Marki 1

Jesu tuonli Galile diema nni

1—9

Jan Batisi mawangima

(Mat 3.1-12; Luk 3.1-18; Jan 1.19-28)

1U Tienu Bijua Jesu Kilisiti Laabaaliŋamo cilima.

2Nani lan diani maama o saawalipualo Esayi tili nni:

«Cengi, n soani n tondo a liiga,

Ke wan bogini a sanu. #Mal 3.1.

3Li tie yua n kpaani mi fanpienma nni ki tua:

‹Yin bogini mani o Diedo sanu,

Ki naadi mani o sani.› » #Esa 40.3.

4Lani n tie Jan yua n den cua ki batisi bi niba mi fanpienma nni, ki wangi ba yaa maama n tie ne: «Yin lebidi yi pala ki cua min batisi yi. Yeni, U Tienu baa pa yi sugili yi tuonbiadi po.» 5Jude diema yaaba leni Jerusalemi dogu yaaba boncianla den kpendi Jan kani. Bi den tuodi ki doagidi bi tuonbiadi, ke Jan batisi ba Jurden kpenu nni.

6Jan den la ti yuoyuokobidi tiadi#1.6 Li tie yaa tiadi n naa pia kpiagidiba kuli. Diidi Bi Badiba Tilieli 1.8., ki ñaagi ku gbanñagidigu, ki di i naaci leni ku muagu nni siadi. 7O den wangi yaa maama n tie ne: «Toa ŋua n puoli ki pia u paalu ki cie nni. Mii pundi ba yua n baa gbaani ki lodi o cacaadi. 8Mini, n batisi yi leni mi ñima, ama wani n baa batisi yi leni U Tienu Fuoma Yua.»

Jan batisi Jesu

(Mat 3.13-17; Luk 3.21-22)

9Lanyogunu Jesu den ñani Nasareti Galile diema nni, ki cua Jan kani ke o den batisi o Jurden kpenu nni. 10Jesu n den ña mi ñima nni yaa yogunu, o den laa ke tanpoli luodi, ke U Tienu Fuoma Yua ñani lipo ki ji nani ki kpaajiega yeni, ki ti jagini o po. 11Bi den gbadi ke u nialu maadi tanpoli po ki yedi: «A tie n Bibuadiga, n pali mani a po hali boncianla.» #Cil 22.2; Ps 2.7; Esa 42.1; Mat 3.17; 12.18; Mrk 9.7; Luk 3.22.

Sutaani tulini Jesu

(Mat 4.1-11; Luk 4.1-13)

12Lanyogunu, U Tienu Fuoma Yua den tudi ki gedini Jesu mi fanpienma nni. 13O den ye lipo leni ti fuayandi, ki tieni dana piinaa ke Sutaani tulini o. Malekinba den tuuni o po.

Jesu cili o tuonli Galile diema nni

(Mat 4.12-17; Luk 4.14-15)

14Ban den cuo Jan ki kuani o li kpaadidieli nni ke li pende, ke Jesu den gedi Galile ki ban wangi U Tienu Laabaaliŋamo, 15ki tua: «U yogunu pundi, U Tienu diema yogunu nagini. Yin lebidi ki tuo o Laabaaliŋamo.» #Mat 3.2.

Jesu yini jankpaanbinaa ke bi ŋoadi o

(Mat 4.18-22; Luk 5.1-11)

16Jesu n den balini Galile ñincianma, o den laa Simon leni o waalo Andre, ke bi lu i taali mi ñincianma nni. Bi den tie jankpaanba. 17Jesu den yedi ba: «Ŋoadi mani nni, n baa teni yin yaa lingi bi niba.» 18Lanyogunu liga, bi den ŋaa bi taali ki ŋoadi o.

19Wan den suagi liiga waamu, o go den laa Sebede bijaliediba, Jaki leni o waalo Jan, ke bi ye ku ñinbiagu nni ki ŋanbidi bi taali. 20Jesu n den laa ba yaa yogunu, o den yini ba, ke bi ŋaa bi baa leni bi tuonsoanba ku ñinbiagu nni, ki ŋoadi o.

