Mi Ñama 29

Bi kopadicianba gagidiŋanbima

1Ŋan baa tieni maama nne ki gagidi ki ŋanbi Alono leni o bijaba, ban tua n kopadicianba, ki yaa tuuni n po. Ŋan gandi naatonli leni petonalie ya n ki pia poadoba kuli. 2Ŋan taa ŋalikama yoma ki pua yaa dupen n ki pia dabinli leni yaa maada n ki pia dabinli, ki buuni leni mi kpama leni yaa lalaadi n ki pia dabinli, ki nan ñuni mi kpama bonŋanla. 3Ŋan kpieni likuli ku baabuogu nni, ki cuani la u kaangagidiŋamu nni. Ŋan go cuani li naatonli leni a petonlieda lanyogunu.

4Ŋan kuani Alono leni o bijaba u Kadikaanu Gbandieli nni, ki baa mi ñima ki wali ba. 5Li yaa puoli, ŋan lani Alono o tiadi yaadi n gagidi ki ŋani: o jabo, o cabilakaali liadicianli, li cabilakaali lini li baa, o bencabili, ki ñagini o o cabilakaali gbanñagidigu. 6Ŋan fini o yuli ti finfinjuadi, ki maani mi maalima bonla yaala n gagidi ki ŋani ti finfinjuadi po. 7Ŋan taa mi kpagagidikaama ki wuli o yuli po, ki gagidi ki ŋanbi o. 8Li yaa puoli, ŋan yini Alono bijaba, ki teni ban nagini ŋan lani ba bi tiadi. 9Ŋan ñagini ba bi gbanñagiditi, ki fini ba bi finfinjuadi. Li yaa puoli, bi baa yaa tie n kopadicianba yaa yogu n tuu yaa yogu. Ŋan baa tieni maama n yeni ki kuani Alono leni o bijaba bi tuonli nni. 10Ŋan cuani li naatonli u Kadikaanu Gbandieli nni. Alono leni o bijaba baa maani bi nii li naatonli yuli po. 11Ŋan kodi li naatonli o Diedo nintuali u Kadikaanu Gbandieli buliñoatuogili kani. 12Ŋan ñani li naatonli soama ki tandi ki sii ma leni a nubili, ki duuni li padibinbinli yina, ki yuandi ki wuli mi soama yeni kuli li padibinbinli bunbunli po. 13Ŋan taa yaa kpakaagu n ŋuagi ti nuadi, li puali, a cayaanlieda leni a kpama, ki juu likuli li padibinbinli po. 14Ama ŋan ñani li naatonli nandi li nagili nni, li gbangu leni li bindi ki ban buoni likuli. Laa padili tie ti tuonbiadi padili.

15Ŋan taa a petona siiga yenli, Alono leni o bijaba baa maani bi nii li yuli po. 16Ŋan kodi li petonli yeni, ki taa li soama ki wuli ma ki gaani ki lindi li padibinbinli kuli. 17Ŋan jia li petonli bonjena jena, ki ŋuudi ti nuadi leni a biana. Ŋan taa li yuli leni a nanjena ki maani li padibinbinli po, ki yuandi ki taa ti nuadi leni a biana ki maani li po. 18Ŋan juu li petonli yeni kuli li padibinbinli po. Laa bonla tie li padijuukaali o Diedo po, yaala n baa buodi ke li nuulu baa yaa mani, o Diedo U Tienu po.#Efe 5.2; Flp 4.18.

19Ŋan taa li petonlieli, Alono leni o bijaba n maani bi nii li yuli po. 20Ŋan kodi li petonli yeni, ki taa li soama ki duuni Alono leni o bijaba jienu tubifajoma, ki go duuni bi jienu nubijali leni bi jientajenbijali. Ŋan wuli mi soama ki gaani ki lindi li padibinbinli. 21Lani yaa pendi, ŋan ñani mi soama li padibinbinli kani, ki go ñani yaa kpama n gagidi ki ŋani ki mii Alono leni o tiadi po, ki go mii o bijaba leni bi liada po. Li yaa puoli, ŋan gagidi ki ŋanbi Alono leni o tiadi, o bijaba moko leni bi tiadi baa gagidi ki yaa ŋani. 22Ŋan taa o pia yeni juoli, yaa kpama n baali ki ciaga, li puali n puabi yaa nandi nni, a cayaanlieda, a kpama leni li jienpanli, kelima li petonlieli yeni yaa padili n baa tua bi kopadicianba tuonli cilima. 23Ŋan ñani maadiyenli, li kpama leni lalaayengu yaa dupen n ki pia dabinli baabuogu yeni niinni, kuni yaagu n se o Diedo nintuali. 24Ŋan tieni likuli Alono leni o bijaba nuu nni, ki teni ban tieni yaa bogidili n doagidi ke bi teni la U Tienu. 25Lani yaa pendi, ŋan gaa bi nuu nni ki juu la li padibinbinli po. Laa padili tie padijuukaali o Diedo nintuali, ki go tie yaa nuulu n mani o Diedo po.

