Mi Ñama 39

Bi kopadicianba tialakaadi: li cabilakaali

1Bi den luni bi kopadicianba tialakaadi yaadi n gagidi u kaangagidiŋamu tuonli po leni yaa caba n moani ki suudi ki ŋmadi leni yaa gaali n moani colicoli. Bi den tieni Alono po yaa tiadi n gagidi ki ŋani nani o Diedo n den puogi Musa maama. 2Bi den tieni li cabilakaali leni wula, yaa gaali n moani ki suudi ki ŋmadi leni yaa gaali n moani colicoli leni len gaali caba ya luni bonŋanla. 3Bi den duadi wula ki nandi o bonpabimu pabinu, ki buadi buadi o nani i gaali yeni. Bi den taa o ki ŋmadi leni yaa caba n moani ki suudi leni ya moani colicoli, ki taani leni len gaali yii juagi bonŋanla. Lani kuli den tie tuonsoanbando yaa tuonli. 4O den baa mu cabimu ki loli ki joani o boacabilieda kani. 5Yaa gaali kuli n den taani ki loli li cabilakaali li baa, likuli den taani ki tie yenma leni li cabilakaali, ki ŋoadi nani U Tienu n den bili Musa po maama, wula den ŋmadi leni yaa gaali n moani ki suudi, yii moani colicoli leni len gaali. 6Bi den kpie onigisi tana ya n den ye wula tuadi nni. Bi den diani a tana yeni po Isidayeli yaaba buoli yela, nani bi niba n yen diani bi yela a tana po maama yeni. 7Bi den maani laa tanmu a boacaba cabilakaali kaanu, lan yaa tie a tantiadikaana Isidayeli yaaba po, nani o Diedo n den puogi Musa maama yeni.

O kopadiciamo bencabili n tie maama

8Yaaba n bani li tuonli bonŋanla den luni li bencabili, ki kpaa li leni len gaali, yii n juagi ki ŋmadi leni yaa gaali n moani ki suudi, ki moani colicoli, nani li cabilakaali n tie maama leni wula. 9Li bencabili yeni foaginu leni li pianu kuli den de yenma, ki tie nubadiyaagiyengu. Bi den cuo li ki poali ki lebini milie. 10Bi den tieni li po tanfuudinaa: u fuudikpialu den tie sariduani, topasi leni emerodi. 11U fuudilielu n yaa tie esikabukili, safiri leni diama. 12U fuuditaalu n yaa tie opali, agati leni ametisi. 13U fuudinaalu mo n yaa tie kilisoliti, onigisi leni jasipe. Laa tana kuli den suali wula yaa bontuadi nne. 14Bi den diani tanli kuli po Isidayeli yaaba buoli siiga yendo yeli, nani bi niba n yen dangi bi yela a tana po maama yeni. Laa tana den tie piiga n tanalie, ki tie nannanli maalima Jakob piiga n bijaliediba po.

15Li bencabili po, bi den duadi i laani leni wulamoano, ki pali nani i baabi yeni. 16Bi den tieni wula tuadi bondilie leni wula ñoagibilalie, ki joani a ñoagibilieda yeni li bencabili juodiliedima kani. 17Bi den taa wula baabiliedi yeni, ki tuuni a ñoagibilieda, ki joani li bencabili juodiliedima. 18Bi den taa yaa baabiliedi n sieni ñoagibilieda, ki tuuni a yaa wula tualiediti n den maa li cabilakaali boacaba kani, nintuali po. 19Bi go den duadi wula ñoagibila bonalie, ki tieni a li bencabili juodiliedima, ke li dieni leni li cabilakaali, ki goa tugu po. 20Bi go den duadi a ñoagibila leni wula, ki taa ŋa ki kubini li cabilakaali tiipo a boacaba kani, ki goa nintuali po, ki kuu leni li cabilakaali baabi n luo naankani, li cabilakaali gbanñagidigu tanpoli. 21Bi den tugini li bencabili ñoagibila, li cabilakaali yaa ñoagibila leni yaa baabu n moani ki suudi, ki den tieni maama ke li bencabili baa yaa maa li cabilakaali gbanñagidigu po. Lani n tie ŋan yaa liebi ki da paadi leni aya, nani o Diedo n den yedi Musa n tieni maama.

