Mi Ñama 16

Manni leni a ñinkpakpala

1Isidayeli yaaba nitaanli kuli den fii Elim ki pundi Sini fanpienma, yaama n ye Elim leni Sinayi siiga. Li den tie ban den ñani Ejipiti diema nni, ŋmaalo leni piiga n danamuu. 2Isidayeli niba kuli den yenbidi mi fanpienma nni Musa leni Alono po. 3Isidayeli yaaba den yedi ba: «O Diedo yaa den cedi ke ti kpe Ejipiti diema nni, tin den kaa ki kuu leni a nanboba yaa yogunu, ki go ŋmani dupen ki guodi, laa den tu? Yi cuani ti mi naa fanpienma nni, ki bua ki teni ku naa niligu kuli n kpe mi koma.»

4O Diedo den yedi Musa: «N baa teni mi jiema n ña tanpoli, ki mi yi po. Bi niba baa yaa ña daali kuli ki wuo yaala n dagidi bi po. N baa biigi ba yeni, ki le bi yaa baa ki ŋua n bali maama, bi bi yaa kan yaa ŋua.#Jan 6.31. 5Li daluobili, bi yaa ŋanbi ban den wodi yaala, bi baa sua ke li cie ban den wuo yaala daali kuli po taalimilie.»

6Musa leni Alono den yedi Isidayeli yaaba kuli: «Dinla ku yenjuagu, yi baa bandi ke Li Miali Diedo n tie yua n ñani yi Ejipiti diema nni. 7Ku tiŋaagu, yi baa le o Diedo kpiagidi, kelima o gbadi ke yi yenbidi o po. Timo tie ŋmenba ke yi baa yenbidi ti po?» 8Musa den yedi: «O Diedo baa pa yi ti nandi yin ŋmani ku yenjuagu, ki go pa yi dupen ku tiŋaagu yin ŋmani ki guo, kelima o Diedo gbadi yin den yenbidi o po yaa yenbidi, timo tie ŋmenba? Laa tie tinba yaa po ka ke yi yenbidi, li tie o Diedo po yo.»

9Musa den yedi Alono: «Yedi Isidayeli yaaba nitaanli kuli: Yin nagini o Diedo nintuali, kelima o gbadi yi yenbidi.» 10Alono n da den maadi yaa yogunu leni Isidayeli yaaba nitaana kuli, bi den gbegi ki diidi mi fanpienma nni, ki laa ke o Diedo kpiagidi doagidi ku tawaligu nni. 11O Diedo den maadi leni Musa, ki yedi o: 12«N gbadi Isidayeli yaaba yenbidi: Ŋan yedi ba: Dinla yaa yenjuagu, yi baa ŋmani ti nandi, ku tiŋaagu mo, yi baa ŋmani dupen ki guo. Yeni, yi baa bandi ke n tie Li Miali Diedo yi Tienu.» 13Ku yenjuagu a ñinkpakpala den cua ki pini li nagili, ku tiŋaagu mo ku mangu den loni ki lindi li nagili kuli. 14Laa mangu n den yoagi yaa yogunu, bonla den bili mi fanpienma nni, ki naani leni a tatana. 15Isidayeli yaaba den diidi ki yedi biyaba: «Line tie be?» Kelima baa den bandi lan tie yaala. Musa den yedi ba: «Li tie o Diedo n puni yaa dupen ke lan tua yi jiema.#1Kor 10.3. 16Diidi o Diedo n den bili yaa ñoamabonli: ‹Yuakuli n wodi yaala n pundi o jiema banlu, ki biigi yaa bonbiigikaala n yi omeri#16.16 Omeri: Li tie bonbiigikaala mi bonbima po, mi yoma leni yaala n baa tuo ki wodi kuli po. Bi den taani laa bonbiigikaale ki biigidi “manni”. Diidi Mi Ñama 16. Omeri bonba piiga n tie homeri., nilo kuli n biigi ki dagini o niba n da maama. Yuakuli baa wodi yaaba n ye o gbandieli nni yaa po.› »

17Isidayeli yaaba den tieni yeni ki wodi, bi tianba den wodi ke li yabi, bine mo den wodi waamu. 18Bi yaa wodi, bi yen biigi leni omeri. Yua n den wodi ke li yabi naa yen sua ke li kandi. Yua n den wodi waamu moko naa yen sua ke li poadi o. Yuakuli den wodi yaala n dagidi o jiema banlu.#2Kor 8.15.

