Marki 3
3
Jesu paagi yaa joa yaa nuu n faani
(Mat 12.9-14; Luk 6.6-11)
1Jesu go den kua li bali maama bangima dieli nni. O joa den ye likani ke o nuu faani. 2Yaaba n den ye likani den kpaagi ki baa le Jesu yaa baa paagi o joa yeni mi fuodima daali. Lani, bi baa baa ki kuli o. 3Jesu den yedi yua yaa nuu n faani: «Fii ki sedi siiga nni ne!» 4Lani, o den yedi ba: «Li bali maama tuo tin tieni bi niba po yaala n ŋani mi fuodima daali, bi yaala n bia yo? Tin gaa o nilo miali, bi tin kpa o yo?» Bi den ŋmini suo. 5Jesu pali den biidi boncianla, kelima bi pajuaga po. O den diidi bikuli leni li pabienli, ki yedi o joa yeni: «Tandi a nuu!» O den tandi o nuu ke u paagi. 6Lanyogunu, Farisieninba den ñani ki ban taani leni o bado Herodi buakaaba, ki juogi ban baa tieni maama ki teni ban kpa Jesu.
Ku niligu taani Jesu kani
7Jesu leni o ŋoadikaaba den piadi, ki go gedi mi ñincianma po. Yaa niligu n yabi den ñani Galile diema nni ki ŋua o. 8Jude diema nni, Jerusalemi dogu nni, Idume#3.8 Idume: Idume den tie Edomi buolu diema. diema nni leni yaa diema n ye Jurden kpenu kandima#3.8 Yaa diema n den ye Jurden kandima yeni yi Pele. nni, Tiiri leni Sidon dogi nni leni li dobila nni kuli yaaba, ku niligu den ñani boncianla ki cua Jesu kani, kelima bi den gbadi wan tiendi yaala kuli.
9O den waani o ŋoadikaaba ke ban baa o po ku ñinbiagu, wan ti kua lienni ke ku niligu n da mabini o. #Mrk 4.1; Luk 5.1-3. 10O den paagidi bi niba boncianla bi yiani po. Yaaba n laadi fala kelima i yiani po kuli den taani o kani. Bi den tudi biyaba ki bua ki sii o. 11Mu cicibiadimu danba yaa laa o yaa yogunu kuli, bi yen gbaani o nintuali ki yaa tangi ki tua: «A tie U Tienu Bijua!» 12Jesu den maadi leni ba leni li bali ki yiedi bi po, ban da ban waani wan tie yua.
Bi piiga n tondiliediba
(Mat 10.1-4; Luk 6.12-16)
13Lani n den pendi, Jesu den doni li juali po, ki yini wan bua yaaba ke bi cua o kani. 14O den gandi piiga n nibilie ke ban yaa ye leni o, wan yaa tuuni ba, ke bi caa ki wangi U Tienu maama. 15O den puni ba u paalu, ke ban yaa deli ki ñandi mu cicibiadimu mun ña mun ye yaaba yaa niinni. 16Bine n tie wan den dini yaa piiga n niliediba li bali yeni: Simon ke o yini o Pieli, 17Sebede bijaliediba Jaki leni o waalo Jan, ke o yini ba Boaneje (lani n tie yaa jaba n maadi nani i tatantani yeni), 18Andre leni Filipi, Batelemi leni Matie, Toma leni Alife bijua Jaki, Tade leni Simon ban yi yua o Yankuadaano 19leni Judasi Isikarioti, yua n den yuandi ki janbi Jesu.
Jesu niba bua ki cuo o
20Lani n pendi, Jesu den guani o denpo. Ku niligu go den taani boncianla hali ke wani leni o ŋoadikaaba ki den pia lenli ki baa je. 21Jesu niba n den gbadi ke li tie yeni, bi den cua ki baa cuo o, kelima bi den tua: «Waa go pia yama.»
Jesu n deli mu cicibiadimu yaa paalu po
(Mat 12.22-32; Luk 11.14-23; 12.10)
22Li bali maama banda yaaba n den ñani Jerusalemi ki cua o kani moko den tua: «Mu cicibiadimu bado Belisebuli n ye o niinni ki die o. Wani n puni o u paalu ke o deli ki ñandi mu cicibiadimu mun ye yaaba yaa niinni.» #Mat 9.34; 10.25. 23Jesu den yini ba, ki pua ba mi kpanjama ki buali ba: «Mu cicibiadimu bado Sutaani baa gaa lede ki deli o yuli? 24Yaa diema n boagidi ki tuogi leni mi yuli, laa diema kan fidi ki yaa ye. 25Yaa diegu n boagidi ki tuogi leni ku yuli, laa diegu kan fidi ki yaa ye. 26Lanwani, Sutaani moko yaa fiini mi janjanma ki tuogi leni o yuli, o baa boagidi, o diema kan go yaa ye, o bali baa gbeni. 27Niloba kan fidi ki kua o gbanmandaano dieli nni ki fie o piama, kali o kpa paadi o ki loli o. Li yaa puole o baa kua o dieli nni ki fagi o piama. 28N waani yi i moamoani ke bi nisaaliba baa baa sugili tuonbiatoadi kuli po leni ban sugi U Tienu yaa sugidi kuli po. 29Ama yua n sugi U Tienu Fuoma Yua wani, kan baa sugili abada. O tieni yaa tuonbiadi n baa yaa ye hali yaa yogunu kuli.» #Luk 12.10. 30Jesu den maadi yeni, kelima bi den tua ke ki cicibiadiga ye o niinni.
Jesu naa leni o waamu
(Mat 12.46-50; Luk 8.19-21)
31Jesu naa leni o waamu den cua ki se niinpo, ki soani ke ban yini o. 32Ku niligu den kaa ki lindi o, ke bi cua ki yedi o: «Diidi, a naa leni a waamu se niinpo ki lingi a.» 33O den guani ki yedi ba: «Ŋme n tie n naa leni n waamu?» 34Lani, o den diidi yaaba n lindi o kuli ki yedi: «Diidi n naa leni n waamu. 35Yua n tuo ki tiendi U Tienu yanbuama kuli, wani n tie n naataanjaga leni n naataanpuoga leni n naa.»
Currently Selected:
Marki 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
