Marki 10
10
Jesu ñani Galile ki cua Jerusalemi
10
Jesu maadi li puoñanli maama
(Mat 5.31-32; 19.1-9; Luk 16.18)
1Jesu den fii ki ñani likani, ki gedi Jude tinga yaaga n ye Jurden kpenu kandima. Bi niba go den taani o kani hali boncianla. O den bangi ba nani wan maani ki tiendi maama.
2 Farisieninba bi tianba den cua o kani, ki bua ki dia o ku madiagu ki buali o: «Naani li bali maama tuo o joa n ñani o pua?» 3Omo den buali ba: «Musa den bili yi po lede?» 4Bi den yedi o: «Musa den tuo o joa n diani li puoñatili o pua po, ki ñani o.» #Tia 24.1-4; Mat 5.31. 5Jesu den yedi ba: «Li tie yi pajuaga po yo, ke o diani ki bili yi po laa ñoamabonli. 6Ama ŋanduna tagima cilima yogunu, U Tienu den tagi o joa leni o pua. #Cil 1.27; 5.2. 7Li tie lani yaa po yo, ke o joa baa ña o baa leni o naa kani ki taani leni o pua, #Cil 2.24. 8bani nibilie yeni n tua gbananyendi. Lanwani, baa go tie bilie ka, bi ji tie yende. 9Lani yaa po, U Tienu n taani yaala, o nisaalo n da paadi la.» 10Ban den guani bi candeni, Jesu ŋoadikaaba den buali o laa maama fuuli. 11O den yedi ba: «Yua n ñani o pua ki go taa puotoa kuli conbi, ki tudi wan den kpa pia yaa pua po. #Mat 5.32; 1Kor 7.10-11. 12O pua moko yaa ñani o calo kani ki kuni jatoa, o conbi.»
Jesu gaali a biwaala
(Mat 19.13-15; Luk 18.15-17)
13Bi niba den kpendinni Jesu kani a biwaala, ke wan sii ba ki gaali ba. O ŋoadikaaba den funi leni yaaba n kpendinni ba. 14Jesu n den laa lani, o pali den beni ke o yedi o ŋoadikaaba: «Cedi mani a biwaala n cua n kani, ki da deli ba, kelima U Tienu diema tie yaaba n tie nani a biwaala ne po yo. 15N waani yi i moamoani ke yua n kaa tuo U Tienu diema nani ki biwaaga yeni, kan kua lienni.» #Mat 18.3. 16Lani, o den taa a bila ki ŋmabi ba, ki maani bi po o nii ki gaali ba.
O jawaapiado
(Mat 19.16-30; Luk 18.18-30)
17Jesu n den fii lankani ki baa suagi liiga, o joa den sani ki cua o kani ki gbaani o nintuali ki buali o: «O canbaanŋamo, n baa tieni lede ki baa yaa miali n kan gbeni?» 18Jesu den buali o: «Be yaa po ke a yini nni niŋamo? U Tienu bebe yaa ka, oba kuli ki ŋani. 19A bani li bali maama n bili yaala: Ŋan da kpa o nilo, ŋan da conbi, ŋan da su, ŋan da tieni mi siedifaama a lielo po, ŋan da janbi oba yin pia yaa ŋantaado yi siiga kuli nni; Ŋan yaa jigindi a baa leni a naa.» #Ñam 20.12-16; Tia 5.16-21. 20O joa yeni den guani ki yedi o: «Canbaa, n kubi lani kuli hali n biwaama nni.» 21Jesu den diidi o ki bua o ki yedi o: «Bonyenla n poadi a kani. Gedi ki ban kuadi ŋan pia yaala kuli, ki pa la a luoda, lani, a baa baa ŋalimani tanpoli po. Li yaa puoli, ŋan cua ki ŋoadi nni.» 22O joa yeni nunga den biidi laa maama po, ke o tagini ki ban caa leni li pabiidili, kelima o ŋalimano den yabi. 23Jesu den diidi ki lindi o ŋoadikaaba ki yedi ba: «Li pa hali boncianla a piada n baa ki kua U Tienu diema nni.» 24Li den paki o ŋoadikaaba. Lani, Jesu go den yedi ba: «N bila, U Tienu diema nni kuama pa boncianla. 25Ku yuoyuogu n tagini mi kpalipienbonma#10.25 Laa vedise gbadima pa. Diidi Mat 19.24 leni ki dianbiga tiipo n yedi yaala. nni, dingi ki cie o piado kuama U Tienu diema nni.» 26Li go den paki o ŋoadikaaba hali boncianla ke bi yedi biyaba: «Li yaa tie yeni, ŋme nan baa fidi ki faabi?» 27Jesu den diidi ba ki yedi: «Bi nisaaliba kan fidi la, ama U Tienu po wani, yaala n pa kuli ki ye.»
