Abidiasi 1
1
Yaa fala n jagi Edomi yuli po
1.1-14
O Diedo waani ke Edomi baa bodi
1Abidiasi bonlekaala.
Li Miali Diedo U Tienu den maadi Edomi yaaba po ki yedi:
«Ti gaa laabaali ke u tondu ñani o Diedo kani,
Ke o soani o tondo mo i nilanbuoli siiga ke o yedi:
‹Fii mani tin tuogi leni Edomi yaaba bu toabu.› » #Esa 34.5-17; 63.1-6; Jer 49.7-22; Esk 25.12-14; 35.1-15; Amo 1.11-12; Mal 1.2-5.
2O Diedo yedi Edomi yaaba:
«N baa teni yin tadigi,
Ki cie i nibuoli kuli.
Bi niba kuli baa fali yi.
3Yi japaaciandi biani yi,
Yinba yaaba n kaa ti tanlondi nni,
Yaa kaani n kpedi boncianla,
Ki tua yi yama nni:
‹Ŋme n baa fidi ki pieni ki ñani ti likani?›
4Ba yi yaa ban ye naani n kpedi
Nani jiebani tiali yeni,
Ba yi yaa ban tieni yi yekaanu
Hali a ŋmabila siiga,
N baa pieni ki ñani yi likani, ki lu yi.
Mini o Diedo n yedi yeni.
5A suuda yaa cua ku ñiagu,
U nufanu pua ŋa n yeni!
Naani bi kan su yaala n pia
Bi po mi fuoma te?
Yaaba n cenli duven tiidi
Bonluonkaala yaa kua a kuanu nni,
Naani baa baa suodi likuli ka?
6Diidi ki le ban fidi yi tiadi maama,
Yinba Edomi yaaba,
Bi wuodi ba yin den wuoni yaa ŋalimano.
7Yin den danli leni yaaba deli yi,
Ki ñani yi yi diema nni,
Ki janbi yi.
Yin danli leni yaaba diedi yi.
Yaaba n den taagi ki di leni yi,
Dia yi ti dadi.
Bi maadi yi maama ki tua:
‹Diidi mani ban luo mi yama maama!›
8Naani landaali ka ke n baa teni
Bi yanfuodanba n bodi Edomi diema nni,
Ki teni mi yanfuoma n bodi Esayu juana nni?
Mini o Diedo n yedi yeni.
9Fini Temani dogu, ti jawaanciandi
Baa cuo a jakoanda,
Joa mo kuli kan go yaa ye Edomi juana nni.
Edomi yaaba tagili
10Yinba Edomi yaaba den tieni
Yi kpiiba Jakob puoliŋuani mi biadima.
Lani n teni ke yi baa le i fe,
Ki bodi cain hali yaa yogunu kuli po!
11Yibalinba n den kua bi dogu nni,
Ki paadi yi kpiiba toagola,
Ki gedini ba ti yonbidi yaa daali,
Yimoko den ye likani.
Ban den toani tiatia ki baa boagidi
Jerusalemi dogu ŋalimano,
Yimoko den tie yenma leni bani bi nilanba yeni.
12Edomi yaaba, yi kan bi mangi yi pala,
Yi kpiiba Juda yaaba fala daali,
Yi kan bi mangi yi pala u nufanu
N pua ba yaa daali,
Bi ki sugi ba bi paboanli daali.
13Yi kan bi kua n niba dogu nni
Bi bodima daali.
Yi kan bi nuali bi fala bi bodima daali.
Yi kan bi fie yi kpiiba piama
Bi bodima daali.
14Yi kan bi jia a sankada nni
Ki yi baa yaa kpaani
Yaaba n tiini ki bua ki cia.
Yi kan bi yaa co yaaba n tiini
Ki bua ki ciadi,
Ki guani ki teni ba bi yibalinba
Bi paboanli daali.
O Diedo daali
1.15-21
15Mini o Diedo pabienli daali nagini,
Ke n baa jia i buoli kuli buudi.
N baa soani yi,
Nani yin den soani nitoaba maama.
Yi tuonbiada baa guani ki jiidi yi yula po.
Isidayeli yaaba baa tuu Edomi yaaba bi panli
16Yinba Isidayeli yaaba,
Yi ñuni#1.16 Ki ño ti buudi tadiñokaaga. Diidi Jeremi 25.15. n joagagidikaali po.
Yeni, yaa nibuoli n sieni moko
Baa ño yogunu kuli.
Bi baa ño, bi baa nali ki guo
Ki yuandi ki bodi cain nani bi yàá bi mali ba yeni.
17Ama yaaba n ciadi baa yaa ye Siyon juali po.#1.17 Nekanba Siyon juali bua ki yedi Jerusalemi.
Min go baa guani ki diedi yaali cain.
N niba Jakob puoliŋuani mo baa guani
Ki diedi mi diema.
18N niba Jakob puoliŋuani baa yaa tie
Nani u mu yeni,
Josefi puoliŋuani mo baa yaa tie
Nani mi mupienu yeni.
Ama Esayu puoliŋuani baa tua
Nani mi fenma yeni.
Bi baa bolini Esayu puoliŋuani
Nani u mu
N yen buoni mi fenma maama yeni.
Oba kuli kan cia Esayu puoliŋuani siiga.
Mini o Diedo n yedi yeni.»
Isidayeli baa diedi o yibalinba
19N niba, Juda yaaba, baa diedi
Edomi diema nuganu po.
Yaaba n ye Sefela baa diedi
Filisiti yaaba diema.
Bi baa diedi Efrayimi buolu diema
Leni mi dociamu Samari.
Benjamen buolu baa diedi Galaadi diema.
20Bi nilanba n den cuo yaaba
Ti yonbidi Isidayeli yaaba siiga,
Baa diedi Kanana yaaba diema
Ki pundi hali Sarepita dogu.
Ban den cuo yaaba Jerusalemi
Ki gedini ti yonbidi Sefaradi dogu nni,
Bani mo baa diedi ganu po yaa dogi.
21Bi faabikaaba baa do Siyon juali po,
Ki diedi Edomi juali.
O Diedo wani o ba n baa tua o bado!
Currently Selected:
Abidiasi 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
