Jonasi 1
1
Jonasi yiema leni U Tienu cuonu
1—2
Jonasi yie U Tienu tondu
1O Diedo den teni Amitayi bijua Jonasi o ñoamabonli ki yedi: #2Bad 14.25. 2«Fii ki gedi u dociamu Ninivi po, ki ban kpaani ki fu leni u niba, kelima bi biadima pundi hali n kani.»
3Ama Jonasi den fii ki sani ki gedi Tarsisi, ki foagidi leni o Diedo. O den gedi Jafa dogu nni, ki ban kua ñinbiaciangu yaagu n caa Tarsisi. O den pani ku panpaani ki kua ki yegi leni yaaba n caa Tarsisi yeni, ki bua ki foagidi leni o Diedo.
4Ama o Diedo den teni ke ku faabiadigu fii mi ñincianma nni. Ku tafaaciangu den lengidi mi ñincianma hali ke ku ñinbiaciangu yeni den bua ki mudi. 5Bi ñinbiagobidiba den jie, ki yedi ke yuakuli n mia o tienu mi todima. Bi den luni yaa tiadi n ye ku ñinbiaciangu nni mi ñincianma nni, ki yuagi ku ñinbiagu. Ama li den sua ke Jonasi jiidi ku ñinbiaciangu tugu nni, ki duani, ki guani hali boncianla. 6Ku ñinbiaciangu yudaano den nagini o kani, ki yedi o: «Be yaa po ke a goa? Fii ki mia amo yaa tienu. Daalinba o baa tiadi ti po, ki teni tin da bodi.»
7Bi ñinbiagobidiba den yedi biyaba: «Cua mani tin bu ku baagu ki bandi yua n cuani ti po yaa fala n tie ne.» Bi den buni ku baagu, ke li cuo Jonasi. 8Lani, bi den yedi o: «Fini n cuani ti po yaa fala n tie ne. A tuuni be yaa tuonbuolu yo? A ñani le? A tie mi laa diema yua yo? A tie be yaa nibuolu yo?»
9O den guani ki yedi ba: «N tie Hebilu buolu. N fangi o Diedo, wani U Tienu yua n die mi ñincianma, yua n tagi tanpoli leni ki tinga kuli.»
10Lani, ti jawaanciandi den cuo bi jaba yeni, ke bi yedi o: «Be n teni ke a tieni yeni?» Li den sua ke bi jaba yeni bandi, ke Jonasi tiini ki bua ki foagidi leni o Diedo, kelima wani o ba n den waani ba. 11Mi ñincianma n den lengidi ki pugidi, bi jaba yeni den yedi Jonasi: «Ti baa tieni a lede mi ñincianma n duani ti po?» 12O den yedi ba: «Se yin taa nni ki lu mi ñincianma nni, lani n tie mi ñincianma n duani yi po suo, kelima n bani ke mini yaa po n teni ke ku tafaaciangu yeni fii yi po.»
13Bi jaba yeni den nugi ki bua ki pundi li boanjaali, ama baa den fidi kelima mi ñincianma den lengidi ki pugidi yogunu kuli, ki yie bi po. 14Lani yaa po, bi den taa o Diedo yeli, ki jaandi ki mia o, ki yedi: «O Diedo, da bolini ti kelima o naa joa po. Da tuni ti, o joa yua n kaa tieni ti liba ne tagili, kelima fini o Diedo, ŋan bi tieni yaala yeni kuli, a tieni nani ŋan bua maama.»
15Li yaa puoli, bi den taa Jonasi ki luni o mi ñincianma nni. Mi ñincianma lengidima den duani suo. 16Bi jaba yeni den jie o Diedo boncianla, ki padi o po li padili, ki go niani o li nianli.
Currently Selected:
Jonasi 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
