme n baa fidi ki pa bi niba bi tuonbiadi sugili?» 8Lanyogunu Jesu den bandi o pali nni, ban bungi yaala ki buali ba: «Be n teni ke yi bungi yi pala nni yeni? 9Be n dingi ki cie, ki yedi yua yaa gbanandi n kpe: ‹A baa a tuonbiadi sugili,› bi: ‹Fii ki taa a kaagu ki yaa cuone?› 10N bua ki doagidi yi po ke o Joa Bijua pia li bali ŋanduna nni ki baa fidi ki pa bi niba bi tuonbiadi sugili.» 11Lani, o den yedi yua yaa gbanandi n kpe yeni: «N yedi a, fii ki taa a kaagu ki yaa kuni.» 12O den fii ki taa o kaagu lanyogunu, ki ban ña ke bikuli nua. Li den paki bikuli ke bi kpiagidi U Tienu ki tua: «Ti daa bi laa yaa bonla n tie ne buolu.»
Jesu yini Levi ke o ŋoadi o
(Mat 9.9-13; Luk 5.27-32)
13Jesu go den ñani ki baali Galile ñincianma. Ku niligu kuli den kpendi o kani ke o bangi ba U Tienu maama. 14Wan den suagi liiga, o den laa Alife bijua Levi#2.14 Levi yelieli n tie Matie. Diidi Matie 9.9. ke o ka o tuonli kani, ki gaani li lubili. O den yedi o: «Ŋoadi nni.» Levi den fii ki ŋoadi o. 15Li yaa puoli, Jesu n den kaa Levi diegu nni ki di leni o, bi lubigaaba leni i tagibiadi danba#2.15 Tagibiadi danba: Tagibiadi danba tie yaaba n naa den kubi Jufinba bali maama, ama ki den puni bi yula li suuli leni li yaa bonbuolu kuli po. kuli den cua boncianla ki taani leni o ŋoadikaaba, ki kaa ki di leni Jesu. Laa niba siiga, niba boncianla den ŋoadi Jesu. 16Li bali maama banda yaaba n tie Farisieninba n den laa ke Jesu di leni bi lubigaaba leni i tagibiadi danba, bi den yedi o ŋoadikaaba: «Be yaa po ke o di ki go ñu leni bi lubigaaba leni i tagibiadi danba?» 17Jesu n den gbadi, o den yedi ba: «Yaaba n pia laafia ka bua lotoli, ama yaaba n yia. Mii cua ki baa yini yaaba n tiegi ka, ama ti tuonbiadi danba.»
Mi ñoalolima maama leni kpanjatoama
(Mat 9.14-17; Luk 5.33-39)
18Jan ŋoadikaaba leni Farisieninba den luo bu ñoabu. Bi niba den cua Jesu kani ki buali o: «Be yaa po ke Jan ŋoadikaaba leni Farisieninba yaaba yen luo bu ñoabu, ke a yaa ŋoadikaaba wani naa luo?» 19Jesu den guani ki yedi ba: «O puocaano calo danlinba baa gaa lede ki loli bu ñoabu, o puocaano calo n da ye leni ba yaa yogunu? Li kan tuo, kelima o puocaano calo da yaa ye leni ba li puocaali nni, bi kan fidi ki loli bu ñoabu. 20Ama u yogunu kpendi, ke bi niba baa cuo o puocaano calo ki ñani o bi siiga. Lanyogunu, bi baa loli bu ñoabu. 21Niloba mo kan taa cabipanli ki biini li liadikpeli, kelima li cabipanli baa toli ki dadi ki padi li bonkpeli, lan padi ki pugini. 22Niloba mo kan didi taa o duvenpaano ki piagi ti dayuakpedi nni. O yaa tieni yeni, o duvenpaano baa pudi ki padi ti dayuakpedi, duven baa bia, ti dayuadi mo n biidi. Ama kali ban piagi duvenpaano ti dayuapandi nni.»
O Joa Bijua n die mi fuodima daali
(Mat 12.1-8; Luk 6.1-5)
23Dayenli, U Tienu fuodima daali, Jesu leni o ŋoadikaaba den tagi ki poandi ŋalikama kuani nni. O ŋoadikaaba den cuoni ki jobidi ŋalikama siandi. #Tia 23.26. 24Farisieninba den yedi Jesu: «Diidi ki le, be n teni ke bi tiendi yaala n kua mi fuodima daali?» 25O den guani ki yedi ba: «Naani yii cogi Davidi n den tieni yaala wan den luo li bonjekaala, ke mi koma cuo o, wani leni yaaba n den ye leni o kuli? #1Sam 21.2-7. 26Li yogunu sua ke Abiatari den tie bi kopadicianba bado, Davidi den kua U Tienu diegu nni, ki ŋmani ban den gagidi yaa dupen U Tienu po, ba ke li kua nitoa n ŋmani dupen yeni, li yàá tie bi kopadicianba yaa ka. Davidi den taa ki ŋmani, ki teni yaaba n yegi leni o moko, ke bi ŋmani.» #Lev 24.9. 27Lani, Jesu den yedi ba: «U Tienu den bili mi fuodima daali bi niba todima po yo. Waa den tagi bi niba mi fuodima daali po ka. 28Lanwani, o Joa Bijua n die ba mi fuodima daali.»
Currently Selected:
Marki 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
