Mi Ñama 28

Bi kopadicianba tiayiekaadi

1Teni a kpelo Alono leni o bijaba: Abihu, Nadabi, Eleasari leni Itamari n cua a kani. Ŋan gagidi ki bogini ba ban tua n kopadicianba, ki yaa tuuni n po Isidayeli yaaba siiga. 2Ŋan tieni a kpelo Alono po yaa tiadi n gagidi ki doagidi ke n gandi o ki puni o li bali. 3Ŋan maadi leni yaaba n bani li tuonli bonŋanla yeni kuli, bani min gbieni yaaba leni mi yanfuoma yeni. Ŋan teni ban tieni Alono po ti tiadi, ke wan gagidi ki yaa ŋani, ki yaa tuuni n po li kopadiciantuonli. 4Diidi ban baa tieni yaa tiadi nne: li bencabili, li cabilakaali, li liadicianli, yaali n luni ki kpaa, ti finfinjuadi leni ku gbanñagidigu. A kpelo Alono leni o bijaba baa yaa la laa tiade ki tuuni n kopadiciantuonli. 5Ban taa wula, yaa caba n moani ki suudi, ki ŋmadi leni yaa caba n moani colicoli leni len gaali caba ya n ŋani.

Li cabilakaali n baa yaa tie maama

6Ban tieni li cabilakaali yeni leni wula, yaa gaali n moani ki suudi, ki ŋmadi leni yaa gaali n moani colicoli. Ban tieni li leni len caba ya luni bonŋanla. 7Yin baa cabimulie ki loli ki joani mu o boacaba kani. 8Bi baa lu ku gbanñagidigu yaagu n baa yaa maa li cabilakaali po yeni moko leni wula, yaa gaali n moani ki suudi ki ŋmadi leni yaa gaali n moani colicoli leni len caba. Lani leni li cabilakaali kuli baa taani ki yaa tie cabiyenle. 9Ŋan taa yaa tana n yi onigisi ki diani a po Isidayeli yaaba buoli yela. 10Ŋan diani buoliluoba yela li tanyenli po, ki diani yaa buoluobidi n sieni mo yaa yela li tanyali po. Mi dianma nni, ŋan cili o nikpelo, ki ban juodi o waalo. 11Ŋan diani a tanlieda yeni po, Isidayeli yaaba buoli yela, nani yaaba n dangi a tana po, n maani ki tiendi maama. Li yaa puoli, ŋan poabini a tana yeni leni wula. 12Ŋan tieni a tanlieda yeni li cabilakaali po, a boacaba kani, lan tua mi tiadima tana Isidayeli yaaba po. Yeni, Alono baa bugi bi yela o Diedo nintuali o boacaba po, ki tiadi bi po. 13Lani kuli baa yaa ye wula tuadi nne. 14Ŋan go piani nani i baabi yeni, laanilie leni wulamoano. Ŋan loli ki tugini laa laanliedi leni ti wula tuadi yeni.

O kopadiciamo bencabili n baa yaa tie maama

15Ŋan lu li bencabili, yaali n baa yaa tie ti buudi po bonŋanla. Ŋan lu li nani li cabimaankaali n luni maama, ki kpaa li. Ŋan lu li leni wula ke li gaali moani ki suudi ki ŋmadi leni yaa gaali n moani colicoli. Lan yaa tie leni len gaali.#28.15 Diidi Levi Buolu Yaaba Tuona 8.8. 16Li kali kuli baa yaa de. Ŋan tieni li, lin yaa tie bonlebalie, u foaginu baa yaa tie nubadiyaagu, u pianu moko baa yaa tie nubadiyaagu.

17Yin caligi tanbuolinaa, yaa tana n pia mayuli ke a dunga pa. Yaa tana n baa tieni u fuudikpialu baa yaa tie sariduani, topasi leni emerodi. 18U fuudilielu baa yaa tie esikabukili, safiri leni diama. 19U fuuditaalu baa yaa tie opali, agati leni ametisi. 20U fuudinaalu baa yaa tie kilisoliti, onigisi leni jasipe. Yin ŋuuni laa tana kuli, ti wula tuadi nni. 21Tanyenli po kuli, yin diani Isidayeli buolu yendu yeli, nani yin maani ki dangi a tana po yi yula po maama yeni. Tanyenli kuli baa yaa tie Isidayeli piiga n buoliedi, buoyendu maalime.

