Filemon 1
1
I fuondi
1Mini Poli yua n tie kpaadili kelima Jesu Kilisiti po leni ti kpiilo Timote, n diani li tili fini Filemon ti buado leni ti tuonsoanlielo po. 2Ti go diani li ti kpiilo Apiya,#1.2 Apiya: Gireki maama nni laa yeli doagidi ke o tie pua. Alikipa ti minteelilieli o Diedo toabu nni leni Kilisiti Nitaanli, yaali n taagi fini Filemon diegu nni kuli po. #Kol 4.17. 3Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.
Poli tuondi U Tienu Filemon po
4N tiadi a po yogunu kuli n jaandi nni, ki tuondi n Tienu 5kelima bi wangi nni ŋan pia yaa dandanli o Diedo Jesu po leni ŋan pia yaa buama bi nigagidiŋanba po. 6N miadi U Tienu ke ŋan pia yaa taanyenma leni ti kelima li dandanli yaa po, n yaa pia mayuli, ki teni ŋan bandi tin pia yaa seli kelima tin ye leni Kilisiti yeni po. 7N kpiilo, a buama yeni mangi n pali ki go baagi nni boncianla, kelima a duandi bi nigagidiŋanba yama.
Poli n mia Filemon yaa miabu Onesimi po
8Lanwani, ba ke n pia u sanu kelima Kilisiti po ki puogi a yaala n pundi, 9yaala n mani n po ki cie tie ki mia ŋa bu miabu, kelima mi buama yaa po. Mini Poli, yua n tie jakpelo ki go tie kpaadili moala kelima Jesu Kilisiti po, 10n mia ŋa bu miabu n biga Onesimi po, min mali yua ti kpaadi nni. #Kol 4.9. 11Waa den kpa pia a po fuoma, ama moala o pia ma a po, ki go pia ma mini mo yaa po. 12N soani o wan guani a kani. O tie nani n boagidi mini n ba yeni ki soani a kani.
13N den bua wan bi yaa ye n kani ki gaa a kaanu, ki yaa todi nni min ye ti kpaadi nni kelima o Laabaaliŋamo po yaa yogunu. 14Die mii den bua ki tieni liba, kali min kpa buali a ki bandi ŋan jagi yaala, ke a ŋanma n da tie nani u paalu yeni ka, ama lan yaa tie a yama po yo. 15Daalinba o den paadi leni a u yogunu waamu, ke ŋan guani ki gaa o wan yaa ye leni a hali yaa yogunu kuli. 16Moala a kan go yaa nua o ke o tie yonbo ka, ama ke o ji cie yonbo. O tie a kpibuado. O tie yeni mini yaa po, ki baa yaa tie yeni fini yaa po ki cie, ti gbanandi nni leni o Diedo nni.
17Lanwani, a yaa nua ke n tie a danli, ŋan gaa o nani ŋan bi baa gaa mini maama. 18Wan bii a po yaala leni wan pia a po yaa panli, ŋan coadi la ke li tie n yaa panli. 19Mini Poli n diani yaa maama n tie ne leni n nuceli, mini n ba n baa pa ŋa la. N kan maadi fini a ba n kubi n po yaa panli, lani n tie ke a pia li miali kelima n yaa po. 20Lanwani, n kpiilo, tieni n po laa ŋanbili kelima o Diedo po. Duani n yama Kilisiti nni.
21Min diani lani kuli yeni, n dugi a po ke a baa tuo ki tieni min yedi yaala, ki go bani ke a baa tieni, ba ki cie min yedi yaala.
22Ŋan go ŋanbi n po li candieli mo, kelima n sugini ke U Tienu n guani nni yi kani kelima yi jaandi po.
Mi majuodikaama
23Epafrasi, mini leni yua n taa ki ye li kpaadidieli nni kelima Jesu Kilisiti yaa po, fuondi a. #Kol 1.7; 4.12. 24N tuonsoanlieba Marki, Arisitarki, Demasi leni Luki moko fuondi a. #JTT 12.12,25; 13.13; 15.37-39; 19.29; 27.2; Kol 4.10,14; 2Tim 4.10,11.
25O Diedo Jesu Kilisiti yaa ŋanbili n yaa ye leni yi.
Currently Selected:
Filemon 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
