Mi Ñama 22

1Bi yaa pigini yua ke o moa ki bua kua ki su, ki pua o ke o kpe, tagiliba ki ye yua n kpa o po. 2Ama li yaa sua ke u yienu pudi, i tagili baa yaa ye yua n kpa o po. Die o suudo yeni baa pa wan suni yua i panpaani, o yàá pia puu mo, bi baa kuadi o o subu po.

3Yin cuo o yaa yogunu, wan suni yaa nua, yaa ŋunbo bi yaa yanbiga da yaa baa ki fo, wan pa wan suni yaala yeni taalimilie.

Yua n kua o lielo tagili nni

4Nilo yaa teni ke o yandi kua ki ŋmani o lielo duven tiidi, bi o kuanu, o panpaani n baa yaa tie maama nne: O kuanu bi o duventiidi n loni yaala ke li ŋani ki cie kuli.

5Fantama yaa sia ki ban kadini konkongu, mi yaa bolini ŋalikama ban yendi yua, bi yua da se leni o kankaga, bi kuanu, yua cuoni u mu yeni baa pa i panpaani.

6Nilo yaa piani o lielo ligi bi bonliba ke wan kubi o po. Bi yaa suni laa bonla ban piani yua deni, bi yaa cuo o suudo yeni yaa yogunu, wan suni yaala kuli, o baa pa laa bonla taalimilie. 7Bi yàá bandi o suudo, ku diegu daano baa cua U Tienu nintuali ki poli ke waa taa o lielo bonpiankaala.

8Maama yaa gali nibilie siiga, ke li tie nua, ŋunbo, yanbiga, tialakaagu, bi yaa bonla n bia kuli, ke baa yedi lani nne, yaaba yaa maama n gali yeni kuli baa gedi U Tienu nintuali. U Tienu yaa muni yua i moamoani yeni, wani n baa pa o lielo yaala n bi gali bi maama yeni taalimilie.

9O nilo yaa piani o lielo ŋunbo, nua, pia, bi lan tie yaa yanga kuli, ke laa yanga kpe, bi ke ki poagili, bi ke bi suni ka ke niloba ki laa. 10Ban den piani yua yaala n bia yeni baa poli o Diedo yeli nni, ke waa taa ban den piani o yaala. Yua n den piani o baa tuo li poli, lanwani ban den piani yua kan pa panpaani. 11Ama li yaa tie ke o lielo teni ke bi suni ki yanga o deni, o baa pa o bondaano ki panpaani. 12Li yaa tie ke moayanga n ŋmani laa yanga, o baa cuani yaala n sieni ban le lan tua siedi. Lanwani, panpaaniba kuli ki ye o po, ban kpa yaa yanga yeni po. 13Nilo yaa ledi yanga o lielo kani ke ki poagili, bi ke ki kpe ke o bondaano ki ye likani, yua ledi ki yanga yeni baa pa ki panpaani. 14Ama li yaa sua ke ki yanga daano ye likani, panpaani kan yaa ye.

Mi yema leni mi jaanma bali maama

15Joa yaa banbi yaa puowandiali n daa pia togibaa, ki duani leni o, o baa cuadi li puowandiali yeni po. Li yaa puoli, o baa taa o wan tua o pua.#Tia 22.28-29. 16O jafaano baa yaa yie ke o kan taa o, yua n biidi o yeni, baa pa i biidipanpaani, ban maani ki pa yii li puowandiali po.

17Yin da ŋaa yaa pua n pia ñoagibiadi leni miali.#Tia 18.10-11.

18Yua n taani leni yanga kuli, yin kpa o.#Lev 18.23; 20.15-16; Tia 27.21.

19Yua n padi tientoe po ke laa tie Li Miali Diedo po kuli, yin kpa o.#Tia 17.2-7.

20Yin da janbi ki waani o caano yua n kaa yi siiga fala, kelima yinba yi ba moko den tie canbe Ejipiti diema nni.#Ñam 23.9; Lev 19.33-34; Tia 24.17-18; 27.19.

21Yin da faligi kpepuoli bi kpienbiga. 22Yi yaa waani ba fala ke bi mua ki yini nni, n baa gbadi bi moe. 23N pali baa be hali boncianla, min kpa yi leni ki jugisiega. Yi puoba baa tua kpepuona, yi bila mo n tua kpienbila.

24A yaa ledi n niba siiga niyendo i ligi, li yaa tie ninñinnilo ke o ye leni a, ŋan da tie o po nani yaa pandanba n sieni yeni ka. Ŋan da buali o ñuadi.#Lev 25.35-38; Tia 15.7-11; 23.19-20. 25A lielo yaa ledi a kani, ke a gaa o tialakaagu, a baa guani o cigu ke u yienu daa baa. 26O kpaligolikaabu kuli n yeni, lani n tie yaa tiagu bebe n maa o po. O baa ti pini be yo ki duani? O yaa tiani ki waani nni, n baa gbadi, kelima n gba mi ninñima.#Tia 24.10-13.

27Ŋan da sugi U Tienu, ki da soli a diema bado mo.#JTT 23.5.

28Ŋan da guudi lan waagi ki cuani n biinu a kpaandi leni a duven tiidi bonluonkaala nni. A baa pa nni a bijakpelo. 29A baa tieni yeni a ne leni a pe po moko. Ki bontonkpiaga baa tieni o naa kani danalele, li daniili, ŋan taa ka ki pa nni. 30Yi baa yaa tie n po yaa niba n gagidi ki ŋani. Yin da ŋmani mani ki moayanga n kpa yaa yanga. Yin taa laa nandi ki pa i sangbanli.#Lev 17.15.

Currently Selected:

Mi Ñama 22: BGP

Highlight

Copy

Compare