Mi Ñama 26

U kaangagidiŋamu

1U kaangagidiŋamu po, ŋan baa caba piiga ya n tieni leni len gaaliŋami, yii moani ki suudi, ki moani colicoli. A caba yeni po baa yaa pia selubanba nannana, ban luni ya bonŋanla. 2Cabiyenli kuli foaginu baa yaa tie piilie n nukpanduna nii, li pianu mo baa yaa tie nukpanduna naa. A caba yeni baa yaa da leni aya yo. 3Yin taani ki cebini cabamuu, yenli kuli leni liyali. 4Ŋan baa yaa gaali n moani ki suudi ki joani a cabimuudikpiala kunu, ki go tieni yeni yaa cabimuuda n sieni yaa kunu po. 5Li cabikpiali juodima kani, a baa tieni gaali piimuu, yii n moani ki suudi, yaa cabimuuda n sieni yaa cabijuodikaali kani, laa gaali baa yaa tiegi leni iyii. 6Ŋan duadi bonloaginkaala piimuu leni wula, ki tugini a caba yeni leni aya, ki loagini leni li bonloaginkaala yeni, lani leni li gbandieli kuli baa taani yenma.

7Ŋan lu a caba leni ti ŋuakobidi lan tua gbandieli ki yaa yiini U Tienu kaangagidiŋamu po. Ŋan lu piiga n cabiyenli. 8Cabiyenli kuli foaginu baa yaa tie nukpanduna piitaa, cabili kuli yaa pianu mo baa yaa tie nukpanduna naa. A piiga n cabiyenda yeni kuli baa yaa de yo. 9Ŋan piadi ki cebini cabamuu leni aya, ki go yuandi ki cebini yaa cabiluobida n sieni. Li cabiluobili yeni, ŋan lebini li lan tua bonalie, yaala n taa ki dagini li gbandieli nintuali po. 10Ŋan loagini gaali piimuu yaa cabili n juodi a cabitaankaana yeni kuli siiga nni, ki go joani gaali piimuu yaa caba n taa ki luo ki pugidi yeni yaa kani. 11Ŋan duadi bonloaginkaala piimuu leni ti kumoandi, ki teni laa bonloaginkaala n soagi leni i baabi yeni, lani leni li gbandieli n taani yenma. 12Li gbandieli yaa caba baa cie U Tienu kaangagidiŋamu cabiyenli boagidima. Li baa caadi ki jiidi U Tienu kaangagidiŋamu puoli po. 13A caba foaginu baa caadi nukpandunyenli ganu leni jienu kuli, ki lindi U Tienu kaangagidiŋamu, ki pini u kaanu yeni bonŋanla. 14Ŋan pini li gbandieli leni a petona kobidi ban sie yaadi ke ti moani, ki go pini leni ban nugi yaa gbangu ke ku pia u paalu.

15Ŋan baa akasia dapagidi U Tienu gbandieli po ki sieni laa daadi n tebini li gbandieli, ki pugini li fidu. 16Dapaku kuli foaginu baa yaa tie nukpanduna piiga, u pianu mo n yaa tie nukpandunyenli leni boagidima. 17Dapaku kuli baa yaa pia mubinkaanilie, ke yi tiegi iyii. Ŋan tieni laa mubinkaani li gbandieli dapagidi kuli po.

18Ŋan lingi ti dapagidi li gbandieli po, ŋan kpie dapagidi piilie U Tienu gbandieli nuganu po.

19Ŋan duadi bunbuna piinaa ya tie ŋanjilifa ki sieni a ti dapagidi tiipo. Dapaku kuli tiipo baa yaa pia bunbunalie yo, dapaku kuli mo baa yaa pia mubinkaanilie. 20U Tienu gbandieli nujienu po mo baa yaa pia dapagidi piilie leni 21ŋanjilifa bunbuna piinaa. Dapaku kuli tinga baa yaa pia bunbunalie. 22Ŋan kpie dapagidiluoba U Tienu gbandieli puoli po, ki goa nintuali po. 23Ŋan kpie dapagidilie U Tienu gbandieli tugu nni, mi logidima nni. 24Tiipo, ti dapagiliediti yeni baa yaa se liba liba yo, ama tanpoli wani ti baa n taani ki kadi leni tiyadi, li landili nni. Li baa yaa tie yene leni ti dapagiliediti yaadi n se mi logidiliedima yeni nni. 25U Tienu gbandieli puoli po baa yaa pia dapagidinii leni ŋanjilifa bunbuna, piiga n bonaluoba. Dapaku kuli tinga baa yaa pia bunbunalie. Li baa taani ki dagidi niini leni ŋanjilifa bunbuna, akuli baa taani ki tua piiga n bunbunaluoba, dapaku kuli tinga baa yaa pia bunbunalie.

26Ŋan baa akasia dapankaadimuu U Tienu gbandieli kaliyendu po. 27U kaliyuu mo yaa po, dapankaadimuu goga, dapankaadimuu mo n yaa ye leni ti dapagidi, ki goa nintuali po li dieli tugu nni. 28Ti dapankaadi yaadi n ye ti dapagidi siiga baa poandi kaliyendu, ki ban tuoni uyuu.

29Ŋan boali ti dapagidi yeni leni wula. Ŋan tieni a ñoagibila leni wula, ŋani yaa niinne ke ti dapankaadi yeni baa poandi. Ŋan boali tini moko leni wula. 30Ŋan tii U Tienu gbandieli nani ban waani a yaali li juali po yeni.

31Ŋan baa yaa kpalibu n moani ki suudi, ki go moani colicoli, ki luni leni len gaali ke bi tieni bu po selubanba. 32Ŋan joani laa kpalibu akasia daadinaa, yaadi n boali leni wula ki kpaa bu kpalibu yeni akasia daadi po leni wula kpakpaana. Laa akasia danaaditi baa yaa se ŋanjilifa bunbunanaa po yo. 33Ŋan joani bu kpalibu mu bongobidimu kani. Laa kpalibu yaa puoli po yo ke yi baa bili ku ŋantaadikpaku. Bu kpalibu n baa paadi u kaangagidiŋamu leni u kaangagidiŋanmoanu.#Heb 6.19; 9.3-5. 34Lani yaa pendi, yin taa li bonbiili ki biini ku ŋantaadikpaku yaagu n ye u kaangagidiŋanmoanu nni. 35Ŋan sieni tabili u kaangagidiŋamu nni, ki goa jienu po. Ŋan sieni u fidisantuankaanu mo n yaa se ki tiegi tabili, ki goa ganu po.

36Ŋan lu u kaangagidiŋamu po bu kpalidoaginkaabu leni len gaali, yii n pa bonŋanla, ki moani ki suudi ki ŋmadi leni yaa gaali n moani colicoli, ki luni ki kpaa. 37Bu kpalibu yeni po, ŋan baa akasia dasaanamuu, ki boali a leni wula, ki tieni mu bongobidimu leni wula, ki duadi a dasaana yeni po bunbunamuu leni ti kumoandi.

Currently Selected:

Mi Ñama 26: BGP

Highlight

Copy

Compare