Mi Ñama 36

1Betisaleeli, Oholiabi leni yaa tuonsoanbanda n sieni, U Tienu n den puni yaaba mi yama leni mi yanfuoma li tuonli kuli po, den cili li tuonli nani o Diedo n den puogi ba maama, u kaangagidiŋamu bogida po.»#Ñam 31.1-11. 2Musa den yini ki taani Betisaleeli, Oholiabi leni a tuonsoanbanda kuli, U Tienu n den puni yaaba mi yanfuoma ke bi pia li yankuali li tuonli po. 3Bi den gaa Musa kani Isidayeli yaaba n den cuani yaa paabu kuli u kaangagidiŋamu tuonli po. Tiŋaagu kuli, bi den baa ki kpendinni bu paabu Musa kani. 4A tuonsoanbanda yaaba n den tuuni u kaangagidiŋamu tuonli kuli den jidi ban tuuni yaa tuona, 5ki cua Musa kani ki yedi: «Bi niba kpendinni bu paabu ki cie tin bua yaa bianu, o Diedo n puogi ti yaa tuonli po.» 6Musa den teni ke bi kpaani li nagili kuli nni ki yedi: «Lan tie joa bi lan tie pua, oba kuli n da go cuani paabu U Tienu kaangagidiŋamu po.» Lanwani, bi niba den cedi kaa go kpendinni bu paabu. 7Yaa paabu n den cua den dagidi a tuona po, hali ki go sieni moko.

U Tienu gbandieli

8Yaa tuonsoanbanda n den soani li tuonli kuli, den tieni u kaangagidiŋamu leni caba piiga leni len gaali yii n juagi, ki ŋmadi leni ti pekobidi yaadi n moani ki suudi leni yaadi n moani colicoli. Bi den luni ki kpaa ti po ki tagi selubanba.#Ñam 26.1-37. 9A caba yeni kuli den da leni aya yo. Cabili kuli foaginu den tie piilie n nukpanduna nii, a pianu mo den tie nukpanduna naa. 10Bi den taani ki cebini cabamuu, yenli kuli leni liyali poyendu, ki taani ki cebini u poyuu mo, yaa bonmuuda n sieni, yenli kuli leni liyali. 11Bi den tieni yaa gaali n moani ki suudi ki joani a cabimuudikpiala kunu, ki go tieni yeni, ki joani yaa bonmuuda n sieni mo yaa kunu.

12Bi den tieni gaali piimuu ban kpa loli yaa caba po, ki go den tieni gaali piimuu ban yuandi ki loli yaa caba moko yaa po. I gaali kuli den taa yenma leni iyii. 13Bi den duadi leni wula bonloaginkaala piimuu, ki tugini a caba leni aya, ki cebini a leni li bonloaginkaala, likuli den taani leni li gbandieli, ki tua yenma.

14Bi den luni piiga n cabiyenli leni ti ŋuakobidi, ki tieni gbandietoali yaali n yiini U Tienu kaangagidiŋamu po. 15A caba yeni kuli den da leni aya. Cabili kuli foaginu den tie nukpanduna piitaa, u pianu mo den tie nukpanduna naa. 16Bi den paadi ki cebini a caba yeni cabamuu a baa, ki go paadi ki cebini a cabiluobida mo. 17Bi den tieni gaali piimuu yaa caba n kpa loli cabijuodikaali kani, ki yuandi ki tieni gaali piimuu yaa caba n yuandi ki taani ki loli yaa cabijuodikaali mo yaa kani. 18Bi den duadi bongobidi piimuu leni ti kumoandi, ki taani ban den loli yaa kaanliedi yeni kuli, ke li taani ki tua yenma leni li gbandieli. 19Bi den baa a petona gbandi ke ti moani ki tuu tuu leni yaa gbandi n nugi ki juagi, ki libini ki baa pigini li gbandieli.

20Bi den baa akasia dapagidi ke ti se ki tiebi li gbandieli. 21Dapaku kuli foaginu den tie nukpanduna piiga, ku pianu mo n yaa tie nukpandunyenli leni boagidima. 22Dapaku kuli den pia mubinkaanilie yo, ke likuli tiegi leni iyii. Bi den tieni yene ti dapagidi kuli po. 23Bi den kpie dapagidi piilie li gbandieli ganu po. 24Bi den maa lienni ŋanjilifa bunbuna piinaa, ti dapagipiiliediti yeni tiipo. Dapaku kuli tinga den pia bunbunalie, kelima dapaku kuli den pia mubinkaanilie. 25Bi go den kpie dapagidi piilie li gbandieli jienu kalu po mo 26leni ŋanjilifa bunbuna piinaa, bunbunalie dapaku kuli po. 27Li gbandieli nintuali po, bi den kpie dapagidiluoba. 28Bi go den kpie dapagidilie mi logidima po. 29Ti dapagidi yeni den taa ki liebi tiipo, tin fuugi naani yene, ke ti yula ban kadi tanpoli li bonlandili nni. Bi den tieni yene ti dapagiliediti, mi logidima yeni nni. 30Lanwani, dapagidinii n den ye leni piiga n bunbunaluoba, dapaku kuli tiipo leni ku bunbunlieda.

31Bi den kpie akasia dopandimuu li gbandieli kaliyendu po. 32Bi go den kpie akasia dopandimuu li gbandieli kaliyuu po mo leni dopandimuu goga li gbandieli tugu nni, ki goa nintuali po. 33Siiga nni dopandu den poandi ti dapagidi siiga, ki cili kaliyendu ki ban tuoni uyuu. 34Bi den boali ti dapagidi yeni leni wula, ki tieni a landa i dopandi n baa tuuni naani leni wula, ki go boali i dopandi yeni mo leni wula.

35Bi den tieni bu kpalidoaginkaabu ke bu moani ki suudi ki ŋmadi leni yaa gaali n moani colicoli leni len gaali, yii n juagi, ki den tagi bu po selubanba ke bi ŋani hali bonŋanla. 36Bi den kpie bu po dasaananaa ke a tie akasia daadi, ki boali a leni wula. Bi go den boali a dasaana gobidi yeni leni wula, ki go duadi a po ŋanjilifa bunbunanaa.

37Bi den tieni li gbandieli buliñoabu po yaa kpalidoaginkaabu n moani ki suudi ki ŋmadi leni yaa gaali n moani colicoli leni len gaali yii n juagi. Lani kuli den luni ki kpaa bonŋanla. 38Bi den baa dasaanamuu leni a bongobidi, ki boali a bunbuna yula leni a ñoagibila kuli leni wula. A bunbunmuuda den tie kumoande.

Currently Selected:

Mi Ñama 36: BGP

Highlight

Copy

Compare