Mi Ñama 15
15
Musa leni Isidayeli yaaba yanbu
1Lanwani, Musa leni Isidayeli yaaba den yini yaa yanbu n tie ne o Diedo po. Bi den yedi:
«N baa yiini ki kpiagi o Diedo kelima o bili o jama.
O den luni o taamo leni yua jagi o mi ñincianma nni.#Doa 15.3.
2O Diedo n tie n fidu leni min baa pagi yua,
Wani n tie n faabima.
O tie n Tienu, n baa jigini o.
O tie n baa Tienu, n baa kpiagi o.#Ps 118.14; Esa 12.2.
3O Diedo tie jakoando.
O yeli yi Li Miali Diedo.
4O den luni Faraon toateliti
Leni o toatieba kuli mi Ñincianmoanma nni,
O toatieba wan jigini yaaba bodi mi ñincianma nni.
A ñingola den milini ba.
5Bi den tingi mi ñima nni nani a tana yeni,
Ke a ñingola milini ba.
6O Diedo, a nujienu paalu ki pia lie,
O Diedo, a jienu mudi a yibalinba cain.
7A guli a yibalinba,
Kelima a kpiagiciandi n yabi maama po.
A pali n beni, a den buoni ba nani ti muadi yeni.
8Leni a miani fawaama bebe, mi ñima den dogini mi baa.
Mi ñima den dogini ki se nani li guonli yeni.
A ñingola den juagi mi ñincianma siiga.
9Ti yibali den yedi:
‹N baa deli ki cuo ba ki boagidi ti fagidi hali ki guo.
N baa noadi n jugisiega ki bolini ba.›
10A go den piebi a fuoma ke mi ñincianma milini ba.
Bi den mia nani ti noabindi yeni, hali mi ñima tiipo.
11Li Miali Diedo, i tieni kuli siiga,
Ŋme n baa fidi ki niagi leni a?
Ŋme ye ki naani leni fini yua yaa gagidiŋanma n ki pia lie?
Li pundi ban jie ŋa, ki go pagi fini yua n tiendi mi bancianma.
12A den tandi a nujienu ke ki tinga nali ba,
13Kelima a ŋanbili po.
A den gobidi ki go faabi bi naa niba,
Ki gedini ba kelima a paalu po,
Ke ban teli a yekaanu yuu n gagidi ki ŋani po.
14Yaa nibuoli n lindi ba bandi laa bonla ki digibi.
Ti jawaanciandi mo cuo Filisiti yaaba.
15Edomi badiba ye leni i jeje,
Mi digibima cuo Moabi jakoanda kuli,
Kanana yaaba kuli mo yaa jigi cie.
16I jeje leni ti jawaandi baa cuo ba.
A buagu paalu baa teni ban tua muula nani li tanli yeni.
Bi kan fidi ki tieni liba kuli hali a niba,
Ŋan faabi yaaba yeni n baa pendi.
17O Diedo, a baa gedini ki ban kaani ba, a faali juali po.
Ŋan den ŋanbi yaa kaanu ke li tua a deni yeni,
A nii n den ŋanbi yaa dieŋangu po.
18O Diedo baa yaa kaa ti gbandi po,
Hali yaa yogunu n ki pia bianu.»
19Faraon taami, o teliti leni o tandanba den kua mi ñincianma nni. Die o Diedo den teni ke mi ñincianma ñima daani bi po. Ama Isidayeli yaaba den cuoni mi ñincianma siiga ke bi taana kuoni cain.
20Miriam, Alono naataanpuoga yua n den tie saawalipualo den taa ki longa ki kubi ka o nuu nni. Bi puoba kuli den ŋua o puoli, ki moko kubi mu lonmu, ki jeli ki ciaga. 21Miriam den gaani Isidayeli yaaba po bi yani ki tua: «Yiini mani o Diedo po,
Kelima o den teni ke o kpiagidi yeli ñani.
O den luni o taamo leni yua jagi o mi ñincianma nni.»
Mara ñima
22Musa den teni ke Isidayeli yaaba fii ki ŋaa mi Ñincianmoanma. Bi den teli Suri fanpienma nni. Ban den cuoni danataa cenli banlu mi fanpienma nni, baa go den laa mi ñima. 23Bi den pundi Mara, ama baa den fidi ki ñuni Mara ñima, kelima mi den to. Lani yaa po yo, ke bi yi laa kaanu Mara, yaala n bundi “U tonu.” 24Bi niba den yenbidi Musa po ki yedi: «Ti baa ño be?» 25Musa den kpaani ki mia o Diedo todima. O Diedo den waani daaguba ke Musa den luni ku mi ñima nni. Mi ñima den tua ñinŋanma. Lankane ke o Diedo den puni bi niba li bali maama leni a ñoamabona, ki biigi ba. 26O den yedi: «Yi yaa cengi o Diedo yi Tienu maama bonŋanla, yi yaa tieni yaala n tiegi o nintuali, yi yaa diadi yi tuba ki cengi o bali maama, ki go tieni o mabilikaama kuli, n kan pua yi leni min den pua Ejipiti yaaba leni yaa yiani kuli, kelima n tie Li Miali Diedo yua n paagidi a.»
27Bi den pundi Elim, naankani n den pia piiga n ñinbunalie leni kpakpalidi piilele. Bi den jiidi ki kali lankani ki kuu leni mi ñima.
Currently Selected:
Mi Ñama 15: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
