Amosi 3
3
Yaa buudi n ye Isidayeli yaaba po
3—6
U Tienu jaligi o niba
1Isidayeli yaaba, yinba U Tienu n den ñani yaa nibuolu Ejipiti nni, cengi mani o Diedo n maadi yi po yaala:
2«N den gandi yinba bebe
Ki tinga nibuoli kuli siiga.
Li tie lani yaa po yo, ke n baa cuo yi u cuonbiadu
Yin tieni yaa tudima kuli po.
3Naani nibilie baa taani ki fii sanu
Kaa kpa juogi ki dagini li po?
4Naani o yangbanlo baa buo li fuali nni,
Kaa pia wan cuo yaala?
Naani o yangbanlo baa yaa laabi ku tuugu nni
Ki buoni, kaa pia wan cuo yaala?
5Naani o nuano baa baa ku diagu nni,
Kaa laa bonjekaala?
Naani ku diagu baa fii ke bonla ki baa lienni?
6Naani bi baa pua li toagangaali u dogu nni,
Ke bi niba kan jie?
Naani fala baa baa dogu,
Ke laa tie o Diedo n cuani la?
7Lanwani, o Diedo U Tienu kan tieni liba kuli,
Kaa waani o naacenba bi saawalipuaba o ŋasiili.
8O yangbanlo yaa buo, ŋme kan jie?
Li Miali Diedo U Tienu yaa maadi,
Ŋme n kan pua saawali?»
U Tienu baa jia Samari yaaba buudi
9Kpaani mani ki yedi yaaba n ye a dieŋama nni,
Ki ye Asidodi leni Ejipiti:
«Cua mani ki taani Samari juana yula po,
Ki diidi ki le yaa janjancianma
Leni yaa mabinga n ye lienni.»
10O Diedo yedi:
«Samari yaaba ki bani ki tieni yaala n tiegi.
Bi dogindi bi dieŋama nni ban tiendi u paalu ki fenli yaala.»
11Lani yaa po, o Diedo,
U Tienu yedi yaa maama n tie ne:
«Yi yibalinba baa lindi ki cebini yi diema,
Ki paadi yi ki fie yaala n ye yi badidiedi nni kuli.»
12O Diedo yedi yaa maama n tie ne:
«Nani o yangbanlo n yen cuo ki yanga,
O yankpaalo n gaa taanalie bi tubijenga maama yeni,
Li baa yaa tie yeni Isidayeli yaaba po,
Bani yaaba n ye Samari
Ki dua i duanŋami leni yaa cabiladikaana n ŋani po.
Bi siiga nni, tianba bebe n baa sieni.»
13Cengi mani, ki kpaani ki waani Jakob puoliŋuani
Li Miali Diedo U Tienu, U Paaciamu Kuli Daano,
N yedi yaala:
14«Min baa pa Isidayeli yaaba bi yiema panpaani yaa daali,
N go baa bolini yaa padibinbina n ye Beteli moko.
A padibinbina yeni yina baa kua ki baa. #2Bad 23.15.
15N baa mudi ban den maa yaa diena ti wadi yogunu po
Leni ban den maa ya ku tontongu yogunu po,
Ban den maa yaa dieciama ki tabini tabini a luonñina moko baa bodi.
A diena boncianla baa bodi.
Mini o Diedo n yedi yeni.»
Currently Selected:
Amosi 3: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