Jesu paagi ki cicibiadiga n ye yua yaa niinni

(Luk 4.31-37)

21Jesu leni o ŋoadikaaba den gedi Kafarnawum dogu nni. Mi fuodima daali n pundi, Jesu den kua li bali maama bangima dieli nni, ki bangi yaaba n taani lienni. 22O bangima den paki ba, kelima o den bangi leni li bali, waa den bangi nani li bali maama banda yeni ka. #Mat 7.28-29. 23Lanyogunu ki cicibiadiga n den ye yaa joa yaa niinni den kua li bali maama bangima dieli yeni niinni, ki tiani: 24«Ŋain, fini Jesu, Nasareti yua, be n ye tinba leni fini siiga? A cua ki baa bolini ti yo? N bani ŋan tie yua. A tie U Tienu Nigagidiŋamo.» 25Jesu den funi leni ga ki yedi: «Suoni ki ña o joa na niinni.» 26Ki cicibiadiga den guli o joa yeni ke o digibi. Lani, ki den tiani boncianla ki ñani o niinni. 27Li den paki yaaba n ye likani kuli, ke bi buali biyaba: «Line tie be? Li tie bangipanma. O maadi leni li bali ki tendi ke ba mu cicibiadimu tiendi wan yedi yaala.» 28Lanyogunu o yeli den ñani Galile diema nni kuli.

Jesu paagi a yiama boncianla

(Mat 8.14-17; Luk 4.38-41)

29Jesu den ñani li bali maama bangima dieli nni, ki yegi leni Jaki leni Jan ki gedi Simon leni Andre denpo. 30Li den sua ke Simon cuadinaa dua, kelima o den pia ti gbananbiendi. Bi den jaligi ki waani Jesu. 31O den nagini o kani ki cuo o nuu ki fiini o. Lanyogunu o gbananbiendi den kagidi o po, ke o fii ki gaa bi cangu. 32Ku yenjuagu, u yienu n den kua yaa yogunu, bi niba den cuani Jesu kani a yiama leni mu cicibiadimu n ye yaaba yaa niinni kuli. 33U dogu nni yaaba den taani Simon buliñoabu kani. 34Jesu den paagi yaa niba n yabi leni ban den pia yaa yianbuoli kuli, ki deli mu cicibiadimu boncianla ki ñani mu mun ye yaaba yaa niinni. Waa den tuo ke mu cicibiadimu n maadi, kelima mu den bani wan tie yua.

Jesu gedi kaantoe ki ban wangi o Laabaaliŋamo

(Luk 4.42-44)

35Jesu den yagidi ki fii ke li daa faa, ki ñani ki gedi naani n foagi leni bi niba n ye naani, ki ban jaandi. 36Simon leni yaaba n den ye leni o den fii ki lingi o. 37Ban den laa o, bi den yedi o: «Bi niba kuli lingi a.» 38O den guani ki yedi ba: «Tin suagi mani liiga ki gedi a dobila nni, min ban waani o Laabaaliŋamo maama lanpo moko, kelima n den cua lani yaa po yo.» 39O den goadi Galile diema nni kuli, ki koa li bali maama bangima diena nni, ki wangi U Tienu maama, ki go deli mu cicibiadimu, ki ñandi mu mun ye yaaba yaa niinni. #Mat 4.23; 9.35.

Jesu paagi o gbaado

(Mat 8.1-4; Luk 5.12-16)

40O gbaado den cua o kani ki gbaani ki mia o ki yedi: «A yaa bua, a baa fidi ki ŋanbi nni.» 41Mi ninñima den cuo Jesu o po, ke o tandi o nuu ki sii o ki yedi o: «N bua, ŋanbi.» 42Lanyogunu mi gbaadima den gbeni o po, ke o ŋanbi. 43Lanyogunu goga Jesu den cabi o, ki maadi leni o leni li bali, 44ki yedi: «Fangi a yuli, ki da yedi niloba liba, ama gedi o kopadiciamo kani, wan ban le ŋa. Ŋan padi Musa n den bili yaa padili buolu a ŋanbima po, lan tua bi po siedi ke a ŋanbi.»#Lev 14.1-32. 45Ama o joa yeni den gedi ki ban goadi ki wangi Jesu n tieni o po yaala kuli, hali ke li teni ke Jesu ki go den fidi ki kua doguba niinni, ke bi niba bani. O den se li fuali nni ke bi niba ña i kaani kuli ki kpendi o kani.

Currently Selected:

Marki 1: BGP

Highlight

Copy

Compare