Mi Ñama 21

Yaa bali maama n ye Hebilu yonbi po

1Diidi ŋan baa bili bi po yaa ñoamabonbilikaana: #Tia 15.12-18. 2«A yaa daa o yonbo ke o tie Hebilu buolu yua, o baa soani binaluoba. Ama li binleleeli wani, o baa ña ki diedi o yuli ki naa pani puu kuli mo.#Lev 25.39-46. 3O yaa den kua ti yonbidi o bebe, o baa ña o bebe yo. O yaa den pia o pua mo, o baa ña wani leni o pua. 4O canbaa n yaa puni o pua ke o mali o po a bonjala bi a bonpola, o canbaa n baa yendi o pua leni a bila, omo baa ña o bebe. 5O yonbo yaa yedi: ‹N bua n canbaa, n pua leni n bila, mii bua ki ña ki yendi n yuli.› 6Lanwani, o canbaa baa taa o ki cuani U Tienu kani. O baa tabini laa joa bu buliñoabu, bi li buliñoagundili. O canba baa cibi o tubili leni li penkpaali. Li yaa puoli, o yonbo yeni baa yaa tuuni o po yaa yogunu kuli.

7Joa yaa kuadi o bisalo ke o tua yonbo, o kan ña ti yonbidi nni nani bi yonbijaba n ña ti yonbidi nni maama. 8O canbaa yama yaa ñani o niinni, wani yua n den daa o o yuli po yeni, baa dingi o po o ñama ti yonbidi nni. Waa pia sanu ki kuadi o nilanbuolu po. O yaa tieni yeni, o janbi o yo.

9O yaa kubi o o bijua po mo, o baa tieni o po nani lan pundi ban tieni bi jafanba po maama yeni. 10O yaa taa puotoa, o kan wadi liba kuli o puokpialo yeni kani, lan tie li manli, ti tiayiekaadi leni u duanu kuli po. 11O yàá tiendi o po laa bontaadila, o baa fidi ki ña ki naa pani puu kuli.

Yaa tagili n pundi mi kuuma

12Nilo yaa pua ki kpa o lielo, ban kpa omo.#Lev 24.17. 13Ama li yaa tie jalibu, kaa tie li daano yanbuama, U Tienu n yaa teni ke o kpe o nuu nni, n baa waani o wan baa sani ki wuoni naankani.#Coa 35.10-34; Tia 19.1-13; Jos 20.1-9. 14Ama nilo yaa luni nunfanbu ki baa kpa o lielo, ba o yaa sani ki wuoni n padibinbinli kani, yin dadi ki ñani o ki kpa o.

15Yaa nilo n pua o baa bi o naa, yin kpa o.

16Yaa nilo n suni nilo ki kuadi o, bi ki kubi o leni u paalu, yin kpa o.#Tia 24.7.

17Yua n soli o baa yaa ka o naa, li pundi ban kpa o.#Lev 20.9; Mat 15.4; Mrk 7.10.

Li puapuali leni mi poagilima

18Jabilie yaa koani, ke yendo lugidi o lielo li tanli, bi ki kudi o nukuli ke waa kpe, ama ke li duani o, 19li puoli, o yaa fidi ki fii ki ñani ki goadi niinpo ki ñiigi u gbiamu, yua n pua laa joa baa gaapo. Ama o baa pa i panpaani yaa dana ke laa joa ki den fidi ki soani yeni, ki go buu o hali wan ban paagi cain.

20Nilo yaa pua o yonbo, joa bi pua leni gbiamu ke o kpe, yin tuu o po li panli. 21Ama o yaa tieni dayenli bi danalie ki yuandi ki kpe, yi kan tuu o po panli, kelima o den daa o leni o ligi yo.

22Bi jaba yaa koani leni biyaba, ki bobi puotugupunbo ki teni ke o mali, ke jalibutoa kuli ki tieni, o puodaano baa bili ba i panpaani, bi baa pa ki ŋoadi bi bujiaba n jagi maama. 23Ama jalibu yaa ye lienni, miali n baa pa miali panli, 24nunbu n baa pa nunbu panli, ñinli mo n baa pa ñinli panli, nuu n baa pa nuu panli, taali n baa pa taali panli.#Lev 24.19-20; Tia 19.21; Mat 5.38. 25Fantansiama n pa fantansiama panli, poagilima n pa poagilima panli, faligima mo n pa faligima panli.

26Nilo yaa pia yonbo ke o tie joa bi pua, ki pua ki fiadi o nunbu, wan luo yaa nunbu yeni yaa po, o baa ŋaa o wan diedi o yuli. 27O yonbo canbaa yaa pua ki kpaadi o ñinli, o ñinli kpaadima yeni po, o baa ŋaa o wan diedi o yuli, lan tie joa bi pua.

28Naatonli yaa tuoni joa bi pua ke o kpe, yi baa lugidi o nua yeni a tana, oba kuli n da ŋmani o nandi mo. Yeni, o naadaano kan baa tagiliba.

29Ama li yaa sua ke o nua den mali ki to bi niba, ke bi waani o naadaano ke waa tieni liba kuli, yi baa lugidi o nua a tana ki kpa o. Li yaa tie ke o kpa joa bi pua, yi baa kpa o naadaano moko. 30Li yaa tie ke bi bili i panpaani o naadaano po ke wan gaa o miali, ban bili o yaa panpaani kuli, o baa pa yi. 31O nua yaa tuoni bonjaga bi bonpuoga, laa maama moko n jia nani lan bili maama. 32Ama o nua yaa tuoni yonbo, wan tie joa bi pua, bi baa pa o yonbidaane kujapiena piitaa, ki go lugidi ki kpa o nua yeni mo.

33Nilo yaa ŋaa caali ke li yaa, bi nilo yaa gbini caali ki naa baa yaala n baa yaa luondi li, nua bi ŋunbo yaa baa lienni, 34li caali daano baa pa i panpaani. Li yaa puoli, wani n ji die ki yankpienga.

35Nilo nua yaa tuoni ki kpa nitoa nua, bi baa taani ki kuadi yaa nua n fo ki boagidi i ligi. Bi go baa taani ki boagidi yaa nua n kpe mo.

36Ama bi yaa den tuodi ki bani o nua yeni tuonma po, ke o daano naa tieni liba kuli ki baa kubi o cua, o baa lingi naatoa ki pa o naakpiemo daano. Li yaa puoli, omo n ji die o naakpiemo.

Bu yansubu

37Nilo yaa suni nua bi pia, o yaa kodi o bi o yaa kuadi o, o baa pa nemuu o nua yeni po, penaa o pia yeni mo yaa po.

Currently Selected:

Mi Ñama 21: BGP

Highlight

Copy

Compare