26Li yaa puoli, ŋan taa li padipetonli yeni bengunli ki tieni yaa bogidili n waani ke a teni la o Diedo. Lani n baa tua a mo yaa biinu.

27Ŋan gagidi o Diedo po, ŋan den kodi yaa petonli ki kuani Alono leni o bijaba bi tuonli nni yeni, bengunli leni li panli lan yaa tie li bogidili. 28Lani, n baa teni Isidayeli yaaba n yaa ñandi yogunu kuli ki yanga nni laa nandi Alono leni o puoliŋuani po, bi yaa cuani n nintuali mi taanyenma padili yaa yogunu. Bi baa yaa ñandi laa bonla o Diedo po.

29Alono yaa kpe, o bijaba n baa gaa laa tiagagidikaadi ki la ti, ban gandi ba yaa daali, ki gagidi ki ŋanbi ba ke bi baa cili bi tuona.

30Yaa kopadiciamo n baa gaa Alono kaanu o bijaba siiga, baa la laa tiadi danalele. O baa kua u Kadikaanu Gbandieli nni, ki soani wan pia yaa tuonli u kaangagidiŋamu niinni.

31Ŋan taa bi kopadicianba n cili bi tuonli yaa daali padipetonli yeni, ki ŋaani li nandi yaa kaanu n gagidi ki ŋani niinni. 32Alono leni o bijaba baa ŋmani laa nandi leni yaa dupen n sieni ku baabuogu nni, u Kadikaanu Gbandieli buliñoabu kani. 33Yeni, bi baa je yaa padijiema n gagidi ki ŋanbi ba bi kopadicianba tuonli cilima po leni yaa padijiema n mia U Tienu sugili bi po. Nitoa kuli ki pia sanu ki je laa jiema, kelima mi tie yaa jiema n gagidi ki ŋani. 34Li yaa tie ke bi kopadicianba tuonli cilima padinandi leni li dupen sieni ku tiŋaagu, ŋan sia yaala n sieni yeni. Oba kan je laa jiema, kelima mi tie yaa jiema n gagidi ki ŋani.

35Ŋan tieni Alono leni o bijaba po nani min bili a po maama. Bi kopadicianba tuonli cilima bogida baa tieni danalele.

36Daali kuli, ŋan padi naatonyenli ti tuonbiadi sugili miabu po, yene ke a baa gagidi ki ŋanbi li padibinbinli. Li yaa puoli, ŋan wuli mi kpama li po, ki gagidi ki ŋanbi li. 37Laa bogida baa tieni danalele. Li yaa pendi, li padibinbinli baa gagidi ki yaa ŋani hali boncianla. Yaa nilo bi yaa bonla n sii li padibinbinli baa gagidi ki yaa ŋani.

Daali kuli leni li pada

38Daali kuli, ŋan padi li padibinbinli po pebilalie, yaaba n pia binyenli yenli. Ŋan yaa tiendi yeni daali kuli ki da cedi. 39Yi yen baa padi pebiyenga ku tiŋaagu, ki bonliega mo ku yenjuagu. 40Ki pebikpiaga po, ŋan baa mi yoma kilo bonbitaa ki nugi ma leni olivie kpama litidiyendo leni boagidima, ki go pugini duven litidi bonyendo leni boagidima. 41Ŋan padi ki pebiliega ku yenjuagu. Laa padili leni laa cabima baa yaa tie nani ku tiŋaagu yaa pada yeni. Ŋan juu laa padili, lin tua n po yaa padili yaa nuulu n mani. 42Yinba leni yi puoliŋuani n yaa padi laa padili hali yaa yogu n tuu yaa yogu. Yi baa padi laa padili u Kadikaanu Gbandieli buliñoatuogili kani, o Diedo nintuali. Lankane n yen baa kadi leni yi, ki maadi leni yi.

43N yen baa kadi leni Isidayeli yaaba laa kaanu yo. N kpiagidi baa gagidi ki ŋanbi laa kaanu. 44N baa gagidi ki ŋanbi u Kadikaanu Gbandieli leni li padibinbinli. N baa gagidi ki ŋanbi Alono leni o bijaba, ke ban yaa tuuni n po li kopadiciantuonli. 45N baa yaa ye Isidayeli yaaba siiga. N baa yaa tie bi Tienu. 46Lani, bi baa bandi ke mini n tie Li Miali Diedo bi Tienu yua n ñani ba Ejipiti diema nni, ki baa yaa ye bi siiga. Mini n tie Li Miali Diedo bi Tienu.

Currently Selected:

Mi Ñama 29: BGP

Highlight

Copy

Compare