Mi Ñama 40

Bi puogi ban sieni li gbandieli ki go gagidi li

1O Diedo den yedi Musa 2«O ŋmakpialo dakpiali, ŋan sieni li gbandieli, u Kadikaanu Gbandieli. 3Ŋan kuani siedi maama kpaku lienni, ki doagini ku kpaku yeni bu kpalidoaginkaabu. 4Lani yaa pendi, ŋan taa ti tiadi maankaanu ki kuani li dieli nni, ki maani ku po ku yaa tiadi, ki caligi ti nani lan dagidi maama. Ŋan taa u fidisantuankaanu moko ki kuani lienni, ki tuani mu fidisanmu. 5Ŋan taa yaa padibinbinli n tie wula, ban yen juugi tulale, yua yaa nuulu n mani naankani, ki sieni li, li gbandieli nintuali. Lani, ŋan joani kpalitoabu li dieli buliñoabu. 6Ŋan sieni a padijuukaana binbinli li dieli buliñoabu nintuali, lani n tie u Kadikaanu Gbandieli nintuali. 7Ŋan taa ku ñinniditiagu ki sieni u Kadikaanu Gbandieli buliñoabu leni a padijuukaana padibinbinli siiga, ki kuodi mi ñima lienni. 8Lani, ŋan caani ti daadi ki joani ti kpaliti ki lindi ki cebini li dieli fanma, ki go joani ku diegu buliñoabu bu kpalibu.

9Li yaa puoli, ŋan taa mi kpagagidikaama ki cabi li gbandieli po leni yaala n ye li niinni kuli po, ki gagidi n po li gbandieli leni li tiadi kuli. Laa gbandieli baa gagidi mini yaa po. 10Ŋan wuli mi kpama a padijuukaana padibinbinli po leni li tiabidi kuli po, lani n tie ŋan gagidi ki ŋanbi li padibinbinli. Lani, li baa gagidi ki ŋanbi cain. 11Ŋan cabi mi ŋuudima tadigu po leni ku tuankaanu po, ki gagidi ki ŋanbi ku.

12Li yaa puoli, ŋan teni Alono leni o bijaba n cua ki pundi u Kadikaanu Gbandieli buliñoabu kani, ki taa mi ñima ki wali ba. 13Ŋan lani Alono yaa tiadi n gagidi n po, ki cabi o yuli po mi kpagagidikaama, ki gagidi o mini U Tienu po, ke wan kua o kopadiciamo tuonli nni, ki yaa tuuni n po. 14Ŋan teni o bijaba mo n nagini a kani, ŋan lani ba a liada, 15ki wuli bi yula po mi kpama ki gagidi ba, nani ŋan tieni bi baa maama yeni. Lani n tie ban yaa tuuni n po li kopadiciantuonli. Laa kpawulima bi yula po baa teni yaa yogu n tuu yaa yogu, ban yaa die li kopadiciantuonli nifiima n tuu nifiima.»

Musa teni ke bi sieni li gbandieli

16Musa den tieni o Diedo n puogi o yaala kuli nani wan den puogi o maama. 17Li binlieli ŋmakpialo dakpiali, bi den sieni li gbandieli ki gbeni. 18Musa n den tii U Tienu gbandieli, o den tieni a bunbuna, ti dapagidi, ki joani yaa caba n poandi poandi, ki sieni a dasaana. 19O den tandi li gbandieli caba U Tienu gbandieli po. Ama yaali n den baa pini likuli den maa tanpoli yo nani o Diedo n den puogi Musa maama yeni. 20Musa den taa li bali maama tanpabimu ki kpieni mu ku kpaku nni. O den taa i dopandi ki tuuni yi ku kpaku nni, ki biini gu ku biili.

21O den kuani ku ŋantaadikpaku U Tienu gbandieli nni. O den taa li cabili ki joani li ke li baa tua cabidoaginkaali. O den pigini ku kpaku nani o Diedo n den puogi o maama yeni.

22O den bili tabili u Kadikaanu Gbandieli nni, ki goa li gbandieli jienu po, li cabili puoli po. 23O den kua ki caligi tabili po dupen o Diedo nintuali, nani o Diedo n den puogi Musa maama yeni. 24O den kua ki sieni u fidisantuankaanu u Kadikaanu Gbandieli nni, ke u se ki tiegi tabili U Tienu gbandieli ganu po. 25O den ŋanbi mu fidisanmu o Diedo nintuali, nani o Diedo n den puogi Musa maama yeni.

26O den taa wula padibinbinli ki tieni u Kadikaanu Gbandieli nni, li cabidoaginkaali nintuali. 27O den yuandi ki teni ke bi juu tulale li po, nani o Diedo n den puogi Musa maama. 28O den taa li cabidoaginkaali ki pigini U Tienu gbandieli buliñoabu. 29O den sieni a padijuukaana padibinbinli U Tienu gbandieli buliñoabu kani leni u Kadikaanu Gbandieli kani. O den padi li po li padijuukaali leni bu paabu padili, nani o Diedo n den puogi Musa maama yeni.

30O den sieni ku tadigu u Kadikaanu Gbandieli leni li padibinbinli siiga, ki kuodi ku niinni mi ñima mi nidima po. 31Musa, Alono leni o bijaba den nigidi bi nii leni bi taana lankane. 32Bi yaa den kua li gbandieli nni ki nagidi li padibinbinli, bi yen wali nani o Diedo n den puogi Musa maama yeni. 33O den tii u luolu yuu n gaani ki lindi U Tienu gbandieli leni li padibinbinli, ki taa bu kpalidoaginkaabu ki joani u luolu buliñoabu kani. Musa den tieni yene, ki gbeni a tuona kuli.

O Diedo kpiagidi gbieni u kaangagidiŋamu

34Lanyogunu, ku tawaligu den cua ki yilini u Kadikaanu Gbandieli po. O Diedo kpiagidi mo den gbieni u kaangagidiŋamu.#1Bad 8.10-11; Esa 6.4; Esk 43.4-5; Doa 15.8. 35Musa kan den fidi ki kua u Kadikaanu Gbandieli nni, kelima ku tawaligu den baa ki ye li po, ke o Diedo mo yaa kpiagidi den gbieni u kaangagidiŋamu.

36Isidayeli yaaba yen fii ki suagi liiga, yaa yogunu ke ku tawaligu yen yindi u kaangagidiŋamu gbandieli po. 37Ku tawaligu yàá fii, bani moko ki yen fii hali ku tawaligu n baa n fii yaa daali. 38O Diedo tawaligu den ye u yensiinu U Tienu gbandieli po, ku ñiagu mo u mu n yen yiini li po, ki yendi Isidayeli yaaba. Li den tie yene li sancenli kuli nni po.

Currently Selected:

Mi Ñama 40: BGP

Highlight

Copy

Compare