Efesa 2
2
Yi ñani mi kuuma nni ki kua li miali nni
1Yogunuba, yi den tie tinkpiba kelima yi tagili leni yi tuonbiadi po. #Kol 2.13. 2Lanyogunu yi den ŋua ŋanduna na yema sanbiadu leni mi fawaama nni paaciami bado, yua yaa yantiali n tuuni moala U Tienu yiekaaba pala nni. 3Tikuli den kpa tie yeni, ki tiendi nani laa niba n tiendi maama moala, ki ŋua ti gbanandi bonbuakaala, ki tiendi ti gbanandi leni ti yantiana n bua yaala kuli. Bi den mali ti ke ti tie U Tienu pali n be yaaba yaa po, nani bi nisaaliba kuli yeni.
4Ama U Tienu ninñingbadima yabi, o bua ti hali boncianla. 5Lani yaa po, tin den tie bi tinkpiba kelima ti tagili po, o den guani ki puni ti li miali leni Kilisiti. Li tie o ŋanbili paabu yaa po, ke yi faabi. 6O taani ki fiini ti leni Kilisiti, ki duoni ki kaani ti leni o tanpoli diema nni, wani Jesu Kilisiti yaa niinni. 7O den tieni lani kuli ki baa doagidi o ŋanbili n yabi kaa pia bianu maama, hali yaa yogini n baa ti cua, kelima o ŋanma ti po Jesu Kilisiti nni. 8Li tie li ŋanbili-paabu yaa po, ke yi faabi. Yi baa la kelima li dandanli yaa po yo. Laa ñani yi yaa kani, li tie U Tienu paabu yo. 9Laa tie a tuona po ka. Lanwani, oba kuli n da kpiagi o yuli li po. 10Ti tie U Tienu nuu tuonli. O tagi ti Jesu Kilisiti nni, ke tin yaa tuuni a tuonŋama, wan den tuodi ki jagi ke tin yaa tuuni ya.
Bi niba kuli tua yenma Kilisiti nni
11Yin tiadi mani line, bi den mali yi ke yi tie nilanba. Ban yi yaaba a junga, kelima bi niba n tieni yaala bi gbanandi nni, den teni ke bi yi yi a jifola. 12Lanyogunu yi den foagi leni Kilisiti. Yii den pia liba Isidayeli buolu diema nni. Yi den tie canba U Tienu leni Isidayeli buolu ŋantaado nni, yaala n ŋua wan den niani ba yaa ñoanianu. Yi den ye ŋanduna nni, kaa pia suginmiba kuli, kaa pia ŋantaadi leni U Tienu. 13Ama moala Jesu Kilisiti nni, yinba yaaba n den kpa ye foagima yeni, yi nagini U Tienu kani kelima Kilisiti soama po. 14Kilisiti n tie ti yanduanma, o taani nibuolilie, Jufinba leni bi nilanba ke bi tua nibuoliyendu. O den puni o gbanandi, ki mudi yaa goanli n den paadi ti leni tiyaba, lani n tie ti yibalindi. 15O den bolini li bali maama leni man den pia yaa kuana kuli, ki taa laa nibuoliedi ki tagi nibuopaanyendu wani o ba yaa niinni, ki tieni mi yanduanma. #Kol 2.14. 16O den tieni yeni ki baa teni ban mangi leni U Tienu, ki tua nibuoyendu, kelima li dapoanpoanli po, wan den bolini ti yibalindi naankani. #Kol 1.20. 17Wani Kilisiti den cua ki wangi mi yanduanma yaa Laabaaliŋamo, yinba yaaba n den ye foagima leni yaaba n den ye koanma nni. #Esa 57.19. 18Wani yaa po, tikuli pia u sanu ki baa fidi ki pundi Baa kani, Fuoyenma nni.
19Lanwani, yii go tie nilanba leni canba ka, yi ji tie tanpoli diema yaaba, ki taa buolu leni U Tienu nigagidiŋanba, ki tie U Tienu deni yaaba. 20Yi tie nani a tanmaakaana yeni, ke bi ŋuani yi yaa tanpuuli n tie U Tienu tondiba leni o saawalipuaba po. Jesu Kilisiti wani o ba n tie laa tanpuuli tanjigi. 21O yaa niinne ke laa dieli maa bonŋanla, ki kpedi ki tua U Tienu dieli yaali n gagidi ki ŋani o po. 22Bi ŋuani yimoko o yaa niinne, ke yi taani ki tie U Tienu yekaanu, kelima o Fuoma po.
Currently Selected:
Efesa 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
