Jesu Tondiba Tuona 26
26
Poli n maadi yaa maama o bado Agilipa nintuali
1Agilipa den yedi Poli: «Li tuo ŋan maadi ki gaa a yuli.» Poli den yugidi o nuu ki maadi ki baa gaa o yuli ki yedi: 2«O bado Agilipa, n pali mani ke n baa fidi ki maadi a nintuali dinla ki gaa n yuli, ki nan doagidi ke Jufinba n kuliti nni yaala yaa po yeni naa tie moamoani. 3Lani mo, kelima fini a ba bani Jufinba bogida cain leni ban nia yaala yaa po. Lanwani, n mia ŋa ŋan juuni ki cengi n maama.
4Jufinba kuli bani n yema n den tie maama hali n biwaama yogunu leni hali mi cilima n maadogu nni leni Jerusalemi nni. 5Bi bani nni hali ke li waagi, ki bani ke n tie Farisieni, yaa cagili n ñii ti jaanma po leni ti danbogida po ki cie. Bi yaa bua, bi baa fidi ki tieni siedi lipo. #JTT 23.6; Flp 3.5. 6Moala n se ne li bujiali kaanu kani kelima n sugini ke U Tienu baa kuani wan den niani ti yaajanba yaa ñoanianu. 7Ti buolu, bani i piiga n buoliedi yeni, yaaba n jaandi ki miadi U Tienu u yensiinu leni ku ñiagu kuli, moko sugini laa ñoanianu kuama. O bado, li tie laa suginma po yo ke Jufinba kuliti nni. 8Yinba, be teni ke yi nua ke li kan tuo U Tienu fiini bi tinkpiba?
9Moamoani mini n ba den tama ke li pundi min tieni min fidi yaala kuli ki yie Jesu, Nasareti yua yeli nni. #JTT 8.3; 22.4-5. 10N den tieni yeni Jerusalemi, ki baa bi kopadicianba yudanba kani li bali ki kuani bi nigagidiŋanba a kpaadidiena nni. Ban den jia leni ba ti buudi, n den taa leni yaaba n sua ke li pundi ban kpa ba. 11N go den caa li bali maama bangima diena kuli nni ki wangi ba fala, ki tiendi ba u paalu ban sugi U Tienu. N pabienkandikaali den teni ke n caa baa i dolami nni ki faligidi ba.
Poli togidi wan den lebidi ki ŋoadi Jesu maama
(JTT 9.1-19; 22.6-16)
12Li tie lani yaa po ke n den baa bi kopadicianba yudanba kani li bali leni u sanu ki fii ki caa Damasi ki baa n tieni yeni lanpo mo. 13O bado, u yensiinu, min den ye u sanu nni, n den laa yaa yenma n ñuliti ki cie u yienu, ke mi ñani tanpoli po ki yendi ki lindi nni, mini leni n yegininlieba. 14Tikuli den baa tiipo. N den gbadi ke u nialu maadi leni nni Hebilu maama nni ki yedi: ‹Soli, Soli, be yaa po ke a faligidi nni? Li pa a po ŋan yiadi u danbu ki pua li bonmuukaala.› 15N den yedi: ‹N Daano, a tie ŋme?› O Diedo den yedi nni: ‹N tie Jesu, ŋan faligidi yua. 16Fii ki ŋmaa ki sedi. N doagidi a po n yuli kelima n gandi a ŋan yaa tie n naacemo leni n siedo, ki yaa wangi bi niba ŋan laa yaala na leni min go baa wangi a yaala. 17N baa gaa ŋa Jufinba leni yaaba n kaa tie Jufinba kuli nuu nni min baa soani a bani yaaba yaa kani. 18N soani a bi kani ke ŋan ŋubidi bi nuni, ki ñani ba li biigili nni ban kua mi yenma nni, ki ñani ba Sutaani paalu nni, ban cua U Tienu kani. Lani, ban baa bi tuonbiadi sugili, ki baa bi u kaanu U Tienu gagidi ki ŋanbi yaaba kelima li dandanli po siiga.›
Poli go togidi Agilipa wan tuuni Jesu po maama
19Lanwani, o bado Agilipa, mii den yie ke n kan tuo ki tieni min den laa tanpoli po bonlekaala yaala yeni n puogi nni yaala. 20N den kpa wangi Damasi yaaba, ki yuandi ki wangi Jerusalemi yaaba leni Jude diema nni yaaba kuli. N go den wangi bi nilanba moko, ke ban lebidi bi pala ki ŋoadi U Tienu, ki yaa tuuni yaa tuona n doagidi ke bi lebidi. #JTT 9.20,28-29. 21Li tie lani yaa po ke Jufinba den cuo nni U Tienu diegu nni ki moandi ki baa kpa nni. 22Ama kelima U Tienu todima po n ye hali dinla ki tiendi siedi taliginba leni bi paatieba kuli po. Min yedi yaala taa yenma leni bi saawalipuaba leni Musa kuli n den pua saawali ke yaala n baa tieni yeni po, mii pugini lipo liba. 23Lani n tie ke U Tienu n Gandi Yua baa le fala tiladi, ki tua U Tienu n kpia fiini yua bi tinkpiba siiga. O ba yaa wangi Jufinba leni bi nilanba kuli mi yenma maama.» #Esa 42.6; 49.6; 1Kor 15.20.
24Poli n den maadi yeni ki baa gaa o yuli, Fesitusi den kpaani ki yedi: «Poli, a gaadi, a cogiciamu teni ke a gaadi.» 25Poli den guani ki yedi o: «Ti yudaano Fesitusi, mii gaadi ka. Min maadi yaa maama tie mamoanma, ki go tie yandanmaama. 26O bado Agilipa mo bani laa bonla maama fuuli. Lani n teni ke n maadi o kani leni li papaali, kelima n bani ke laa maama siiga baa bonyenla ki boani o, kelima laa den tieni wuoli nni. 27Fini o bado Agilipa, naani a dugi bi saawalipuaba maama po bi? N bani ke a dugi mi po.» 28Agilipa den guani ki yedi Poli: «Li sieni waamu ŋan teni min tua Kilisiti yua.» 29Poli den guani ki yedi o: «Li yaa tie moala, bi li yaa baa waagi, min miadi U Tienu yaala tie, ke lan da tua fini bebe ka, ama yinba yaaba n ye ne ki gbadi n maama kuli, n tua nani min tie maama, li yaa tie n kpaadi bebe ne yaa ka.»
30O bado leni guveneeri leni Belenisa leni yaaba n den taani ki kaa leni ba kuli den fii. 31Ban den ña, bi den maadi leni biyaba ki tua: «O naa joa naa tieni yaala n pundi ban kpa o, baa ban kuani o li kpaadidieli nni moko.» 32O bado Agilipa den yedi Fesitusi: «O joa na yaa den soagini o buudi Sesari po, a bi baa fidi ki faabi o.»
Currently Selected:
Jesu Tondiba Tuona 26: BGP
Highlight
Share
Compare
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
