Marki 12

Bi koaguudiba kpanjama

(Mat 21.33-46; Luk 20.9-19)

1Li yaa puoli, Jesu go den maadi leni ba, ki pua mi kpanjama. O den yedi: «O joa den ŋuu duven tiidi kuanu, ki kpaa li nagili ki lindi, ki gbiidi ku buogu ban baa yaa ŋanbidi duven naankani, ki go paani li janli i duventiidi siiga. Lani, o den guuni o kuanu bi koaguudiba, ki fii ki gedi u dogu. #Esa 5.1-2. 2U jetaagu yogunu n den pundi, o den soani naacenyendo bi koaguudiba yeni kani, ke wan ban gaa bi kani o yaa biinu o kuanu bonbaakaala nni. 3Bi den cuo o ki pua o leni i gbiami, ki yaadi o nukuomu. 4O go den soani naacentoa bi kani. Bi den pua o yuli ki go fiagi o. 5O go den soani toa bi kani ke bi kpani o. O go den soani toaba ke bi pua bine, ki kpani bine. 6O koadaano bibuadiga bebe n ji den sieni. O den juodi ki soani o bi kani ki yedi: ‹Bi baa fangi n bijua wani.› 7Ama bi koaguudiba den yedi biyaba: ‹One n tie o faajielo, cedi tin kpa o mani, o faali baa tua ti yaa yaali.› 8Lani, bi den cuo o, ki kpa o ki luni o u kuanu puoli.» 9Lani, Jesu den buali: «O koadaano baa tieni lede? O baa guani ki cua ki bolini bi koaguudiba, ki teni o kuanu nitoaba. 10Naani yii cogi i Diani nni yaa maama n tie ne?

Bi tanmaaba n den yie ki luni yaa tanli,

Tua li tanpuukaali. #Ps 118.22-23.

11Likuli den ñani o Diedo kani,

Ki tie bonlidinkaala ti nuni po.»

12Jufinba nikpiaga den bandi ke Jesu pua mi kpanjama yeni ki maadi leni bane. Bi den moandi ki baa cuo o, ama bi den jie ku niligu, ki fii o kani ki ban caa.

Loma badiciamo Sesari lubili

(Mat 22.15-22; Luk 20.20-26)

13Lani n pendi, bi den soani Jesu kani Farisieninba bi tianba leni o bado Herodi buakaaba, ke ban dia o ku madiagu ki cuo o o maama nni. 14Bi den cua ki yedi o: «Canbaa, ti bani ke a tie moamoandaano, ŋaa jie oba kuli, ŋaa gagidi oba kelima bi niba n nua ke o tie maama po, a bangi bi niba U Tienu sanŋoadima leni i moamoani mo. Naani li pia u sanu tin pa Loma badiciamo Sesari li lubili, bi laa pia? Tin pa, bi tin da pa yo?» 15Jesu yua n den bani ke baa maadi leni bi pala kuli, den buali ba: «Be yaa po ke yi dia nni ku madiagu ki bua ki cuo nni? Cuani mani li kujapienli na min le!» 16Bi den teni o li ke o yedi ba: «Ŋme yaa nannanli leni ŋme yaa diani nne?» Bi den guani ki yedi o: «Sesari yaali yo.» 17Jesu den yedi ba: «Pa mani Sesari, yaala n tie Sesari yaala, ki pa U Tienu mo, yaala n tie U Tienu yaala.» O maguankaama yeni den paki ba boncianla.

Sadusieninba buali, bi tinkpiba fiima po

(Mat 22.23-33; Luk 20.27-40)

18 Sadusieninba yaaba n tua ke bi tinkpiba fiima ki ye, bi siiga tianba den cua Jesu kani ki buali o, ki yedi: #JTT 23.8. 19«Canbaa, Musa den diani ki bili ti po li bali maama nni, ki yedi ke o nilo kpelo yaa kpe ki ŋaa o pua kaa pia biga, wan taa o kpelo yeni pua ki baa o kpelo po u buolu. #Tia 25.5. 20Jabilele den ye ki taa baayendo, ke o kpelo taa o pua ki kpe, kaa ŋa biga. 21O lielo moko den taa o ki kpe, kaa ŋa biga. Li den tua yeni leni o taalo moko. 22Bani jabilele yeni kuli den taa o, ama oba ki den ŋaa buolu. O pua mo den ti yuandi ki kpe. 23Bi tinkpiba fiima yogunu, bani jabilele yeni siiga, o pua baa yaa tie ŋme yaa yua? Bani jabilele yeni, yendo yendo kuli den taa o ke o tua o pua.» 24Jesu den guani ki yedi ba: «Yin kaa bani i Diani n yedi yaala, kaa go bani U Tienu paalu yeni, lani n teni ke yi ye mi tudima nni. 25Yaaba n kpe yaa guani ki fii yaa yogunu, bi jaba kan go taa puoba, bi puoba mo kan go kuni jaba. Ama bi baa yaa tie nani malekinba yeni tanpoli po. 26Yaala n tie bi tinkpiba fiima po, naani yii cogi Musa n den diani yaa tili#12.26 Jufinba yaa yedi Musa tili yeni, bi bua ki yedi li bali maama timuuda, Mi Cilima, Mi Ñama, Levi Buolu Yaaba Tuona, Mi Coadima leni Mi Tiadima. nni, U Tienu n den yedi yaala, yaa fatuugu n co kani: N tie Abalahama, Isaaka leni Jakob Tienu. #Ñam 3.6. 27U Tienu naa tie tinkpila Tienu ka, o tie yaaba n fo Tienu yo. Yi tudi boncianla.»

