Efesa 4
4
Li miapanli Kilisiti nni
4—6
Yaa taanyenma n ye li dandanli nni
1Lani kuli yaa po, n tundi yi, mini yua n tie li kpaadili kelima n tie o Diedo yua. Moandi mani yi tagu n dagidi leni wan den yini yi yaala yaa po. 2Yin yaa ye leni yiyaba leni li yumiinli, mi dingima leni li juunli. Juuni mani leni yiyaba leni mi buama. #Kol 3.12-13. 3Moandi mani hali bonŋanla ki kubi mi Fuoma taanyenma, kelima mi yanduanma n loli yi yenma maama po. 4Gbananyendi n ye, mi Fuoma moko tie yenma, suginyenma mo n ye, U Tienu n den yini yi yaama yaa po. 5O Diedo yendo bebe n ye, dandanyenli bebe n ye, mi batisima moko tie yenma. 6Tienyendu bebe n ye, yua n tie Baa tikuli po, yua n die tikuli, ki ye tikuli siiga, ki go ye tikuli yaa niinni. 7Ama ti siiga yuakuli den baa li ŋanbili nani Kilisiti n puni yuakuli bu paabu maama. 8Li tie lani yaa po ke li yedi:
«Wan den doni hali tanpoli,
O den cuo a kpaada,
Ki go puni bi nisaaliba bu paabu.» #Ps 68.19.
9Lan yedi ke o den doni tanpoli po yeni, li bagi be? Li bagi ke o den kpa jiidi hali ki tinga tiipo. 10Wani yua n den jiidi yeni, n tie yua n doni ki pendi hali tanpoli, ki baa gbieni i kaani kuli. 11O puni bi nitianba ke ban yaa tie tondiba, bi nitianba ban yaa tie saawalipuaba, bi nitianba ban yaa tie o Laabaaliŋamo wangikaaba, bi nitianba mo, ban yaa tie yankpaaba, bi bangikaaba. 12O den tieni yeni ki bua ki yaa ŋanbidi o nigagidiŋanba cain, ki bogini ba ban yaa tuuni, ki teni wani Kilisiti gbanandi n yaa kpedi ki suagi liiga. 13Lani n baa teni tikuli n pundi ki baa yaa taanyenma n ye li dandanli nni leni U Tienu Bijua yaa bandima, ki tie yaaba n kpedi o sanŋoadima nni, hali ki dagidi cain nani Kilisiti n dagidi cain maama. 14Lanwani, ti kan go yaa tie nani a biwaala yeni, ki lengidi kelima bi niba nunfanbiadibu leni bi boandi n kpendinni yaa bangima po. 15Ama ti yaa maadi i moamoani leni mi buama, ti baa yaa kpedi ki dagidi li bonla kuli po, Kilisiti nni, wani yua n tie li yuli. #Kol 2.19. 16Li tie wani leni o yaa todima po yo, ke ti gbanandi kuli taani ki tuugi yenma, kelima ti gbanandi tuga kuli ya n kubi ti, ke ti pa bonŋanla po. Yeni yaa po ti kpedi kelima gbananbuolu kuli tuuni u tuonli nani lan pundi maama, ki ŋanbidi tiba mi buama nni.
Yaa miapanli n ye Kilisiti niinni
17Lanwani, min yedi yaala leni min kadi ki waani yi yaala, o Diedo yeli nni tie line: Yi tagi n da naani leni bi nilanba yaa tagi, bani yaaba n ŋua bi yantiana ya n tie fanma fanma. 18Bi yama biigi. Bi tie canba U Tienu miali po, kelima bi yanboanma leni bi pajuagili yaa po. 19Baa go bani i fe n tie yaala. Bi puuni bi yula mi conconma po, ki baa yaa tiendi ti joagindi buolu kuli, ki kuandi bi yama lienni ki pugidi. 20Ama yinba, yii den bandi Kilisiti yeni ka. 21Yi den gbadi o maama, bi den bangi yinba yaaba n daani yaa moamoani n ye wani Jesu nni. 22Lani n tie ke yin da go tie nani yin den kpa tie maama. Ama yi siiga yuakuli n landi o tagikpelu nani li liadili yeni, o yanbuabiadima boandi n den biidi yuu. #Kol 3.9. 23Yin baa mani li yantiapanli. 24Yin la mani u tagipaanu, yuu n tagi nani U Tienu n bua maama, ki ŋua i moamoani n kpendinni yaa teginma leni yaa gagidiŋanma.#Cil 1.26; Kol 3.10.
25Lani yaa po, yin cedi mani mi faama, yi siiga yuakuli n yaa maadi o lielo i moamoani, kelima tikuli tie gbananyendi yaaba. #Sak 8.16. 26Yi pala yaa fii, yin da tieni tuonbiadi, ki da tuo u yienu n kua ke yi pala daa kuugi. #Ps 4.5. 27Da pa mani ku tuotabigu yudaano u kaanu yi pala nni. 28Yua n den kpa su, wan da go su. Ama wan yaa tuuni li tuonli nani lan dagidi maama, ke wan yaa pia wan baa fidi ki pa a luoda yaala. 29Majoagindiba kuli n da ña yi ñoana nni. Ama yin fidi yaa yogunu kuli, yin maadi yaa maama n ŋani, yaama n baa ŋanbi ki go seligi yaaba n gbadi ma. 30Yin da biidi mani U Tienu Fuoma Yua pali, wani yua n tie yi po mi maalima, ki doagidi ke yi daafaabima daali kpendi. 31Yin cedi mani li mutuoli, ki nanga, li pabienli, ku fuugu, ku tuotabigu leni ku tugutongu buolu kuli n ña yi siiga. 32Yin yaa mani leni yiyaba, ki gba yiyaba po mi ninñima, ki tiendi yiyaba po sugili nani U Tienu n den tieni yi po sugili, Kilisiti nni maama.#Kol 3.13.
Currently Selected:
Efesa 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
