Efesa 3
3
Poli tuonli yaaba n tie bi nilanba po
1Lanwani, mini Poli yua n tie Jesu Kilisiti kpaadili, jaandi yinba bi nilanba po. 2Yi gbadi U Tienu n tieni n po yaa ŋanbili, ke min boagidi li leni yi. 3Li tie U Tienu doagidima po yo, ke n bandi laa bondoaginkaala nani min diani yi po maama waamu. 4Yi yaa cogi, yi baa fidi ki bandi min gaa maama ki bandi Kilisiti bondoaginkaala. #Kol 1.26-27. 5U Tienu ki den doagidi laa bondoaginkaala, yaa nifiima n pendi po, nani moala o Fuoma n doagidi la o tondiba leni o saawalipuaba yaaba n gagidi o po maama. 6Laa bondoaginkaala tie line: O Laabaaliŋamo po, bi nilanba leni Jufinba taani ki dini faayenli, ki tua gbananyendi, ki baa U Tienu ñoaniani Jesu Kilisiti nni.
7U Tienu den ŋanbi n po, ki puni nni ke n tua o Laabaaliŋamo naacemo, kelima o paalu po. 8Mini yua n tie puoli yua U Tienu nigagidiŋanba kuli siiga, n den baa laa ŋanbili, ki baa yaa wangi bi nilanba o Laabaaliŋamo, yua n doagidi Kilisiti n pia yaa ŋalimano n yabi hali ke li kandi maama. 9O go teni ke n doagidi bi niba kuli po laa bondoaginkaala n baa tieni maama. U Tienu yua n tagi li bonla kuli wuoni o bondoaginkaala yeni, hali yaa yogini n kpeli. 10O bua moala, kelima Kilisiti Nitaanli po, i paaciami danba leni li bali danba yaaba ye tanpoli n bandi, wani U Tienu yanfuoma, yaama yaa buoli n yabi. 11U Tienu den jagi ke o baa tieni la hali yogu, ki go tieni la ki dudi, kelima ti Diedo Jesu Kilisiti yaa po. 12O yaa niinne ke ti fidi ki nagini U Tienu kani leni ti dugidi, kelima tin pia yaa dandanli o po yaa po. 13Lanwani, n mia yi, yin da luo li papaali min laadi yaa fala yi po yaa po, kelima li baa yaa tie yi po kpiagidi.
Kilisiti buama
14Li tie lani yaa po yo, ke n gbaa Baa kani ki jaandi o, 15wani yua n puuni diegu kuli li yeli, lan tie ŋanduna nni leni tanpoli po kuli. 16N miadi wani U Tienu, wan pa yi nani o kpiagidi ŋalimano n yabi maama, ke o Fuoma n yaa tuuni yi niinni leni u paalu, ki teni yin yaa pa hali yi pala tugu nni, 17ke Kilisiti n yaa ye yi pala nni kelima li dandanli po. N go mia o ke wan pa yi yin yaa pia i jiini leni li tanpuuli mi buama nni, ki se ke li pa. 18Lani n tie yin fidi ki taani leni bi nigagidiŋanba kuli, ki bandi wani Kilisiti buama n pia, ki foagi, ki ñua ki go kpedi maama, 19ke yin bandi laa buama, yaama n yabi ki pendi tin baa fidi ki bandi yaala, hali ke U Tienu yedagidikaama n gbie yi pala nni.
20U Tienu yua n fidi ki tiendi yaala n yabi ki pendi tin mia o yaala leni tin tia yaala kuli hali ke li kandi, kelima o paalu yuu n tuuni ti niinni yaa po, 21wani n yaa baadi ti kpiagidi Kilisiti Nitaanli siiga leni Jesu Kilisiti yaa po, hali nifiima n tuu nifiima, hali yaa yogunu kuli. Amina!
Currently Selected:
Efesa 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
