Mi Ñama 14
14
Faraon ŋoadi ki deli Isidayeli yaaba
1O Diedo den maadi leni Musa, ki yedi o: 2«Yedi Isidayeli yaaba, ke ban lebidi ki guani ki kali Pi-Hahiroti kani, Migidoli leni mi ñincianma siiga, naankani n tiegi Baali-Tisefoni. Yi baa jiidi lankane, ki yaa kaa ki kuu leni mi ñincianma. 3Faraon baa maadi Isidayeli yaaba maama ki yedi: ‹Bi yaadi mi diema nni, ke mi fanpienma bolini ba.› 4N baa teni Faraon pali n juagi, wan fii ki deli ke o baa cuo ba. Yeni, n yeli baa baa ti kpiagidi Faraon leni o toatieba tingbali nni. Ejipiti yaaba baa bandi ke n tie Li Miali Diedo.» Isidayeli yaaba den tieni yeni.
5Bi den waani Ejipiti bado ke Isidayeli yaaba sani. Lanyogunu, Faraon leni o naacenba den lebidi bi pala bi po ki yedi: «Ti tieni be mo n yeni, ki cedi ke Isidayeli yaaba gedi ki kan go yaa tuuni ti tuona?» 6Faraon den teni ke bi doali o toateligu, ke o taa o toatieba ke bi yegi. 7O den taa Ejipiti toateliti kobiluoba, yaadi n ŋani ki cie yaa teliti n sieni kuli. Bi toatieba den doni ti kuli niinni, nibitaa taa bonyengu kuli nni. 8O Diedo den teni ke Ejipiti bado Faraon pali juagi, ke o den ŋua ki deli Isidayeli yaaba. Isidayeli yaaba den ñani mi diema nni ki cuoni ki gaani. 9Ejipiti yaaba den ŋua ki deli ba. Faraon teliti, o taami, o tandanba leni o toatieba kuli, den nandi ba yaa yogunu ke bi jiidi mi ñincianma kani, naankani n tiegi Pi-Hahiroti, ki ye Baali-Tisefoni nintuali.
10Faraon n den nagidi, Isidayeli yaaba den yaadi ki diidi ki laa ke Ejipiti yaaba ŋua bi puoli. Ti jawaanciandi den cuo ba, ke bi buudi ki mia o Diedo. 11Bi den yedi Musa: «Naani a sua ke takula ki ye Ejipiti diema nne, ke a cuani ti ke tin kpe mi fanpienma nni? A soani ti be yaa tuonli mo n yeni, ki teni ke ti ñani Ejipiti? 12Tii den tuodi ki yedi a Ejipiti nni, ke ŋan cedi tin yaa tie Ejipiti yaaba yonbi? Ti yaa tie bi yonbi, li cie tin kpe mi fanpienma nni!» 13Musa den guani ki yedi bi niba yeni: «Yin da jie mani liba kuli. Sedi mani, yi baa le o Diedo n baa faabi yi maama dinla. Yin nua Ejipiti niba yaaba ne, yi kan go faa ki le ba abada. 14Sedi mani suo, o Diedo n baa koani ki gaa yi.»
U Tienu luodi u sanu mi Ñincianmoanma siiga
15O Diedo den yedi Musa: «Be yaa po ke a kpaani ki miadi n todima? Yedi Isidayeli yaaba ke ban fii ki yaa cuoni. 16Amo n yugidi a gbiamu, ki tandi a nuu mi ñincianma po, ki teni man boagidi. Isidayeli yaaba baa kua mi ñincianma siiga ke bi taana kuoni. 17Nmo baa teni Ejipiti yaaba pala n juagi, ban ŋoadi ba mi ñima nni. N baa guli Faraon, o toatieba, o teliti leni o tandanba kuli, ki teni n kpiagidi n gedi foagima. 18Faraon, o teliti leni o tandanba n baa teni n kpiagidi n doagidi yaa yogunu, Ejipiti yaaba baa bandi ke n tie Li Miali Diedo.»
19U Tienu maleki yua n yen ye Isidayeli yaaba goli liiga den lebidi ki guani bi puoli po. Ku tawaligu yaagu n den ye bi liiga moko den lebidi ki guani bi puoli po. 20Ku den se Ejipiti yaaba toagoli leni Isidayeli yaaba goli siiga. Li den biigi bine po, ki yieni bine po. Laa ñiagu kuli, a golieda yeni naa den nagini aya.
21Musa den tandi o nuu mi ñincianma po. O Diedo n den teni ke ku tafaaciangu ñani puoli po, ki tudi mi ñincianma. Ku den figi boncianla laa ñiagu kuli. Ku den teni ke mi ñincianma paadi, ke siiga nni kuodi. 22Isidayeli yaaba den poandi mi ñincianma siiga nni ke bi taana kuoni. Mi ñincianma den tua nani a guona bi jienu leni bi ganu kuli po.#1Kor 10.1-2; Heb 11.29. 23Ejipiti yaaba den ŋua ki deli ki bua ki cuo ba. Faraon taami, o teliti leni o tandanba kuli den kua mi ñincianma siiga, Isidayeli yaaba puoli. 24U yienu n den pudi yaa yogunu, o Diedo den ye yaa tawaligu n tie mu nni, ki nua Ejipiti yaaba toagoli. O den teni ke Ejipiti yaaba toagoli lengidi boncianla. 25O den teni ke bi teliti taana kpaadi, ke bi cenli paagi hali boncianla. Lani yaa po, Ejipiti yaaba den yedi: «Tin sani ki foagidi leni Isidayeli yaaba, kelima Li Miali Diedo koani leni ti bi po.»
26O Diedo den yedi Musa: «Tandi a nuu mi ñincianma po, mi ñima baa guani Ejipiti yaaba po, bi teliti leni bi tandanba kuli po.» 27Musa den tandi o nuu mi ñincianma po. Lan den bua ki faa, mi ñincianma go den guani leni u paalu. Ejipiti yaaba den sani, kelima mi den bua ki nandi ba. Ama o Diedo den teni ke Ejipiti yaaba baa mi ñincianma siiga. 28Mi ñima den guani ki milini ti teliti, bi tandanba leni Faraon toatieba kuli. Bani yaaba n den kua mi ñima nni ki ŋoadi Isidayeli yaaba puoli, den bodi. Ba niyendo naa den ñani lienni. 29Isidayeli yaaba den cuoni ke bi taana kuoni mi ñincianma siiga nni. Mi ñima den fii ki se nani a guona yeni bi jienu leni bi ganu.
30Landaali, o Diedo den faabi Isidayeli yaaba Ejipiti yaaba nuu nni. Isidayeli yaaba den laa Ejipiti yaaba, yaaba n den kpe ke bi bili bili mi ñincianma jaali po. 31Isidayeli yaaba den laa o Diedo n den pua Ejipiti yaaba leni o nuu yuu n pia u paalu maama. Lani, bi niba den jie o Diedo, ki dugi wani leni o naacemo Musa po.
Currently Selected:
Mi Ñama 14: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