28Pieli den yedi o: «Diidi ki le, tinba, ti den fii ki ŋaa likuli ki ŋoadi a.» 29Jesu den guani ki yedi o: «N waani yi i moamoani ke laa pia yua n fii ki ŋaa o diegu, o baa, o naa, o naataani, o bila yaa ka o kuani, kelima mini leni o Laabaaliŋamo po, 30ki kan baa likuli taalima kobiga kobiga ki daa ye ŋanduna na niinni. O baa baa ku diegu, baa, naa, i naataani leni i kuani. O go baa baa bi niba n waani o fala boncianla. Yaa yogunu n kpendi mo, o go baa baa yaa miali n kan gbeni. 31Die liiga yaaba siiga niba boncianla, baa tua puoli yaaba, puoli yaaba siiga mo, niba boncianla baa tua liiga yaaba.» #Mat 20.16; Luk 13.30.
Jesu waani mi taataama ke o baa kpe ki go fii
(Mat 20.17-19; Luk 18.31-34)
32Bi den tagi u sanu ki do ki caa Jerusalemi. Jesu den ye bi liiga ki cuoni. O ŋoadikaaba yama den yagi, ke yaaba n den yegi leni ba mo kuli den ye leni ti jawaandi. Jesu go den taa bi piiga n niliediba, ki piadi leni ba, ki waani ba yaala n baa tieni o, ke laa pia tama. 33O den yedi ba: «Cengi mani, ti do ki caa Jerusalemi. Bi baa cuo o Joa Bijua ki teni o bi kopadicianba yudanba leni li bali maama banda. Bi baa jia o buudi, ki bili ban kpa o. Bi baa teni o bi nilanba. 34Bi baa ñuadi o ki sii o po ti ñinsandi, ki pua o i baliji ki kpa o. Ama kuuma dataali, o baa fii bi tinkpiba siiga.»
Jaki leni Jan miabu
(Mat 20.20-28)
35Sebede bijaba, Jaki leni Jan, den nagini Jesu kani ki yedi o: «Canbaa, ti bua ŋan tieni ti po tin baa mia ŋa yaala.» 36O den yedi ba: «Yi bua min tieni yi po be?» 37Bi den yedi o: «A yaa ti kali a kpiagidi bali kalikaanu, ŋan pa ti tin kali, yendo a jienu, yendo mo a ganu.» 38Jesu den guani ki yedi ba: «Yii bani yin miadi yaala. Yi baa fidi ki ño min baa ño yaa tadiñokaaga#10.38 Tadiñokaaga: O Ŋantaadikpelo nni, li tuugi leni fala yo. Nekanba moko, Jesu bua ki waani wan baa le yaa fala yo. nni bi? Yi baa fidi ban batisi yi ban baa batisi nni yaa batisima?» Bi den yedi o: «Ti baa fidi.» #Luk 12.50. 39Jesu den guani ki yedi ba: «Moamoane ke yi baa ño min baa ño yaa tadiñokaaga nni, bi baa batisi yi ban baa batisi mini yaa batisima. 40Ama ki kaani o nilo n jienu yaa ka n ganu, laa ŋua mini, li tie U Tienu n bogini ki bili la yaaba yaa po yo.»
41Ŋoadikaaba piiga yaaba n sieni n den gbadi lani, bi pala den beni Jaki leni Jan po. 42Jesu den yini ba ki yedi: «Yi bani ke ban nua yaaba ke bi tie i nibuoli yudanba yeni mabindi ba, ke bi paatieba mo die ba leni u paalu. #Luk 22.25-26. 43Ama lan da tie yeni yinba siiga. Yi siiga yua n bua ki tua niciamo kuli, wan tua yi naacemo. #Mat 23.11; Mrk 9.35; Luk 22.26. 44Yua mo n bua ki tua yi liiga yua kuli, wan tua yuakuli yonbo. 45O Joa Bijua naa cua ke bi niba n yaa tuuni o po ka, ama o cua ki baa yaa tuuni nitoaba po, ki pa o miali, ki daa ki faabi niba boncianla.»
Jesu paagi o juamo Bartime
(Mat 20.29-34; Luk 18.35-43)
46Jesu leni o ŋoadikaaba den pundi Jeriko dogu nni. Ban den ña laa dogu nni, bi den yegi leni yaa niligu n yabi, ke o juamo yua n miadi, Time bijua yua n yi Bartime, kaa u sankunu. 47Wan den gbadi ke yua n baa pendi tie Jesu, Nasareti yua, o den tangi: «Jesu, Davidi Bijua, gbadi n ninñima.» 48Yaa niba n yabi den funi leni o ki yedi ke wan suoni, ama o go den tangi boncianla ki pugidi ki tua: «Davidi Bijua, gbadi n ninñima.» 49Jesu den sedi ki yedi: «Yini mani o na!» Bi den yini o juamo ki yedi o: «Paagi a pali, fii, o yi ŋa.» 50O juamo yeni den luni o kpalibu ki fii yenma ki cua Jesu kani. 51Jesu den buali o: «A bua min tieni a po be?» O juamo den guani ki yedi o: «Canbaa, n bua ŋan pa nni n nuni n noadi.» 52Jesu den yedi o: «Gedi, a dandanli paagi a.» Lanyogunu o nuni go den noadi, ke o ŋua Jesu ki yegi leni o.
Currently Selected:
Marki 10: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
