Hebilunba 1
1
Jesu Kilisiti n tie U Tienu doagidima cain
1.1—4.13
U Tienu maadi o Bijua ñoabu nni
1Hali yogu, U Tienu den lindi ki maadi ti yaajanba bi saawalipuaba ñoana nni leni mabuoli boncianla. 2Ama moala, mi juodima dana nni, o maadi leni ti o Bijua yaa ñoabu nne. O tagi li ŋandunli kuli o yaa niinne, ki bili ke wan diedi li bonla kuli. 3Wani Bijua yeni n yadi U Tienu kpiagidi yenma. U Tienu n tie maama, o Bijua moko tie yene cain. O go kubi mi tagima kuli ke mi ye kelima o maama paalu po. Wan den soani ti tuonbiadi ŋuudiñanma tuonli ki dudi, o den kali hali tanpolijoma, U Tienu yua n pia ti kpiagidi jienu po.
U Tienu Bijua n cie malekinba maama
4Bijua den tua yua n pia ti kpiagidi ki cie malekinba, nani wan baa yaa yeli, n pia ti kpiagidi ki cie bi yaa yela maama. 5U laa yogunu yo ke U Tienu maadi leni o malekinba siiga ba yendo ki yedi o:
«A tie n Bijua,
Mini n mali a dinla?»
U laa yogunu yo ke o maadi malekoba maama ki yedi:
«N baa yaa tie a Baa,
Amo baa yaa tie n bijua?» #Ps 2.7; 2Sam 7.14; 1Baj 17.13.
6Ama U Tienu n soani o Bijakpiaga ŋanduna nni yaa yogunu, o go yedi:
«U Tienu malekinba kuli n kpiagi o.» #Tia 32.43.
7Wan maadi malekinba po, o yedi:
«O teni ke o malekinba
Tua nani u faalu yeni,
Ki go teni ke o naacenba tua mupienu.» #Ps 104.4.
8Ama wan maadi o Bijua yaa maama, o yedi:
«Fini U Tienu, a bali kalikaanu
Baa yaa ye hali yaa yogunu kuli,
A badigbiamu mo tie mi teginma gbiamu. #Ps 45.7-8.
9A bua mi teginma,
Ki nani mi biadima.
Li tie lani yaa po, fini U Tienu, ke a Tienu gandi a
Ki wuli a yuli po li pamanli kpama,
Ki teni ke a pia ti jigidi ki cie a lieba.»
10O go yedi:
«Fini o Diedo, hali mi cilima,
A den puu ki tinga tanpuuli.
Tanpoli mo tie a yaa tagime. #Ps 102.26-28.
11Lani kuli baa bodi,
Ama fini wani, a baa yaa ye.
Likuli baa kpeligi,
Ki cadi nani li liadili yeni.
12A baa koli koli la nani bu kpalibu yeni,
Likuli n lebidi nani o nilo
N lebidi o liadili maama.
Ama fini, a tie yenma yogunu kuli,
A bina mo ki pia gbenma abada.»
13U laa yogunu yo ke U Tienu go maadi leni o malekinba kuli siiga, ba yendo ki yedi:
«Kali n jienu po,
Hali min guli a yibalinba ŋan ŋmaa ba?» #Ps 110.1.
14Malekinba yeni kuli ki tie fuoma, yaaba n tuuni wani U Tienu po ka? O tuuni bane ke bi todi mi tindima faajieba.
Currently Selected:
Hebilunba 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