Yaa ñoamabonbilikaana n ye manni po

19Musa den yedi ba: «Oba n da cedi lan duani.» 20Baa den cengi Musa n den yedi yaala. Bi nitianba den cedi ke li sieni hali ku tiŋaagu, ama bi den sua ke li gbie leni a sidibila ki biidi cain. Musa pali den biidi leni ba. 21Tiŋaagu kuli, yuakuli yen gedi ki wodi yaala n baa dagidi o jiema po, ama u yienu yaa paagi, li yen nandi.

22Li daluobili, bi den wodi mi jiema figilimilie, omeri bonbilie nilo kuli po. Li nitaanli yudanba kuli den cua ki waani la Musa. 23Musa den yedi ba: «O Diedo bili laa ñoamabonle: Saala tie mi fuodima daali, yaa fuodima daali n gagidi ki ŋani o Diedo po: Yin puli yin bua ki puli yaala, ki ŋaani yin bua ki ŋaani yaala. Yaala n sieni kuli, yin bili hali lan faa.»#Ñam 20.8-11. 24Bi den bili la hali ke li faa, nani Musa n bili li ñoamabonli maama, ke li naa den biidi ki naa den pia sidibila mo. 25Musa den yedi: «Yin je lani dinla, kelima li tie U Tienu fuodima daali. Dinla yi kan le mi jiema i kuani nni. 26Danaluoba yin yaa wodi ma, ama li daleleeli, yaali n tie U Tienu fuodima daali, puu kan yaa ye landaali.»

27Li daleleeli, bi nitianba den ñani ki baa wodi mi jiema, ama baa den laa puu kuli. 28Lani yaa po, o Diedo den yedi Musa: «Yi baa yaa yiedi n ñoamabonli leni n bali maama hali u laa yogunu yo? 29Tiadi mani ke o Diedo n puni U Tienu fuodima daali, li tie lani yaa po yo ke o puni yi danalie yaa jiema li daluobili daali. Yuakuli n yaa kaa o kaanu, oba n da fii wan ye naani li daleleeli.» 30Lanwani, bi niba den fuo li daleleeli.

31Isidayeli yaaba den cili laa jiema yeli manni. Li den tie nani yaa bonbibu n pieni, ki naani leni yaa lalaagu n pua leni ti siadi.#Coa 11.7-8.

32Musa den yedi: «Diidi o Diedo n den bili yaa ñoamabonli. Taa mani omeri ki gbieni o leni manni ki kubi o yi yaabila po, ke ban le min den teni ke yi di yaa jiema mi fanpienma nni, min den ñani yi Ejipiti diema nni yaa yogunu.» 33Musa den yedi Alono: «Taa ki tadiga ki gbieni ga manni, lan pundi omeri yaa banlu, ki bili ka o Diedo nintuali, ki yaa kubi ka yi yaabila po.»#Heb 9.4. 34Alono den bili ka Siedi kpaku nintuali, ke lan yaa ye ki da biidi nani o Diedo n den bili li ñoamabonli Musa po maama yeni.

35Isidayeli yaaba den di manni hali bina piinaa, hali ban ban kua bi niba n ye yaa diema nni. Bi den di manni hali ki ban pundi Kanana diema.#Jos 5.12. 36Omeri bonba piiga n tie yaa bonbiigikaala n yi efa yendo.

Currently Selected:

Mi Ñama 16: BGP

Highlight

Copy

Compare