Mi Ñama 17

Masa leni Meriba ñima

1Isidayeli yaaba kuli den fii Sini fanpienma nni, ki cuoni nani o Diedo n den bili bi po li ñoamabonli maama. Bi den jiidi Refidim, mi ñinñokaama n ki den ye bi niba po naankani. 2Lanwani, bi niba den cua ki cidi Musa li koanli. Bi den yedi: «Pa ti mi ñima tin ño.» Musa den yedi ba: «Be yaa po ke yi cidi nni li koanli? Be yaa po ke yi biigidi o Diedo yeni?» 3Bi niba den coagi, ke u ñuñuunu gbadi ba. Bi den yenbidi Musa po, ki yedi: «Be yaa po ke a den teni ke ti ñani Ejipiti nni, ki teni ke tinba, ti bila leni ti yangola baa kpe u ñuñuunu?» 4Musa den kpaani ki yedi: «O Diedo, n baa tieni lede leni bi naa niba? Li poadi waamu bebe yo ban lugidi nni a tana.» 5O Diedo den yedi Musa: «Gaa bi niba liiga, gandi Isidayeli nikpela ban yaa yegi leni a. Taa a gbiamu, ŋan den pua u kpenciamu leni yuu yeni ki yaa cuoni. 6N baa yaa se a nintuali Horebi tanciangu kani. A baa pua ku tanciangu, mi ñima n ña ku niinni, bi niba n ño.» Musa den tieni yeni Isidayeli nikpela nintuali. 7O den yini laa kaanu Masa leni Meriba,#17.7 Masa leni Meriba bundi mi tulinma leni li koanli. kelima Isidayeli yaaba den koani li koanli lankani. Bi den biigi o Diedo ki yedi: «O Diedo ye ti siiga bi waa ye yo?»

Amaleki yaaba baa Isidayeli yaaba bu toabu

8Amaleki yaaba den cua ki baa Isidayeli yaaba bu toabu Refidim kani. 9Musa den yedi Josue: «Gandi bi niba ki gedi ki tuogi leni Amaleki yaaba. Saala n baa yaa se li juali yuli po, ki kubi U Tienu gbiamu n nuu nni.»

10Josue den tieni Musa n yedi o yaala kuli, ki gedi ki tuogi leni Amaleki yaaba bu toabu. Musa leni Alono leni Huri den doni li juali yuli po. 11Yaa yogunu ke Musa den yuugi o nuu kuli, Isidayeli yaaba yaa paalu n den cie. Ama o yaa den jiini o nuu yaa yogunu, Amaleki yaaba mo n den pia u paalu ki cie. 12Musa nii den kpiagi ke o coagi, ke bi taa li tanli ki bili ke o kali li po. Alono leni Huri den muubi o nii, niyendo den muubi nuyendu, ke oyua mo muubi u nulielu. Lani n den teni ke o nii baa ki yuugi hali u yienu n ban kua. 13Josue den pua Amaleki yaaba leni ki jugisiega ki paadi ba.

14O Diedo den yedi Musa: «Diani lani kuli li tili nni, ke yin yaa kubi laa bonla tiadima. Go waani Josue mine: N baa teni ke bi kan go tiadi Amaleki yaaba po ki tinga nni kuli abada.»#Tia 25.17-19; 1Sam 15.2-9.

15Musa den maa li padibinbinli. O den puni li li naa yeli: «O Diedo n tie n jakoandicabili.» 16O den yedi: «Nani Amaleki yaaba n tuo ki yugidi bi nii ki fii ki sedi o Diedo po yeni, o Diedo moko baa yaa koani leni ba, nifiima n tuu nifiima.»

Currently Selected:

Mi Ñama 17: BGP

Highlight

Copy

Compare