Mi Ñama 37

Ku ŋantaadikpaku

1Betisaleeli den kpie ku ŋantaadikpaku leni akasia daadi. Ku foaginu den tie nukpanduna lie leni boagidima, ku pianu nukpandunyenli leni boagidima, ku kpedima mo nukpandunyenli leni boagidima. 2O den boali ku kuli leni wulamoano tugu nni leni niini kuli. O go den gaani ki kugini ku kuli leni wula. 3O den duadi ku kpaku yeni po wula ñoagibilanaa, ki tieni a ku logidinaadima kuli nni. O den tieni poyendu ñoagibilalie, ki tieni u poyuu ñoagibilalie. 4O den baa akasia dopandi ki boali yi leni wula. 5O den tuuni i dopandi yeni a ñoagibila ya n den ye ku kpaku kali yeni niinni, ku kpaku tugima po.

6O den duadi ku ŋantaadikpaku biili leni wulamoano. Laa biili foaginu den tie nukpanduna lie leni boagidima, li pianu mo nukpandunyenli leni boagidima. 7O den duadi selubanbilie leni wula ku ŋantaadikpaku biili juodima po. 8Selubanyendo den se li bonbiili juodiyenma po, o selubaniyua mo den se li juodiliema po. O den taani ki duadi li bonbiili yeni juodiliedima leni selubanba kuli yenma. 9Selubanba den yuugi bi fiabi tanpoli, bi den se ki tiegi biyaba ke bi fiabi piigi li bonbiili. Selubanba yeni nunjoma den pegidi ki nua li bonbiili.

Tabili leni o dupengagidika

10O den kpie o dupengagidika tabili leni akasia daadi. O foaginu den tie nukpanduna lie, o pianu nukpandunyenli, o kpedima mo nukpandunyenli leni boagidima. 11O den boali likuli leni wulamoano, ki go ŋoadi ki kugini o kuni leni wula. 12Ban den kugini ki gaani ki lindi o leni yaala, pianu den pundi nibilanaa, ki go den ŋoadi ki boali lani kuli leni wula. 13O den duadi wula tabili yeni po, wula ñoagibilanaa, ki tieni a kuli mi logidinaadima nni, a taanaada n se naani yeni.

14A ñoagibila yeni den ye i kunkune, ke bi yen tuuni a niinni i dopandi, ki nan fidi ki tugi tabili yeni. 15O den kpie i dopandi yeni leni akasia daade, ki boali yi leni wula. Laa dopandi n den baa todi tabili tugima po. 16O den ŋanbi yaa tuonsoantiadi n baa yaa ye tabili po, lani n tie mu tadimu, mu tadiñokaamu, mu tadibuomu leni mi cabima tiadi. Laa bonla kuli den tieni leni wulamoano yo.

U fidisantuankaanu leni u benleleedi

17Bi den tagi u fidisantuankaanu leni wulamoano, u taali leni u kankagili, mu tadiñokaamu, u puuma leni yaali n ŋoagini ma kuli den taani ki tuugi yenma. 18U den pia beniluoba ke yi ña u kali nni, u benjali kani, ganu leni jienu kuli den pia benitaa taa. 19Benu kuli den pia tadiñokaamutaa ke mu naani leni amandie bonluonkaala, mi puuma leni a ŋuada. Bento moko yaa po, li den pia tadiñokaamutaa ke mu naani leni amandie bonluonkaala leni mi puuma leni a ŋuada. Li den tie yene u fidisantuankaanu benluobidi yeni kuli po.

20Li benjali po den pia tadibuomunaa ke mu naani leni amandie bonluonkaala leni li puuma leni li ŋuada. 21Gbinyenli den ye benilie tinga, yii n taani ki ñani u fidisantuankaanu kani. Gbinyenli yenli moko den ye benlieditoe tinga, ke yini moko ñani u fidisantuankaanu kani. Gbinyenli go den ye benilie tinga. Li den tie yene ke i benluobidi yeni kuli den ñani u fidisantuankaanu kani. 22A gbina leni i beni yii ñani u fidisantuankaanu kani kuli den duadi ki tie yenma. Likuli den taani ki tie wulamoano.

23Bi go den tagi mu fidisanleleedimu, lani leni yaa tiabidi n pugidi nani yaadi n tie ne: Mu bonbabimu leni yaa tiadi n baa yaa baadi mi fantanpienma. Likuli den tagi leni wulamoano. 24O den taa wulamoano kilo piitaa ki tieni u fidisantuankaanu leni u tuonsoantiadi.

Tulale padibinbinli

25Tulale juuma po, bi den kpie li padibinbinli leni akasia daadi. Li foaginu den tie nukpandunyenli, li pianu nukpandunyenli, li pianu leni li foaginu kuli den de yenma. Li kpedima mo den tie nukpanduna lie, li padibinbinli leni li yina kuli den taani ki tie yenma. 26O den boali li kuli leni wulamoano li tanpoli, li kali, yii n gaani ki lindi li leni li yina. O den kugini wula ki lindi li padibinbinli yeni. 27U bonkugidu yeni tiipo, o den duadi wula ñoagibilalie ke a ye kalilie kani. O den tieni ganu leni jienu, ke ban fidi ki soali yaa dopandi n baa todi li tugima po. 28O den baa akasia daadi dopandi ki boali yi leni wula.

29O den tagi mi kpagagidikaama, tulale yua yaa nuulu n mani kaa pia joagindiba, ki tagi nani yua n tuuni tulale tuonli n tuuni maama yeni.

Currently Selected:

Mi Ñama 37: BGP

Highlight

Copy

Compare