Jonasi 2
2
Jonasi jaandi o jamo tugu nni
1O Diedo den teni ke o janciamo cua ki nali Jonasi. O den tieni o jamo yeni tugu nni danataa leni ñiaditaa. #Mat 12.40. 2Jonasi den jaandi o Diedo o Tienu o jamo tugu nni, 3ki yedi:
«N paboanli nni, n jaandi ki mia fini o Diedo,
Ke a gaa n miabu.
Hali bi tinkpiba diema nni,
N den kpaani ki mia ŋa,
Ke a gbadi n nialu.
4A den luni nni mi ñincianma nni,
Hali mi ñima tugu nni.
Mi ñima den gaani ki lindi ki cebini nni.
A ñingola leni a ñinguona kuli,
Den milini nni.
5N den tua:
‹A deli nni ke n foagidi leni a,
Ama n baa suagi ki yaa diidi a jaandiegagidikaale.›
6Mi ñima den pundi hali n niali,
Ke u kulu ñima den lindi ki cebini nni,
Ke ti ñinmuadi mo fini n yuli.
7N den jiidi ki pundi
Hali a juana tanpuuna kani,
Bi tinkpiba kaanu buliñoana den luoni nni,
Ke n kan fidi ki ña abada.
Ama o Diedo n Tienu,
A teni ke n ñani
U kulu yeni niinni leni li miali.
8N fidu n den gbeni,
Ke mi kuuma dia nni yaa yogunu,
N den tiadi fini o Diedo po,
N miabu den pundi a kani,
Hali a jaandiegagidikaali nni.
9Yaaba n ŋua i buli,
Yii n tie fanma fanma,
Faabima ki ye bi po.
10Ama mini n ba yaa yiini
Ki jaandi a, ki padi a po a pada,
Ki go kuandi min den niani a
Yaa ñoaniani.
Fini o Diedo, mi faabima kuli ña a kani.»
11O Diedo den teni ke o jamo yeni,
Sii Jonasi li wali po.
Currently Selected:
Jonasi 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
