Mi Ñama 23

Li fangili a tadima po

1Ŋan da yadi yaa maama n ki tie moani. Ŋan da taani leni o nibiado ki tieni siedifaama.#Ñam 20.16; Lev 19.11-12; Tia 5.20. 2Ŋan da taani leni ku niligu ki tieni yaala n bia, ŋan da taani ti buudi yogunu bi niba n yabi naanpo ki tieni yaala n ki tiegi. 3Ŋan da taani o luodo po o buudi nni, kelima o luoma po.#Lev 19.15.

4A yaa tuogi a yibali nua bi o ŋunbo ke o yaadi, ŋan guani o o po. 5A yaa laa a yibali ŋunbo ke li tugili bua ki kpa o, ŋan da pendi ki ŋaa o, ŋan sedi ki todi o, wan tugidi o ŋunbo.#Tia 22.1-4.

6Ŋan da tieni o luodo i janbi ki guli o o buudi daali. 7Ŋan fangi a yuli leni yaa maama n ki tie moani. Ŋan da kpa yua n ki pia tagili bi o niteginka, kelima n kan saa moamoani o nibiado po.

8Ŋan da gaani li suuli kelima li suuli juandi bi nundanba, ki biandi bi niteginkaaba maama mo fanma.#Lev 19.15; Tia 16.19.

9Ŋan da mabini o caano kelima yi bani o caano yema n tie maama. Yinba yi ba moko den tie canba Ejipiti diema nni.#Ñam 22.21; Lev 19.33-34; Tia 24.17-18; 27.19.

Mi fuodima binli leni mi fuodima daali

10Ŋan tugini binaluoba ki buli a kuanu nni ki taani a kpaandi. 11Ama li binleleeli, a baa cedi ki tinga n fuo. Yi siiga nni a luoda baa cua lankane ki baa li bonjekaala. Bi yaa ŋaa yaala, ti moayandi mo baa je lani. Ŋan tieni yeni a duven tiidi leni olivie tiidi kuli po.#Lev 25.1-7.

12Danaluoba siiga, ŋan soani ŋan pia yaa tuona kuli. Ama li daleleeli, ŋan fuodi, ki kpiagi U Tienu fuodima daali. Yeni, a nua leni a ŋunbo mo baa fuodi. A puotuado bijua leni o caano mo n baa ki fuo ki jiini.#Ñam 20.10-11; 31.15; 34.21; 35.2; Lev 23.3; Tia 5.13-14.

13Yin ŋoadi n ñoamabona kuli bonŋanla. Yin da gbaani tientoe nintuali, ban da gbadi bi maama yi ñoana nni mo.

Yin baa yaa tiendi yaa jaanbuoli Isidayeli diema nni

14Li binli nni, ŋan tieni mi jaanma taalimitaa n yeli kpiagidi po.#Ñam 34.18-26; Tia 16.1-17. 15A baa yaa tiendi yaa dupen n ki pia dabinli jaanma, nani min bili a po maama, li yogunu yaa pundi. Lani n tie Abibi ŋmaalo, yua n tie u jetaagu yogunu, a baa yaa di yaa dupen n ki pia dabinli, hali danalele, kelima laa ŋmaalo nne ke a den ñani Ejipiti diema nni. Oba n da cua n kani leni nikuomi.#Ñam 12.14-20; Lev 23.6-8; Coa 28.17-25.

16Ŋan jaani u cicilijetaagu jaanma, yaama n tie a kpaandi bonluonkakpiala leni ŋan buli yaala kuli u kuanu nni jaanma.

Li binli juodima mo, ŋan jaani u jetaagu jaanma, yaa yogunu ke a taani ŋan soani a kuani nni ki baa yaala.#Lev 23.15-21,39-43; Coa 28.26-31. 17Isidayeli yaaba siiga, joa kuli baa cua o Diedo, Li Miali Diedo nintuali, li binli nni taalimitaa.

18Ŋan da taani n padiyanga leni yaa dupen n pia dabinli. Ŋan padi n po yaa yanga yeni kpama kan duani lan faa. 19Ŋan cuani a tinga bonluonkakpiala, o Diedo a Tienu diegu nni. Ŋan da ŋaani ki ŋuabiga ki naa biima nni.#Ñam 34.26; Tia 14.21; 26.2.

I ñoaniani leni yaa tundi n ye hali ke bi daa fii

20Mini, n baa soani maleki a nintuali, wan gobidi ki go kubi a li sancenli nni, ki teni ŋan pundi min ŋanbi yi po yaa kaanu. 21Cengi o maama, tieni wan yedi a yaala, ŋan da fiini o po yiema, kelima mini n soani o. O kan pa ŋa sugili a yaa fiini o po yiema. 22Ama a yaa tuo wan yedi yaala, ki tieni min baa yedi a yaala kuli, n baa tua a yibalinba yaa yibali, a koanginkaaba yaa koanginka. 23N maleko baa kua a liiga ki gobidi ki gedini a yaa nibuoli n tie ne diema nni: Amoriti, Hititi, Perisiti, Kanana, Hiviti leni Jebusi yaaba. Nmo baa bolini bikuli. 24Ŋan da gbaani ki pugi bi tieni, ki da soani bi po, ki da tieni nani ban tiendi maama. Pua ki mudi bi buli, ki go mudi bi butana. 25Yi baa yaa tuuni Li Miali Diedo yi Tienu po. O baa seligi yi jiema leni yi ñima. N baa deli ki ñani u yianu yi siiga. 26Yi diema kan go baa yaa pua yaa tugu n biidi, bi yua n tie ŋoaliga. N baa teni ŋan podi hali boncianla.

27N baa teni n jawaandi n cuo ŋan baa gedi yaa nibuoli kuli kani, ban sani. N go baa teni yi yibalinba kuli n sani yi nintuali. 28N baa soani a lonlona n deli Hiviti yaaba, Kanana yaaba leni Hititi yaaba a nintuali. 29N kan deli bikuli binyenli ka, kelima n yaa tieni yeni, mi diema niba baa gbeni. Yeni mo, ti moayandi baa yabidi ki kandi ki biidi a po. 30N baa deli ba waamu waamu yo, hali ŋan ban fidi ki diedi mi diema. 31A diema baa cili mi Ñincianmoanma kani, ki yaa caa hali Filisiti yaaba ñincianma. Mi go baa taa mi fanpienma kani, ki ban pundi u kpenciamu kani, kelima n baa teni ŋan paadi yaaba n ye likani. A baa deli ba a nintuali. 32Ŋan da baa ŋantaadi leni ba, ki bagi bi tieni. 33Ban da kali a diema nni, ki da ti teni ŋan tieni ti tuonbiadi n po. A yaa soani bi tieni po, bi baa tua a po diagu.»

Currently Selected:

Mi Ñama 23: BGP

Highlight

Copy

Compare