Mi Ñama 38

A padijuukaana leni mi ŋuudiŋanbima tadigu

1A padijuukaana padibinbinli po, bi den kpie li padibinbinli leni akasia tiidi daadi. Li padibinbinli yeni pianu leni li foaginu kuli den da yenme. Li foaginu den tie nukpanduna muu, li pianu nukpanduna muu, li kpedima mo den tie nukpanduna taa. 2O den tieni li padibinbinli yina ke a yuugi. Lani leni li yina yeni kuli den taani ki tie yenma, ke bi boali likuli leni ti kumoandi. 3O den tagi li padibinbinli tuonsoantiadi kuli, li pelinba, li tadiñokaamu, li nanjogidi, li fantanpaditiadi leni li babimu kuli. Laa tiadi kuli den tieni leni ti kumoandi. 4O den tagi li padibinbinli siiga nni ke li tie nani i taali yeni. 5O den duadi ñoagibilanaa, ki tieni a i kumoangandi logidinaadima nni, ban baa soali akasia dopandi naani. 6O den kpie akasia dopandilie ki boali yikuli ti kumoandi. 7O den tuuni laa dopandi a ñoagibila ya n ye li padibinbinli kali nni, yii n den baa todi li tugima po. Li padibinbinli yeni den tie dapagidi, ke tugu n nni tie bonlongu.

8O den tagi ti kumoandi tadigu, ke ku tuankaanu moko tie kumoandi. O den tagi laa bonla kuli leni yaa puoba n den tuuni u Kadikaanu Gbandieli buliñoatuogili kani yaa madiiditi.

U luolu caba

9O den tii u luolu ke u goa nuganu po. U luolu yeni niinni den pia a caba ke a tie len gaali, ke a den pundi nukpanduna kobiga. 10U go den pia dasaana piilie leni u bunbunpiilieda, ke a tie kumoandi. A dasaana yeni bongobidi leni u cabijoankaanu kuli den tie ŋanjilifa. 11Yaala n goa nujienu po yaa caba den pia nukpanduna kobiga, dasaana piilie leni bunbuna piilie, ke likuli tie kumoandi. A dasaana bongobidi leni u cabijoankaanu kuli den tie ŋanjilifa. 12Nintuali po den pia yaa caba n pundi nukpanduna piimuu, ki pia dasaana piiga leni bunbuna piiga. A dasaana yeni bongobidi leni li cabijoankaanu kuli den tie ŋanjilifa. 13Puoli po, ki goa u kuakaanu po, u luolu den pia nukpanduna piimuu. 14U luolu kaliyendu den pia yaa caba ke a foaginu pundi nukpanduna piimuu, dasaanataa leni bunbunataa. 15Yaa kalu n tiegi leni laa kalu ki goa bu buliñoabu puoli po, a caba foaginu den pundi piiga n nukpanduna muu, ki pia dasaanataa leni li bunbuntaada.

16Yaa caba n den gaani ki cebini u luolu tugu po kuli, den tie len caba yaa juagi ki go pa. 17A dasaana bunbuna den tie kumoande. A bongobidi leni li caba joankaanu kuli, den tie ŋanjilifa. Bi den boali a yula leni ŋanjilifa. Ŋanjilifa cabijoankaani n den loli ki tugini u luolu dasaana leni aya. 18U luolu buliñoabu kpalidoaginkaabu den tie yaa kpalibu n ñoalini ki ŋani, bu den luni ki kpaa ki moani ki suudi, ki moani colicoli, ki tie len caba, ya n juagi ki pia u paalu. Bu foaginu den tie nukpanduna piilie, bu kpedima mo den tie nukpanduna muu, ki pia nani u luolu caba n den pia ki da maama yeni. 19A dasaanaada leni a bunbunaada kuli den tie kumoande, i bongobidi leni i cabijoankaanu den tie ŋanjilifa, a dasaana yula moko den boali leni ŋanjilifa. 20U luolu kpaana ya n gaani ki lindi u kaangagidiŋamu leni u luolu kuli den tie kumoandi.

Ban soani leni yaa kudi n da maama

21Diidi yaa kudi banlu n den kua li gbandieli ŋanbima nni, ku ŋantaadikpaku n den baa yaa ye naani. Nani Musa n den bili maama, Levi buolu yaaba n den coadi, ki ŋoadi Itamari, Alono bijua n den gobidi ba maama. 22Betisaleeli, Uri bijua, Huri yaabili, Juda buolu yua n den tieni o Diedo n den puogi Musa yaala kuli. 23Yua n den pugidi o po den tie Oholiabi Ahisamaki bijua, yua n tie Dan buolu yua. O den bani ti kpiedi, ki bani ki diani ki tagi li bonla. O go den bani ki ŋali ki kpaa yaa caba n moani ki suudi po, ya moani colicoli leni len caba ya n hali ki pa po. 24Yaa wula kuli n kua u kaangagidiŋamu tuona po n da maama: kilo kobinii n piilele n bonbilele leni kujapiena kobitaa nani U Tienu diegu nni bonbiigikaala n tie maama.

25Yaa ŋanjilifa ke bi den ban baa, ban coadi yaa niba kani kuli, den taani ki tie kilo tudataa n piiga n bonbilele (3 017) leni grami kobilele n bonba piimuu nani U Tienu diegu nni bonbiigikaala n tie maama.#Ñam 30.11-16. 26Yaa niba n den kua li coali nni kuli, den pundi kobiluoba n tudataa n kobimuu n piimuu (603 550). Bikuli den pundi bina piilie bi ki cie moko. Bi siiga, niyendo yendo kuli den lubi ŋanjilifa kujapienli boagidima.#Mat 17.24.

27Bi den taa ŋanjilifa kilo tudataa (3 000), ki tieni u kaangagidiŋamu bunbuna leni bu kpalidoaginkaabu bunbuna. Bunbuna kobiga yeni den dini ŋanjilifa kilo tudataa (3 000), lani n tie kilo piitaa bunbunyenli kuli po. 28Bi den taa ŋanjilifa piiga n kilonbilele leni grami kobilele n piimuu yaaba n sieni, ki tieni i bongobidi leni u cabijoankaanu a dasaana po, ki go boali a dasaana yula leni ŋanjilifa. 29Isidayeli yaaba n den puni yaa kumoandi den tie kilo tudalie n kobiga n piilie n bonbinaa (2 174). 30Bi den taa laa kumoandi ki tieni u Kadikaanu Gbandieli buliñoatuogili bunbuna, ti kumoandi padibinbinli, bu kumoanganbu leni li padibinbinli tiabidi kuli. 31U luolu gaanilindima bunbuna, u luolu buliñoabu bunbuna, ki taani leni yaa kpaana n gaani ki lindi li gbandieli leni u luolu kuli.

Currently Selected:

Mi Ñama 38: BGP

Highlight

Copy

Compare