22Li bencabili po, yin lu i laani leni wulamoano, lan yaa naani leni i baabi. 23Yin go tieni wula ñoagibilalie, li bencabili cilima leni li juodima kani. 24Ŋan tuuni wula baabiliedi a ñoagibilieda yeni nni, ya n ye li bencabili cilima leni li juodima. 25Ŋan taa i wulabaabiliedi, ki tuuni yi yaa wula n tiebi yaa tanbimu n maa o kopadiciamo cabilakaali boacabili po, yaa tanbimu yeni. Ŋan tuuni yi, yin yaa ye nintuali. 26Ŋan go duadi wula ñoagibilalie ki tieni a li bencabili cilima leni li juodima, lan yaa dieni li cabilakaali. 27Ŋan go duadi wula, ñoagibilalie ki tieni a li cabilakaali cilima leni li juodima tugu nni. A ñoagibilieda yeni baa yaa dieni li cabilakaali ñagidu. 28Ŋan loli ki tugini li bencabili ñoagibila leni li cabilakaali yaa ñoagibila leni yaa baabu n moani ki suudi, ki teni li bencabili n yaa tuugi leni li cabilakaali gbanñagidigu. Lani leni li cabilakaali n da paadi liyala.

29Alono yaa baa kua u kaangagidiŋamu nni, o baa yaa la o benli po Isidayeli yaaba buoli yela, ya n diani li bencabili po. Lani n baa yaa tie mini o Diedo po mi tiadima bonla, yogunu kuli po. 30Fini Musa, ŋan kpieni li bencabili ŋuunu nni, yaa tiadi ke bi yi ti Urim leni Tumim. Ti baa yaa maa Alono benli po. Alono baa yaa la laa tiade, o yaa baa kua o Diedo nintuali yaa yogunu kuli, lani n tie wan bandi o Diedo yanbuama Isidayeli yaaba po.#Coa 27.21; Tia 33.8; Esd 2.63; Neh 7.65.

Yaa tiadi n sieni ki moko gagidi ki ŋani

31Ŋan tieni li cabilakaali liadili, likuli n yaa moani ki suudi. 32Li yuli po, ŋan jiadi u nialu siiga nni. Li yaa puoli, ŋan lu ki kpaa li bonli yeni bonŋanla, lani n tie lin da padi. 33Li liadili yeni tiipo, ŋan teni ban lu ki tagi grenadi bonluonkaala leni ti pekobidi yaadi n moani ki suudi ki ŋmadi leni yaadi moani colicoli. Ŋan ŋoadi ki joani joani ki sagini grenadi bonluonkaala siiga wula coolonbimu. 34Ŋan gadi grenadi bonluonkaala leni wula coolonbimu, hali ki ban gaani ki cebini. 35Alono baa yen la laa liadile li tuonli po. O yaa kua u kaangagidiŋamu nni n nintuali yaa yogunu bi o yaa ña, mu coolonmu yeni, yen baa mua. Lani n tie wan da kpe.

36Baa wulamoano ki duadi bonla lan yaa naani leni mi puuma, ki diani li po: “Bi gagidi la Li Miali Diedo po yo.” Lan yaa tie nani o nilo n yen tieni o maalima maama yeni. 37Baa yaa baabu n moani ki suudi, ki loli wula puuma ti finfinjuadi po, man yaa goa li yutunli po. 38Laa bonla baa yaa ye Alono yutunli po. O baa tugi Isidayeli yaaba tagili a pada po, laa tugili baa yaa ye o yutunli po, wan baa cua o Diedo nintuali yaa yogunu kuli. Yeni o Diedo baa gaa bi miabu.

39Ŋan lu li liadili yeni leni len gaali yii n ñili ki ŋani, ŋan go lu ki kpaa ku gbanñagidigu. 40Alono bijaba moko yaa po, ŋan lu bi po yaa tiadi n tie ne: ti tialakaadi, ti gbanñagiditi leni ti finfinjuadi. Laa tiadi baa doagidi ban tie yaaba leni bi bali.

41Fini Musa, ŋan lani a kpelo Alono leni o bijaba laa tiadi. Ŋan wuli bi yula po mi kpama, ki puogi ba bi tuonli. A baa tieni yene ki gagidi ki ŋanbi ba, ban yaa tuuni n po li kopadiciantuonli. 42Yin lu bi po a kpataana ban yie ki pigini bi mubima. Laa kpataana baa yaa foagi, ki cili ki ciaga ki ban sedi a pana. 43Alono leni o bijaba baa yie laa tiade ki kua u Kadikaanu Gbandieli nni, bi ki pundi li padibinbinli kani u kaangagidiŋamu nni, bi yaa baa padi li padili yaa yogunu. Yeni, bi kan kpe, kelima baa se n nintuali mubima. Laa bali maama baa waagi ki ye Alono leni o puoliŋuani kuli po, hali yaa yogunu kuli.

Currently Selected:

Mi Ñama 28: BGP

Highlight

Copy

Compare