Jesu Tondiba Tuona 27
27
Bi gedini Poli Loma po
1Ban den jagi ki bili ke ti baa kua ku ñinbiagu, ki gedi Itali diema nni, bi den teni bi toatieba yudaano ban yi yua Juliyusi n yaa guu Poli leni kpaaditoana. 2Ti den kua yaa ñinbiagu n ñani Adamita dogu nni, ki baa gedi yaa dogi n ye Asi diema ñinkunu. Ti den fii ki caa, ke Arisitarki, Maseduani diema Tesaloniki dogu yua yegi leni ti.
3Lan den fii ki faa, ti den pundi Sidon ki sedi. Juliyusi den kubi Poli leni mi buama, ki puni o ke o ñani ku ñinbiagu nni, ki gedi ki fuondi o danlinba, ki baa mi todima bi kani. 4Ti den fii lankani ki suagi liiga ki balini Sipiri kpendegili, kelima u faalu den togidi ti. 5Ti den suagi liiga ki poandi mi ñincianma, ki balini Silisi leni Panfili diema. Ti den ban pundi Lisi diema, ki sedi Mira dogu nni. 6Lankani bi toatieba yudaano den laa ñinbiatoagu, yaagu n ñani Alekisandri dogu nni, ki baa gedi Itali, ki kuani ti ku niinni.
7Ti den suagi ki cuoni dindini danaba ki nagidi Sinidi dogu leni fala. U faalu go den togidi ti ke tii den fidi ki suagi liiga. Ti den lebidi ki balini Kileti kpendegili, ki teli Salimone po. 8Ti den suagi liiga leni fala hali ki ban balini ki pundi yaa dogu n yi ti ñinbiadi Sedikaanŋamu, yuu n kuu leni Lase dogu, ki sedi.
9Ti cenli den waagi hali ke li den ban pundi yaa yogunu, ke ku ñinbiagu cenli biagidi, kelima mi ñoalolima yogunu#27.9 mi ñoalolima yogunu: Lani n go tie ti tuonbiadi sugili miabu yogunu. Mi den tie ciyia leni cipiiga siiga. Diidi Levi Buolu Yaaba 16.29-34. Li yogunu n den pendi yeni, li ji den tie ku fawaagu yaa yogunu ke li cenli pa, kelima u faalu n yabi maama po. den pendi. Lane Poli den tuodi ki waani ba 10ki yedi: «N sua ke ti yaa suagi liiga, ku ñinbiagu cenli baa biagi. Laa tie ku ñinbiagu leni gun tugi yaa tuga bebe ka baa bodi, ti miana moko baa ti taani lienni.» 11Ama a minteela yudaano den dugi ku ñinbiagu gobidika leni ku daano maama po, ki cie Poli yaa maama. 12Ban den se yaa ñinbiadi sedikaanu yeni, naa den dagidi bi po ban yaa ye likani hali ku fawaagu. Lane ke ti siiga, yaaba n yabi ki cie den yedi ke li baa yaa ŋani tin go fii ki ña likani, ki moandi ki le ti yaa baa fidi ki suagi ki pundi Fenikisi dogu, ki sedi lankani hali ku fawaagu n pendi. Fenikisi yeni den tie Kileti ñinbiadi sedikaanu, ki tiegi jienu ki goa nintuali leni ganu ki goa nintuali po.
Ku faaciangu fii mi ñincianma nni
13Yaa faagu n ñani ganu po den figi waamu waamu, ke bi tama ke bi baa fidi ki tieni nani ban den jagi maama. Bi den fiini ku ñinbiagu kubikpiagili, yaali siendi gu, ki suagi ki balini Kileti, kaa foagi leni li jaali. 14Ama lan yeni waamu, puoli faaligu#27.14 Li diani ki yedi Yulakilona. den ñani li kpendegili po, ki figi boncianla. 15Ku faaligu yeni den taa ku ñinbiagu, ke ku naa go fidi ki baa yaa togidi gu. Lani, ti den cedi ke ku faagu taa gu ki gedini gu kun bua naani. 16Ti den balini kpendegili ke li wa ki yi Kauda ganu po. Nani lin den sieni ti po ku faaligu waamu yeni, ti den fidi ki cuo ki ñinbiabiga, ama leni fala. 17Bi den yugidi ga ki kuani ku ñinbiagu nni. Li yaa puoli, bi den soali i baabi ku ñinbiagu tiipo, ki loli bonŋanla. Bi den jie ke u faalu baa tudi ki gedini ti Libi#27.17 Libi: I kaantiami li yedi Silite boanjaali po. boanjaali tanbitintingu po. Lani, bi den jiini ku dagbeegu, ki cedi ke u faalu tudi ki gedini ti. 18Lan den fii ki faa, ke u faalu baa ki wangi ti fala yeni, bi den cili ki lu a tugitiama mi ñima nni. 19Li dataali, bani bi ba den taa ku ñinbiaciangu tuonsoantiadi ki luni mi ñima nni. 20Dana boncianla den pendi, ke u yienu leni a ŋmabila naa den ñani. Ku faagu mo den figi ki bia hali boncianla, ke tii go den daani ke ti go baa yaa ye leni miana.