Li bali maama mayuli

(Mat 22.34-40; Luk 10.25-37)

28Li bali maama banda siiga yendo den gbadi ban nia yaala, ki bandi ke Jesu guani Sadusieninba yaa maama n dagidi. Lani, o den nagini Jesu kani ki buali o: «Li bali maama nni kuli, mile n tie li mayuli?» #Luk 10.25-28. 29Jesu den guani ki yedi o: «Li mayuli tie mine: Isidayeli buolu, cengi mani, o Diedo ti Tienu, wani bebe n tie o Diedo. #Tia 6.4-5. 30Ŋan bua o Diedo a Tienu leni a pali kuli leni a miali kuli leni a yantiali kuli leni a fidu kuli. 31Yaala n ŋua mo tie: Ŋan bua a lielo mo nani ŋan bua a yuli maama yeni. Li bali maama nni kuli, mayutoali ki go ye ki cie mine.» #Lev 19.18. 32Li bali maama bando den yedi o: «Canbaa, yeni a maadi moamoani ke U Tienu tie yendo, ke toa ki ye, kali wani. #Tia 4.35. 33O nilo yaa bua wani leni o pali kuli leni o yantiali kuli leni o miali kuli leni o fidu kuli, ki go bua o lielo nani wan bua o yuli maama yeni, lani n cie ban padi a padijuukaana leni yaa padibuoli n sieni kuli.» #Ose 6.6. 34Jesu n den sua ke o bando yeni guani o leni mi yanfuoma, o den yedi o: «Ŋaa foagi leni U Tienu diema.» Lanyogunu liiga, baa go den pia papaali ki buali o bualiba kuli.

Kilisiti n tie yua

(Mat 22.41-46; Luk 20.41-44)

35Jesu n go den bangi bi niba U Tienu diegu nni, o den buali: «Li gaa lede ke li bali maama banda tua ke U Tienu n Gandi Yua, tie Davidi bijua? 36U Tienu Fuoma Yua den teni ke Davidi oba kadi ki yedi:

‹O Diedo den yedi n Diedo:

Kali n jienu po,

Hali min baa guli a yibalinba,

Ŋan ŋmaa ba.› #Ps 110.1.

37Davidi oba yini o, o Diedo, li nan go gaa lede ke o tie wani Davidi bijua?»

Jesu jaligi li bali maama banda

(Mat 23.1-36; Luk 20.45-47)

Yaa niligu n yabi den cengi Jesu maama leni li pamanli. 38Wan den bangi ba yaa yogunu, o den yedi: «Fangi mani yi yula leni li bali maama banda, yaaba n bua ki yaa goadi leni a liadiciama, ki go bua bi niba n yaa fuondi ki kpiagidi ba mu daamu nni. 39Bi go bua ki yaa kaa i nician-kalikaani li bali maama bangima diena nni, ki go bua yaa kaani n gagidi mi jecianma kani. 40Ama bi nan janbidi a kpepuona ki fenli bi diena, ki jaandi i jaandifoagi ki kpali ke bi tie jajaandimoana. Bi yaa buudi cuonu baa yaa bia ki cie.»

O kpepuoluodo paabu

(Luk 21.1-4)

41Jesu den kaa U Tienu diegu nni ki tiegi ku ligitiagu, ki diidi ku niligu n kpiendi i ligi maama. A piada boncianla den kpiendi i ligi ke li yabi. 42O kpepuoluodo mo den cua ki kpieni falinolie. 43Jesu den yini o ŋoadikaaba ki yedi ba: «N waani yi i moamoani, o kpepuoluodo na puni ki cie yaaba n kpieni i ligi ku ligitiagu nni kuli, 44kelima bikuli ñani bi ŋalimano nni bi ligijode ki kpieni. Ama o kpepuoluodo ne wani, ba leni o luoma kuli, o ñani wan pia yaala kuli, yaala n tie o miali yema piama kuli, ki kpieni.»

Currently Selected:

Marki 12: BGP

Highlight

Copy

Compare