Amosi 4
4
U Tienu fu leni Samari puopiada
1Yinba yaa puopiada n ye Samari juali po,
Ki gbengi nani Basan tialu naañuana yeni,
Cengi mani yaa maama n tie ne:
«Yi mabindi taliginba, ki ŋmaadi ki midi a luoda,
Ki tua yi ciaba: ‹Taa mi daama ki cuani tin ño.› »
2Li Miali Diedo U Tienu poli
O gagidiŋanma nni, ki yedi:
«A dana kpendi, ke bi baa dadi ki ñani yi ne,
Ki taani yi siiga ba yaaba n ban ŋua hali puoli,
Nani mu jandiamu n yen cuo i jami ban dadi
Ki ñani ba maama yeni.
3Bi baa ñani yi u dogu bilinciamu bona kani,
Yuakuli leni wan nagi yaa bonli kani,
Bi baa gedini yi, ki goa yaa juali n yi Hermon po.»#4.3 Bi tianba soagini ki yedi: «Bi baa lu yi u kaanpaalu nni.»
O Diedo n yedi yeni.
Isidayeli yaaba pajuaga
4Isidayeli yaaba, gedi mani Beteli
Ki ban yaa tiendi ti tuonbiadi!
Gedi mani Giligali moko,
Ki ban yaa tiendi ti tuonbiadi ki pugidi!
Yaa padi mani yi pada tiŋaagu kuli,
Ki yaa tendi nni yi diim danataa taa kuli.
5Yaa taani mani ban pua yaa dupen leni li dabinli,
Ki padi i tuondi pada.
Kpaani mani ki waani yin kpendinni n po yaa paabu yi yama po,
Kelima yinba Isidayeli yaaba, yi nan bua yene.
Li Miali Diedo U Tienu n yedi yeni.
6Mini mo den tuuni mi koma yi dogi nni kuli,
Ki go tendi ke mi jiema poadi yi diedi nni kuli.
Ama ba leni lani kuli, yii den lebidi ki guani n kani.
O Diedo n yedi yeni.
7N den yie yi po, ki sieni ki taaga
Hali ke u jetaagu da sieni ŋmaalitaa.
N yen teni ke ki taaga n mi u naa dogu nni
Ki lagidi ki ŋaa u naa dogu.
N yen teni ki taaga n mi u naa kuanu nni,
Ki cedi u naa kuanu mo n luo ka, ki kuodi.
8N den teni ke dogilie bi dogitaa yaaba caa dotogu nni,
Ki bua mi ñinñokaama,
Bi ñuñuunu naa den gbendi.
Ama ba leni lani kuli, yii den lebidi ki guani n kani.
O Diedo n yedi yeni.
9N yen teni yi kuani n faani,
Ki teni a baayuana mo n kua yi.
N den teni ke a sidibila ŋmani yi salidinginba leni duven tiidi,
Yi kankanŋuuke leni olivie.
Ama ba leni lani kuli, yii den lebidi ki guani n kani.
O Diedo n yedi yeni.
10N den luni yi siiga u yianbiadipuodiko
Yuu n naani leni Ejipiti yuu,
Ki teni ke bi kpa yi nipanba leni mu jugisiemu,
Ki fie yi taami mo.
N den teni ke yi toanagili tinkpila nuulibiadu kua yi.
Ama ba leni lani kuli, yii den lebidi ki guani n kani.
O Diedo n yedi yeni.
11N den bolini yi siiga bi tianba,
Nani min den bolini Sodomi leni Gomori dogi maama yeni.
Yi siiga yaaba n sieni den tie nani ban kuudi
Yaa datala u mu nni yeni.
Ba leni lani kuli, yii den lebidi ki guani n kani.
O Diedo n yedi yeni. #Cil 19.24.
12Li tie lani yaa po yo, ke yi baa le
Min baa soani yinba Isidayeli yaaba maama.
Nani min baa soani yi maama yeni po,
Bogini mani ki tuogi yi Tienu, yinba Isidayeli yaaba.
13Diidi mani, U Tienu n tagi a juana leni u faalu.
O wangi bi nisaaliba o yantiana.
O yen teni mi yenma n lebidi ki tua biigili.
O cuoni ki tinga joaciama po.
O yeli n tie Li Miali Diedo U Tienu U Paaciamu Kuli Daano.
Currently Selected:
Amosi 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
