Amosi 6
6
Yanduanma ki ye
1Fala baa baa yaaba n ye Siyon leni mi yanduanma,
Ki go baa yaaba n ye Samari juali po kaa bangi liba po.
Fala baa baa laa paatieba,
Yaaba n tie i nibuoli kuli siiga yaa nibuolu n tugi li yuli,
Isidayeli yaaba n caa bani yaaba yaa kani, ke bi todi ba.
2Gedi mani ki ban diidi Kaline dogu,
Ki ña lankani ki gedi hali Hamati u dociamu,
Li yaa puoli, yin gedi Filisiti yaaba dogu Gati po.
Naani laa dociami pia mi piama ki cie mi dieliedima ne?
Naani bi diema yabi ki cie yi yaama yo?
3Yi tama ke yi foagidi fala daali,
Ama yi tiendi yaala n teni ke u paabiadu diema nagindi.
4Yi dua ban tabini yaa duani a luonñina,
Yi dua yaa cabiladikaana n dingi bonŋanla po,
Yi ŋmani i yankuli pebila
Leni a naatonbiwubida.
5Yi pua ti gogiditi,
Ki tama ke bi bani mi baantiama nani Davidi yeni.
6Yi ñu duven yaa tadibuomu n pia yaa niinni,
Yi sogini yaa kpama n ŋani ki cie,
Ama yi pala ki yia Josefi puoliŋuani bodima po.
7Li tie lani yaa po yo, ke yi baa kua ban baa gedini yaaba ti yonbidi liiga,
Yin mangidi yi pala yaa badi nni mo baa gbeni.
Samari bolinma
8Li Miali Diedo U Tienu taa wani o ba yeli ki poli,
Li Miali Diedo U Tienu, U Paaciamu Kuli Daano yedi yaa maama n tie ne:
«N nani Jakob puoliŋuani japaadi,
Ki nani bi dieŋama mo.
N baa taa bi dogu Samari leni yaala n ye u niinni,
Ki teni bi yibalinba.
9Ba niba piiga yaa sieni diegu nni, bimoko baa kpe.
10Yua n kpe kpiilo yaa cua ki taa o yaa yogunu ki baa n juu,
O yaa ñani o kpaba li dieli nni yaa yogunu,
O baa buali yua n ye li dieli liiga po:
‹Naani nitoa go ye leni a lienni?›
O nilo yeni baa guani ki yedi o:
‹Oba kuli ki ye leni nni.›
Yua n buali o yeni baa guani ki yedi: ‹Suo!
Laa tie yaa yogunu ke ti baa taa Li Miali Diedo yeli.› »
11O Diedo ñani li ñoamabonli, ki yedi:
«N baa teni a dieciama n tua tangbana,
N baa teni a diebila n pua i yiani.»
12Naani i taami baa sani ku tangu po?
Naani nilo baa ko ku tangu po leni i ne?
Ama yinba Isidayeli yaaba wani lebidi yaa bujiali n tiegi,
Ke li tua loabidi,
Ki lebidi mi teginma n mali yaala,
Ke li tua loabibiaditi.
13Yi mangidi yi pala kelima yi diedi Lodebari,#6.13 Lodebari bua ki yedi fanma, Karnayimi mo u paalu. Lanwani, laa vedise bua ki yedi: «Yi mangidi yi pala yaala n tie fanma po, ki tua: ‹Ti gbanmanu n teni ke ti baa u paalu.› »
Yi tua: «Naani tii fidi ki cuo Karnayimi yaaba leni ti paalu ka?»
14Li tie lani yaa po yo, ke o Diedo U Tienu,
U Paaciamu Kuli Daano yedi:
«N baa fiini u nibuolu, wun tuogi leni yinba
Isidayeli yaaba bu toabu,
Ki waani yi fala, ki cili jienu po, yaa sanu n caa Hamati,
Ki ban pundi yaa kpenu n tiini ki ña Araba, ki caa ganu po.»
Currently Selected:
Amosi 6: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