Yaa tiayiekaadi n sieni ki gagidi

22Bi den luni li cabilakaali liadili leni yaa caba n moani ki suudi. 23Li liadili siiga nni, bi den jia u liadinialu li yuli n baa ña naani. Bi den luni ki kpaa u liadinialu yeni ke wun da padi. 24Li liadili tiipo, bi den luni ki kpaa ki gaani ki lindi, ki tagi li po grenadi bonluonkaala leni ti pekobidi, ke ti moani ki suudi, ki moani colicoli leni len gaali, yii n juagi ki go ŋani. 25Bi den duadi wulamoano coolonbimu ki joani mu li liadili tiipo, ki sagini wula coolonbimu yeni grenadi bonluonkaala siiga nni. 26Grenadi bonluonkaala leni mu coolonbimu yeni den sagini ki ŋmadi ki gaani ki cebini li liadili. Li den tie yene laa tuonsoanliadili po, nani o Diedo n den puogi Musa maama yeni.

27Bi den luni a liada Alono leni o bijaba po leni len gaali yii n ŋani. 28Bi go den luni bi finfinjuadi, bi fogilimu yaamu n doagidi bi gagidima, bi kpataana leni len gaali yii juagi ki go ŋani. 29Ku gbanñagidigu yaagu n kpaa ki ŋani ki ŋmadi leni ti pekobidi ke ti moani ki suudi, ki go moani colicoli nani o Diedo n den puogi Musa maama yeni.

30Bi den tagi yaala n baa yaa tie mi gagidiŋanma maalima. Bi den tagi leni wulamoano, ki den tie bonpanpangu nani li bonlakaala yeni. Bi den diani li po nani o nilo n yen diani o maalima maama yeni. Ban den diani yaa diani den tie: “Bi gagidi la Li Miali Diedo po yo.” 31Bi den taa mi gagidiŋanma maalima yeni, ki loli la ti finfinjuadi po leni yaa gaalu n moani ki suudi, nani o Diedo n den puogi Musa maama.

Bi cua ki waani Musa ke li tuonli gbeni

32Lanwani, U Tienu gbandieli tuonli leni u Kadikaanu Gbandieli tuonli kuli den gbeni. Isidayeli yaaba den tieni o Diedo n den puogi Musa yaa tuona kuli. 33Bi den cuani U Tienu gbandieli Musa kani. Li gbandieli leni li tiabidi bidi kuli: i bongobidi, ti dapagidi, ti kpalidoaginkaadi, a dasaana leni a bunbuna. 34A petona gbandi yaadi n tuu ki moani moani, yaa gbandi n nugi ki juagi, bu kpalidoaginkaabu, 35Ku ŋantaadikpaku, ku dopandi leni ku biili kuli, 36tabili, o tiabidi bidi leni o dupengagidika. 37U fidisantuankaanu ke ukuli tie wulamoano, mu fidisanmu, mu tiabidi bidi leni mi fidisankpama mi cuonma po. 38Wula padibinbinli, mi kpagagidikaama, tulale yua n baa juu, bu kpalidoaginkaabu li gbandieli buliñoatuogili po, 39ti kumoandi padibinbinli leni li kumoanganbu, li dopandi leni li tiabidi bidi, ku tadigu leni ku tuankaanu, 40u luolu caba, u dasaana, u bunbuna, u kpalidoaginkaabu yaabu n ye u luolu buliñoabu kani, li baabi leni li kpaana kuli, yaa tuonsoantiadi n baa soani u Kadikaanu Gbandieli kuli nni leni U Tienu gbandieli nni, 41yaa tiadi n gagidi ki tie bi kopadicianba n baa la yaa tiadi ki kua u kaangagidiŋamu nni, Alono leni o bijaba tiadi yaadi n gagidi ki ye li kopadiciantuonli po. 42Isidayeli yaaba den soani laa tuona kuli ki ŋoadi nani o Diedo n den puogi Musa maama yeni. 43Musa n den laa ke a tuona kuli cuoni nani o Diedo n den bili maama kap kap, o den gaali Isidayeli yaaba.

Currently Selected:

Mi Ñama 39: BGP

Highlight

Copy

Compare