Amosi 7
7
Amosi bonlekaala
7.1—9.10
Li bonlekakpiala: i naaci
1Li Miali Diedo U Tienu den doagidi n po yaala n tie ne:
N den laa ke wani o Diedo tagi i naaci,
Li muabunli n den cili ki kpedi yaa yogunu.
Laa muabunli den tie ban den ceni o bado po ti muadi,
Ke yaala n go yuandi ki bundi.
2I naaci yeni n den ŋmani yaa moasoangidi n ye ki tinga nni kuli.
N den yedi: «Li Miali Diedo U Tienu, tieni a niba po sugili,
Lani yaa ka, Jakob puoliŋuani baa tieni lede ki yaa ye,
Kelima bi wa hali boncianla?»
3O Diedo den lebidi o yama laa bonla po,
Ki yedi ke li kan tieni.
Li bonlekaliela: u mu
4O Diedo n Tienu den doagidi n po yaala n tie ne:
N den laa wani o Diedo ke o ki kpaani ki tua
Ke o baa jia o niba buudi leni u mu.
U mu yeni den teni
Ke yaa ñincianma n ye ki tinga tiipo ñuudi,
U den cili ki buondi mi diema.
5N den yedi: «O Diedo n Tienu,
Cedi ki da tieni laa bonla.
Lani yaa ka, Jakob puoliŋuani
Baa tieni lede ki yaa ye,
Kelima bi wa hali boncianla.»
6O Diedo den lebidi o yama laa bonla po.
O den yedi ke lani moko kan tieni.
Li bonlekataala: u baabibiigiko
7O Diedo den doagidi n po yaala n tie ne:
N den laa wani o Diedo ke o se u bilinu po,
Ban maa yuu leni u baabibiigiko,
O den muubi o nuu nni u baabibiigiko.
8O Diedo den buali nni: «A nua be?»
N den guani ki yedi o: «Baabibiigiko.»
Lani, o Diedo den yedi:
«N biigidi n niba Isidayeli yaaba leni laa baabu yo.
N kan go tieni bi po sugili.
9Isaaka puoliŋuani padibinbina ya n ye a juana yula po baa bodi.
Isidayeli yaaba n gagidi yaa kaani kuli baa bodi.
N baa fiini ki sedi o bado Jeroboami puoliŋuani po leni ki jugisiemu.»
Amosi leni Amasia
10Beteli kopadiciamo Amasia den soani ke bi waani Isidayeli diema bado Jeroboami, yaa maama n tie ne: «Amosi fiindi a po mi yiema Isidayeli yaaba siiga. Mi diema yaaba kan fidi ki juuni o maama yeni kuli po. 11Cengi wan ŋua ki maadi yaala: ‹Bi baa kpa Jeroboami leni ki jugisiega, ki gedini Isidayeli yaaba mo ti yonbidi yaa kaanu n foagi leni bi diema.› »
12Amasia go den yedi Amosi mo: «Fini, li bonlekaala daano, a caa! Guani a diema nni Juda po, ki yaa ban pua saawali lanpo, ki baadi a bonjekaala. 13Ama ŋan da go pua saawali Beteli na, kelima nekanba tie o bado n gagidi yaa kaanu, ki go tie o bado jaandi kaanu.»
14Amosi den guani ki yedi Amasia: «Mii tie saawalipualo, mii didi tie bi saawalipuaba cagili yua mo. Ama n tie yankpaalo, ki ŋuu sikomori tiidi. 15O Diedo den ñani nni n yankulu puole, ki yedi nni ke min cua ki pua saawali o niba Isidayeli yaaba po.
16Moala, ŋan cengi, fini yua n yedi ke min da pua saawali Isidayeli yaaba po, ke min da maadi U Tienu n yedi yaala Isaaka puoliŋuani po. 17Ŋan tieni laa bonla yeni, o Diedo n yedi yaala ne:
‹A pua baa tua puoconconli u dogu nni,
Bi baa kpa a bijaba leni a bisiaba leni mu jugisiemu.
Bi baa biigi a kuani leni u baabu ki boagidi,
Fini a ba mo baa n kpe mi nilandiema nni.
Bi baa gedini Isidayeli yaaba ti yonbidi yaa kaanu n foagi leni bi diema.› »
Currently Selected:
Amosi 7: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