21Li waagi ke oba kuli ki go den di. Lani, Poli den sedi bi siiga, ki yedi ba: «Yi yaa den cengi n maama, ke tii den fii Kileti, ti kan bi lu ti tuga, ki go le yaa fala n tie ne. 22Moala, n mia yi ke yin paagi yi pala, kelima yi siiga oba kuli kan bodi, kali ku ñinbiagu bebe. 23U Tienu yua n die nni ke n tuuni o po yeni, maleko doagidi o yuli n po ku naa ñiagu, 24ki yedi nni: ‹Poli, ŋan da jie liba. Li tie tiladi ŋan pundi ki sedi Sesari nintuali. U Tienu go todi a, ke yaaba n ye leni a ku ñinbiagu na niinni kuli, ba yendo kan bodi.› 25Lanwani, paagi mani yi pala, kelima n dugi U Tienu po. Li baa tua nani wan yedi nni maama. 26Die tilade tin pundi kpendegiliba kani.»
27Li piiga n danaadili daali ñiagu, ku faagu den pengi ti, ki caani ti ganu leni jienu Adiliatiki ñincianma nni. Ku yoagisiigu ku ñinbiagu tuonsoanba den tama ke ti nagidi tingiba. 28Bi den luni mi ñinñuanma bonbiigikaala, ki sua ke mi ñima ñua ki pundi nukpanduna piiyia. Lan pendi waamu, bi go den biigi ki sua ke mi ñima ñua ki pundi piiluoba n nukpanduna muu. 29Bi den jie ke ku ñinbiaciangu baa kpaabi yaa tanciama n ye likani mi ñima nni, ki taa yaa kubikpiaginaada n ye ku juodima, ki jiini a mi ñima nni ke gun da go cuoni. Lani, bi den guu lan yendi leni mi yanjegibima. 30Ku ñinbiagu tuonsoanba den tieni nani bi baa jiini yaa kubikpiaga n ye ku yuli po yeni, ama bi den jiini ki ñinbiabiga mi ñima nni, ki baa kua ki niinni, ki ŋaa ku ñinbiaciangu ki sani ki cia. 31Poli den yedi bi minteela kobiga yudaano leni bi toatieba kuli: «Bi jaba yeni yaa ñani ku ñinbiaciangu ne niinni, yi baa bodi.» 32Lani, bi toatieba den jia yaa baabi n doali ki ñinbiabiga leni ku ñinbiaciangu, ki cedi ke ki baa, ke mi ñima taa ga ki gedini.
33Lan den bua ki faa, Poli den mia bikuli ban je waamu, ki yedi ba: «Dinla n tie piiga n dananaa, ke yi guu leni fala, ki naa dini jiemiba kuli. 34N mia yi yin je, kelima lani n baa todi yi yin ciadi. Yi siiga ba niyendo yuyengu kan bodi.» 35Wan den yedi yeni, o den taa dupen ki tuondi U Tienu bikuli nintuali, ki cabidi ki ŋmani. 36Lane ke bikuli den baa li papaali ki dini. 37Tinba yaaba n den ye ku ñinbiaciangu yeni niinni kuli, den pundi kobilie n piilele n nibiluoba. 38Ban den dini ki dagidi, bi den luni ban tugi yaa ŋalikama mi ñima nni, ke ku ñinbiagu yuagi.
Ku ñinbiagu mudi ki yagidi yagidi
39Lan den fii ki faa, baa den bandi ban baali yaa tinga. Ama bi den laa ku kpenkadigu ke ku jaali tie tanbitintingu. Bi den jagi ke li yaa baa tuo ban nagini ku ñinbiagu ki sieni ku lankani. 40Bi den jia yaa baabi n kubi a kubikpiaga kuli, ki ŋaa ŋa mi ñima nni, ki go lodi yaa baabi n luo ku ñinbiagu bonpegidikaala. Lani, bi den yugidi yaa cabicianli n ye ku ñinbiagu yuli kani, ke u faalu tudi ku ñinbiagu ke ku teli li jaali po. 41Ban den pundi yaa tanbijuali n ye mi ñima nni, ku ñinbiagu den kpaabi li ki sedi. Ku ñoabu den feli mi tanbiima yeni niinni. A ñinguona den pua ku puoli po leni u paalu, hali ki teni ke ku kua bonjena jena.
42Bi toatieba den jagi ke bi baa kpa a kpaada, kelima baa den bua bi siiga, ba yendo n kua mi ñima nni ki dugi ki cia. 43Ama bi yudaano yua n den bua ki gaa Poli miali, den yie bi po, ke ban da tieni yeni. O go den yedi ke yaaba n bani li ñindugili n kpa yugi ki baa mi ñima nni, ki dugi ki pundi li jaali. 44O go den yedi yaaba n sieni mo, bi nitianba n cuo ti dapagidi, bi tianba mo n cuo ku ñinbiaciangu n mudi ki ŋaa yaa dajena, ki ŋoadi ba. Bi den tieni yeni, ke bikuli den pundi li jaali po leni laafia.
Currently Selected:
Jesu Tondiba Tuona 27: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
