Mi Ñama 25

U Tienu n bili ban tii li gbandieli maama

25—31

Isidayeli yaaba todima

1O Diedo den maadi leni Musa, ki yedi: #Ñam 35.4-9. 2«Yedi Isidayeli yaaba ke ban cuani n po bu paabu. Yua n cuani laa paabu leni bulicindi kuli, yin gaa. 3Diidi mani yin baa gaa bi kani yaa paabu nne: Wula, ŋanjilifa leni ti kumoandi, 4yaa caba n moani ki suudi, ya moani colicoli leni len gaali, ti ŋuakobidi, 5a petona gbandi ke ti sie ki tuu tuu ki moani moani leni yaa gbandi n nugi ki juagi, akasia daadi, 6mi fidisankpama, yaa tibidi n pia u nuulumanu mi gagidiŋanbima kpama po leni tulale mi juuma po, 7onigisi tana leni tantoana ya moko n pia li mayuli ke bi baa ŋuuni li cabilakaali nni leni o kopadiciamo bencabili nni. 8Bi baa tii n po u kaangagidiŋamu, lani n tie min fidi ki yaa ye bi siiga. 9N baa waani yi, li gbandieli leni li tiadi n baa yaa tie maama. Yin ŋoadi ki tieni likuli nani min waani yaa nannanli yeni.

Ku ŋantaadikpaku n baa yaa tie maama

10Yin tieni ku kpaku leni akasia daadi, ku foaginu baa yaa tie nukpanduna lie leni boagidima, ku pianu, nukpandunyenli leni boagidima, ku kpedima mo nukpandunyenli leni boagidima.#Ñam 27.1-9. 11Ŋan boali ku leni wulamoano tugu nni leni niinpo kuli, ki go kugini ki gaani ki cebini leni wula. 12Ŋan duadi ku po wula ñoagibilanaa, ki tieni ku logidinaadima nni, ñoagibilalie poyendu, ñoagibilalie u poyuu. 13Ŋan pedi i dopandi yii n tie akasia, ki boali yi leni wula. 14Ŋan soali i dopandi ku kpaku ñoagibila ya n ye ganu leni jienu. Yeni, bi yen baa fidi ki tugi ku. 15Ŋan cedi i dopandi yeni n yaa tuu ku kpaku ñoagibila yeni nni. Ŋan da soadi ki ñani yi. 16Ŋan kpieni ku kpaku nni, li bali maama tanpabimu, min baa teni a yaamu yeni.

17Ŋan tagi ku kpaku biili leni wulamoano. Li bonbiili foaginu baa yaa tie nukpanduna lie leni boagidima, li pianu mo nukpandunyenli leni boagidima.#Heb 9.5. 18Ku kpaku biili ganu leni jienu po kuli, ŋan tagi selubanba bonbilie yaa nannanli. 19Bi selubanliediba yeni, baa duadi ki taani leni ku kpaku biili. Selubanyendo baa yaa ye ku kpaku biili juodiyenma po, olielo mo, mi juodiliema po. 20Selubanba yeni baa yaa tiegi biyabe, bi nunjoma baa pegidi ki yaa nua ku kpaku biili, bi fiabi baa yaa yuugi. 21Ŋan taa min baa teni a yaa bali maama tili yeni, ki kpieni li ku ŋantaadikpaku nni, ki taa ku kpaku biili, ki biini. 22Min baa yaa kadi leni a naankani n tie ku kpaku biili tanpoli. N baa kadi leni a ku kpaku biili tanpoli selubanba bonliediba siiga yaaba n ye ku ŋantaadikpaku tanpoli yeni. N baa maadi leni a ki teni a n bali maama kuli Isidayeli yaaba po.

O dupengagidika maankaanu n baa yaa tie maama

23Ŋan kpie tabili leni akasia daadi. O foaginu baa pundi nukpanduna lie, o pianu nukpandunyenli, o kpedima mo nukpandunyenli leni boagidima.#Ñam 37.10-16. 24Ŋan boali o kuli leni wulamoano, ki go kugini o kuli leni wula ki gaani ki cebini. 25Ŋan gaani ki lindi o leni yaa guudu n baa yaa pia nani nutali yaa pianu yeni. Ŋan go kugini o kuli leni wula ki ban cebini. 26Ŋan duadi ñoagibilanaa leni wula ki tieni a mi logidima nni a taanaada sedikaanu. 27A ñoagibila yeni baa yaa kuu leni yaala n kugini tabili yeni. I dopandi baa yaa tuu a ñoagibila yeni nne. Yeni, bi baa fidi ki yen tugi tabili yeni. 28Ŋan tieni i dopandi leni akasia daadi, ŋan boali ikuli leni wula. Laa dopandi n baa todi tabili yeni tugima. 29Ŋan tagi mu tadimu, mu tadibuomu leni yaa tiadi n baa todi bi yaa baa cabi U Tienu po mi daama yaa yogunu. Ŋan tieni likuli leni wulamoano. 30Ŋan bili tabili po yaa dupen n gagidi n nintuali, laa bonla n yaa tiendi yogunu kuli.#Lev 24.5-8.

U fidisantuankaanu leni u benleleedi n baa yaa tie maama

31Ŋan tagi u fidisantuankaanu leni wulamoano. U fidisantuankaanu baa yaa tie yaa wula n pua ki tandi: U fidisantuankaanu taali, u kankagili, u tadibuomu, u puuma leni yaala n ŋoagini kuli baa yaa tie yenme.#Ñam 37.17-24. 32Beniluoba n baa ña u kali nni. U fidisantuankaanu kaliyendu nni baa ña benitaa, u kaliyuu mo n ña benitaa goga. 33I benluobidi yeni kuli siiga, benu kuli baa yaa pia tadibuomutaa ke mu naani leni amandie bonluonkaala. 34U fidisantuankaanu benjali po, baa yaa pia tadiñokaamunaa ke mu naani leni amandie bonluonkaala leni li ŋuada leni li puuma kuli. 35I benliedi n tugini ki ñani u fidisantuankaanu benjali kani naankani kuli, baa yaa pia nani li gbinli yeni. Yaa benliedi n ŋua moko n ñani naani li benjali po moko baa yaa pia li gbinli nannanli. Li go baa yaa tie yene yaa benliedi n sieni moko yaa po. Yaa benluobidi n ñani u fidisantuankaanu yeni kani kuli po, li baa yaa tie yene. 36U fidisantuankaanu beni leni yaala n naani leni a gbina yeni kuli baa duadi ki taani yenma. Likuli baa yaa tie wulamoano.

37Ŋan tagi fidisanmulele. Ŋan tuani mu fidisanmu yeni maama ke mu baa yendi nintuali. 38Mu babimu leni mi fantanpienma tadimu moko baa yaa tie wulamoano. 39U fidisantuankaanu leni u tiadi baa tieni leni wulamoano, yua yaa kpiagu n pundi kilo piitaa. 40Diidi, ki yuandi ki tieni nani ban den waani a yaa nannanli li juali po yeni.#JTT 7.44; Heb 8.5.

Currently Selected:

Mi Ñama 25: BGP

Highlight

Copy

Compare