Mi Ñama 5

Musa leni Alono gedi Faraon kani

1Lani n pendi, Musa leni Alono den gedi Faraon kani ki yedi o: «Li Miali Diedo Isidayeli Tienu yedi: ‹Cedi n niba n gedi mi fanpienma nni, ki ban tieni n po mi jaanma.› » 2Faraon den yedi: «Li Miali Diedo tie ŋme yo ke n baa tuo ki ŋoadi o maama, ki cedi Isidayeli yaaba n gedi? Mii bani Li Miali Diedo, n kan tuo Isidayeli yaaba n gedi mo.»

3Bi den yedi: «Hebilu yaaba Tienu den doagidi ti kani. Pa ti tin cuoni danataa cenli mi fanpienma nni, ki ban padi Li Miali Diedo ti Tienu po a pada. Yeni yàá ka, o baa ti pua ti leni yianbiaduba bi bu toabu.» 4Ejipiti bado den yedi Musa leni Alono: «Be yaa po yo ke yi jidi bi niba bi tuona nni? Guani mani yi tuona po!» 5Faraon den yedi: «Moala, diidi laa niba yabi boncianla mi diema nni, ke yi teni ke bi jidi bi tuona.»

Faraon pugini Isidayeli yaaba tuonli

6Landaali Faraon den ñani li ñoamabonli Ejipiti tuonsoan-canbaanba leni Isidayeli tuonsoanguuda po, ki yedi ba: 7«Yi kan go pa bi niba ŋalikama muadi ke ban pua i tankonkuomi, nani ban den kpa baadi maama. Ban gedi bani bi ba ki wodi ti muadi. 8Ama ba yeni, yi baa teni ban pua i tankonkuomi lan pundi ban den kpa pua yaa banlu, yi kan wadi yi bi po ba waamu. Bi tie kpadijedanbe, lani yaa po yo ke bi cua ki yedi: ‹Tin gedi ki ban padi ti Tienu po a pada.› 9Yin teni li tuonli n gbadi ba, ban kuani bi yama li niinni. Yeni, bi kan go cengi ban pua ba yaa faama.»

10A tuonsoanjiidi-nikpela leni a tuonsoanjiidibila den gedi ki waani bi niba laa maama, ki yedi ba: «Faraon yedi yi yaa maama n tie ne: ‹N kan go pa yi ŋalikama muadi. 11Yin gedi yinba yi ba ki baa ti muadi, yin baa le ti naankani kuli. Bi kan wadi yi po yi tuonli mo ba waamu.› »

12Bi niba den yadi ki gedi hali Ejipiti diema nni kuli, ki lingi mi muayoma ke mi tua bi po ŋalikama moacekaadi. 13Bi tuonsoan-jiidinikpela den tigini ba, ke ban soani ki gbeni daali kuli tuonli, nani ban den pia ŋalikama muadi yaa yogunu yeni. 14Li den biagi hali yaala ke bi den pua Isidayeli yaaba guudikaaba, Faraon yaa tuonsoanjiida n den teni ke yaaba n die Isidayeli yaaba yeni. Bi den yedi ba: «Be yaa po, ke wonli leni dinla kuli, yii pua i tankonkuomi nani ban bili yi po maama.»

15Isidayeli yaaba guudikaaba den gedi ki yenbidi Faraon kani ki yedi: «Be yaa po ke a tieni a naacenba line? 16Baa go puuni a naacenba ŋalikama muadi nani kpiama yeni. Ama ba leni lani kuli, bi yedi: ‹Pua mani i tankonkuomi.› Bi pua a naacenba nani ti tie i tagili danba yene, ke ti naa nani, baa tegindi ba waamu.» 17Faraon den guani ki yedi ba: «Yi tie kpadijedanba. Yi li tie kpadijedanba bebe! Lani n teni ke yi yedi: ‹Tin gedi ki padi Li Miali Diedo po.› 18Lanwani, moala, guani mani yi tuonli po. Bi kan go pa yi ŋalikama muadi, ama yin go yaa pua i tankonkuomi nani ban den bili yi po maama yeni.»

19Ban den waani ba, ke bi kan wadi bi po daali kuli tankonkuomi coali, Isidayeli yaaba guudikaaba den bandi ke bi baa le fala. 20Ban den ñani Faraon kani, bi den tuogi Musa leni Alono, yaaba n den guu ba.

21Bi den yedi ba: «O Diedo nua yi, wan jia yi buudi. Yinba n teni ke ti fa Faraon leni o naacenba po. Yi mubini ba ki jugisiega ke ban kpa ti.» 22Musa den guani o Diedo kani ki yedi o: «N Diedo, be yaa po ke a faligidi bi naa niba? Be yaa po ke a soani nni? 23Hali min gedi Faraon kani ki maadi leni o a yeli nni, o faligidi laa niba. Amo nan daa faabi a niba hali moala.»

Currently Selected:

Mi Ñama 5: BGP

Highlight

Copy

Compare