Marki 11
11
Jesu fala leni o kuuma Jerusalemi dogu nni po
11—15
Jesu kua Jerusalemi
(Mat 21.1-11; Luk 19.28-40; Jan 12.12-19)
1Jesu leni o ŋoadikaaba n den nagidi Jerusalemi, ki bua ki pundi Betifase leni Betani, ki kuu Olivie Tiidi juali, o den soani o ŋoadikaaba siiga nibilie ki yedi ba: 2«Suagi mani ki gedi yaa dobiga n ye yi liiga na. Yi yaa baa kua lienni yaa yogunu, yi baa le yaa ŋunbisaagili, ke oba daa jagini li, ke li luo. Yin lodi li ki cuani na. 3Niloba yaa buali yi: ‹Be n teni ke yi tieni line?› Yin guani ki yedi o: ‹O Diedo n bua o.› Tontoni o baa cedi yin cuani o n kani.»
4Bi den gedi ki ban sua ke li ŋunbisaagili luo niini bu buliñoajabu kani, ki kuu u sanu. Bi den lodi li. 5Yaa niba n ye likani bi tianba den buali ba: «Yi tiendi be? Be n teni ke yi lodi li ŋunbisaagili na?» 6Bi den guani ba nani Jesu n waani ba maama. Lani, bi den cedi ke bi gedini li. 7Bi den cuani li ŋunbisaagili Jesu kani, ki lu ki maandi lipo bi tiadi ke Jesu jagini li. 8Bi niba boncianla den ladi bi tiadi u sanu nni, bi nitianba den pedi i tibensoangi i kuani nni ki ladi u sanu nni.#11.8 Ban den ladi bi tiadi leni i tibensoangi u sanu nni yeni, bi den bua ki kpiagi Jesu nani o bado. Diidi Bi Badiba Tilieli 9.13. 9Yaaba n ye Jesu liiga leni yaaba n ŋua o puoli kuli den kpaani ki tua: «Ti pagi U Tienu! U Tienu n seligi yua n kpendi o Diedo yeli nni! #Ps 118.25-26. 10U Tienu n seligi yaa bali n baa je na, ti yaaja Davidi n den kpa dini yaa bali yeni. U Tienu yua n ye hali tanpolijoma n baa ti pagidi.» 11Jesu den pundi Jerusalemi ki kua U Tienu diegu nni. O den diidi li bonla kuli. U yienu n den bua ki baa, o den yegi leni bi piiga n niliediba, ki guani ki gedi Betani po.
Jesu soli bu kankanbu
(Mat 21.18-19)
12Lan den fii ki faa, ke bi go ñani Betani, mi koma den cuo Jesu. 13O den laa bu kankanbu hali foagima ke bu faadi bundi, ki jadi ki gedi ki baa le o yaa baa le bu bonluonkaala. Wan den pundi waa laa puu se ti faadi, kelima laa den tie a kankana lonma yogunu. 14O den yedi bu: «Oba kuli n da go ŋmani a bonluonkaala abada.» O ŋoadikaaba den gbadi wan yedi yaala.
Jesu kua U Tienu diegu nni
(Mat 21.12-17; Luk 19.45-48; Jan 2.13-22)
15Ban den pundi Jerusalemi, Jesu den kua U Tienu diegu nni, ki deli ki ñani yaaba n kuadi leni yaaba n da lienni kuli, ki tudi ki luni bi ligilebidiba kpagidi leni a kpaajekuada bonkalikaala. 16O den yie bi po ke oba kuli n da go tugi liba ki poandi U Tienu diegu nni. 17O go den tundi ba ki yedi: «Naani i Diani nni laa yedi: ‹Bi baa yi n diegu i jaandi diegu i nibuoli kuli po ka?› Ama yinba wani teni ke li tua a suuda wuonkaanu.» #Esa 56.7; Jer 7.11.
18Bi kopadicianba yudanba leni li bali maama banda n den gbadi lani, bi den kpaagi ban baa tieni maama ki bolini o, ama bi den jie o, kelima o bangima den paki ku niligu kuli.
19Ku yenjuaboandigu n den pundi, Jesu leni o ŋoadikaaba go den ñani u dogu nni.
Yaa kankanbu n kuodi n bangi yaala
(Mat 21.20-22)
20Lan den fii ki faa, ke bi ye u sanu nni ki poa ki dagini bu kankanbu yeni kani, bi den laa ke bu kuodi ki taani leni bu jiini kuli. 21Pieli den tiadi yaala n den tieni, ki yedi Jesu: «Canbaa, diidi ki le, ŋan den soli yaa kankanbu yeni, bu kuodi bukuli.» 22Jesu den guani ki yedi ba: «Daani mani U Tienu! 23N waani yi i moamoani, yua n yedi li naa juali: ‹Fii ki ban lu a yuli mi ñincianma nni,› o yaa yedi yeni kaa maliti o pali nni, ama ki daani ke wan yedi yaala baa tieni, o baa baa lan tieni o po. #Mat 17.20; 1Kor 13.2. 24Li tie lani yaa po ke n yedi yi, yin jaandi ki mia yaala kuli, yin daani ke yi baa la. Lani, yi baa baa la. 25Yin se ki jaandi yaa yogunu kuli, ki tiadi ke yi pia maama leni niloba, yin pa o sugili. Lani n tie yi Baa yua n ye tanpoli n pa yimo sugili yi tuonbiadi po. [ #Mat 6.14-15. 26Ama yi yàá puuni yi lieba sugili, yi Baa yua n ye tanpoli moko kan pa yi sugili yi yaa tuonbiadi po.]»
Bi buali Jesu o bali n ñani naani
(Mat 21.23-27; Luk 20.1-8)
27Ban den guani ki cua Jerusalemi, Jesu den goadi U Tienu diegu nni. Bi kopadicianba yudanba, li bali maama banda leni bi nikpela kuli den cua o kani ki yedi o: 28«Li laa bali yaa po yo ke a tiendi li naa bonla? Ŋme n puni a li bali ke a tiendi la?» 29Jesu den yedi ba: «N baa buali yi bonyenla, yin guani n po ke nmoko baa waani yi yaa bali yaa po ke n tiendi laa bonla. 30Jan n den batisi bi niba yeni, o den baa li bali tanpoli po, bi bi nisaaliba kane? Waani nni mani.» 31Bi den juogi bi siiga ki yedi: «Ti yaa yedi ke o den baa li tanpoli po, o baa yedi: ‹Be yaa po ke yii den daani o maama?› 32Ti yaa yedi: ‹Bi nisaaliba yaa kane,› hei...» Yeni mo bi den jie bi niba, kelima bi niba kuli den nua ke Jan tie saawalipualo moamoane. 33Lani yaa po, bi den guani ki yedi Jesu: «Tii bani ba.» Jesu den yedi ba: «Nmoko kan waani yi yaa bali yaa po, ke n tiendi laa bonla.»
Currently Selected:
Marki 11: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
