Hebilunba 2
2
U Tienu n puni yaa faabicianma
1Lani yaa po, li pundi tin fangi ti yula ki cie mi kpiama, ki kubi tin den gbadi yaa maama bonŋanla, ki da ti yaadi ki ŋaa ma. 2Ti bani ke malekinba n den wangi yaa maama, den sedi bonŋanla, ki go tiendi mo. Yua n den miidi kaa tuo ki ŋua man bili yaala kuli, den baadi yaa panpaani n dagidi. 3Lanwani, ti yàá fangi laa faabicianma, o Diedo wani o ba n den kpa waani ti yaama, ti baa tieni lede ki sani ki cia o cuonu? Yaaba n den gbadi laa maama o Diedo ñoabu nni, mo den tieni ti po siedi ke mi tie moamoani. 4U Tienu moko den ñii bi siedi leni sinankeeninba, li bonlidinkaala, yaa bancianma buoli n yabi leni U Tienu Fuoma Yua paabu, nani wan bua maama.
Jesu n gobidi bi niba mi tindima po
5U Tienu ki puni malekinba yaa ŋanduna n kpendi nne, tin maadi yua yaa maama. 6I Diani nni, li yedi:
«U Tienu, o nisaalo tie be ke a tiani o po?
O nisaalo n mali yua,
Tie be ke a kubi o bonŋanla,
Ki lani o ti kpiagidi leni ti jigidi? #Ps 8.5-7.
7A den jiini o u yogunu waamu,
Ke malekinba cie o,
Ki yilini o ti pagidi
Leni ti kpiagidi bonyilikaala.
8A teni ke o diedi likuli,
Nani u bonŋmaakaanu yeni.»
U Tienu n den dini o nisaalo li bali ke o die li bonla kuli yeni, waa ŋaa liba kuli ke waa die la. Ama ti daa laa ke o die likuli. 9Die ti laa Jesu, U Tienu n den jiini yua u yogunu waamu ke malekinba cie o, ki puni o ti pagidi leni ti kpiagidi, ki go dini o li bali kelima wan den laa fala ki kpe yaa kuuma po. O den kpe bi niba kuli po, kelima U Tienu ŋanbili po.
10Li den dagidi ke yua n tagi li bonla kuli leni li bonla kuli n ye yua yaa po, n lingi ki taani bila boncianla o kpiagidi nni. Lanwani, o den sua ke li pundi wan dagidi ki yaa ŋani cain, ki faabi ba kelima o fala po. 11Jesu yua n gagidi ki ŋanbidi bi niba U Tienu po leni wan gagidi yaaba yeni kuli, taa Baayendo. Li tie lani yaa po ke waa jie i fe ki yini ba o waamu, 12wan den maadi ki yedi:
«N baa waani n waamu a yeli,
Ki yiini ki pagi a li nitaanli siiga.» #Ps 22.23.
13O go yedi:
«N baa yaa dugi o po.»
Ki go yedi:
«Mini nne! Mini leni U Tienu
N puni nni yaa bila.» #Esa 8.17-18.
14A bila n tie nisaaliba ki pia ti gbanandi leni mi soama yeni, Jesu moko den tua nisaalo, ki pia ti gbanandi leni mi soama. O den tua yeni ki kpe, ke o kuuma n bolini Sutaani paalu, wani yua n pia mi kuuma paalu. 15O den tieni yeni ki baa faabi mi kuuma jawaandi n den kubi yaaba ti yonbidi nni, bi yema kuli nni. 16Li doagidi cain ke waa den cua ki baa todi malekinba ka. Ama o den cua ki baa todi Abalahama buolu yo. 17Lani yaa po, li den tie tiladi wan tua nani o waamu yeni li bonla kuli nni. Yeni, o baa yaa tie yaa kopadicianba bado n gba bi po mi ninñima, ki go tie o nidugika wan tuuni bi po yaa tuonli U Tienu kani leni wan go den padi i candanbaani padili ki baa sugili bi niba tuonbiadi po maama. 18O baa fidi ki todi ban tulini yaaba, kelima wani o ba den laa fala ban tulini o yaa yogunu.
Currently Selected:
Hebilunba 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
